Նորություններ
ՄԱԿ-ի և Արաբական պետությունների լիգայի փորձագետների խումբը, որը կազմավորվել է Քոֆի Անանի նախաձեռնությամբ, ժամանել է Դամասկոս` երկրի ղեկավարության հետ բանակցելու Սիրիա միջազգային դիտորդական առաքելություն ուղարկելու վերաբերյալ:
Իսկ Միջազգային Կարմիր խաչի ղեկավար Յակոբ Կելլենբերգերը ժամանել է Մոսկվա` ՌԴ ղեկավարությանը համոզելու ճնշում գործադրել Դամասկոսի վրա, որպեսզի վերջինս ապահովի երկրի բնակչությանը մարդասիրական օգնության անարգել բաշխումը:
«Կոլումբիայի հեղափոխական զինված ուժեր» ձախ արմատական ապստամբական խմբավորման գրոհայիններն ինքնաշեն հրթիռներով կրակ են բացել կառավարական զորքերի ստորաբաժանման վրա, որի արդյունքում, համաձայն բանակի հրամանատարության տարածած հաղորդագրության, զոհվել է 11 և վիրավորվել 2 զինծառայող:
Սա ապստամբների վերջին ամիսներին իրակացրած ամենախոշոր հարձակումն է:
ՌԴ փոխվարչապետ Դմիտրի Ռոգոզինը հայտարարել է, որ ռազմական նշանակության օպտիկական սարքերի արտադրության ասպարեզում Ռուսաստանը երկու տարում կվերացնի հավանական հակառակորդ պետություններից ունեցած խզումը:
Որպես ասվածի հավաստում, փոխվարչապետը «Twitter»-ի իր միկրոբլոգում զետեղել է Կալաշնիկովի ավտոմատի համար նախատեսված նորագույն փոքրիկ լազերային ցուցիչի ու ջերմատեսիլային սարքի լուսանկարը:
ՌԴ պաշտպանության նախարարության գլխավոր ռազմաբժշկական վարչության պետ գնդապետ Անատոլի Կալմիկովը հայտարարել է, որ ընթացիկ տարում երեք անգամ նվազել են զինծառայողների հիվանդացության, այդ թվում նաև թոքաբորբի ու վարակիչ հիվանդությունների դեպքերը, իսկ հիվանդությունների բռնկում ընդհանրապես չի եղել:
ԿԺԴՀ-ն հրաժարվել է ընդառաջել Եվրամիության խնդրանքին և հետաձգել այս տարվա ապրիլի առաջին կեսին նախատեսված գործողության հեռավոր շառավիղ ունեցող տիեզերական արբանյակով հրթիռի փորձարկումը, որը նվիրված է Կիմ Իր Սենի ծննդյան 100-րդ տարեդարձին:
Հյուսիսային Կորեայի իշխանությունները խիստ քննադատության են ենթարկել ԱՄՆ-ի, Հարավային Կորեայի ու Ճապոնիայի դիրքորոշումը և հայտարարել, որ նրանք սուտ տեղեկություններ են տարածում, որ իբր, ի խախտումն ՄԱԿ անվտանգության խորհրդի բանաձևի, Փխենյանը պատրաստվում է գործողության մեծ շառավիղ ունեցող հրթիռ փորձարկել, և այն որակել են որպես «ԿԺԴՀ-ին տիեզերական տարածությունը խաղաղ նպատակներով օգտագործելու իրավունքից զրկելու փորձ:
Կանադայի զինված ուժերը մտադիր են հեռավոր ռադիոլոկացիոն հետախուզության «AWACS» ինքնաթիռների և հետախուզական անօդաչու թռչող սարքերի օգտագործումից հրաժարվելու միջոցով խնայել շուրջ 90 միլիոն ԱՄՆ դոլար, ինչի մասին երկրի պաշտպանության նախարարը դեռ անցած տարեվերջին տեղեկացրել էր Պենտագոնին:
Կանադան, որ արդեն 25 տարի օգտագործում է «AWACS» համակարգը, մինչ այժմ հանդիսանում էր ՆԱՏՕ-ի օդային անվտանգության ապահովման ու ռազմական լրտեսության ծրագրերի երրորդ խոշոր հովանավորը:
Հալեպի հայաշատ Սուլթանիե բնակելի թաղամասում պայթուցիկ նյութով լի մեքենայի պայթյունն առնվազն զոհի, այդ թվում մեկ հայուհու ու 30 վիրավորի պատճառ է դարձել: Վերջիններիս թվում, ըստ տեղեկությունների, նույնպես հայեր կան: Սա Սիրիայում զինված հակամարտության սկզբից ի վեր առաջին խոշոր ահաբեկչությունն էր Հալեպում:
Եվս երկու զոհի պատճառ է դարձել Դամասկոսից 8 կիլոմետր հեռավորության վրա գտնվող պաղեստինցի փախստականների ամենամեծ`պաշտոնական տվյալներով կես միլիոն բնակչություն ունեցող Յարմուկ ճամբարում իրականացված պայթյունը: