Մեկնաբանելով իրավապաշտպան «Միջազգային համաներում» կազմակերպության «ՆԱՏՕ-ի հարվածների մոռացված զոհերը» զեկույցը, ՌԴ արտգործնախարարությունը հայտարարել է, որ համաձայն է զեկույցի եզրակացությունների հետ, և որ Հյուսիսատլանտյան դաշինքի ղեկավարությունը պետք է հստակ պարզաբանի, թե ինչպիսի միջոցներ են ձեռնարկվել զինված գործողության ընթացքում միջազգային մարդասիրական իրավունքի դրույթների պահպանման համար:

ՌԴ ազգային հակաահաբեկչական կոմիտեն չափանցված է համարել երկրի ուղղիչ-քրեական հաստատություններում վահաբականների ընդհատակյա կազմակերպությունների գոյության ու նրանց կողմից գրոհայինների զանգվածային հավաքագրման մասին լուրերը և հայտնել, որ թեև նման դեպքեր եղել են, սակայն համակարգված բնույթ չեն կրել:
Նման մեկ կազմակերպություն իսկապես հայտնաբերվել էր Ուլյանովսկի մարզի ուղղիչ աշխատանքային գաղութներից մեկում, ինչից հետո հատուկ ծառայություններն ազատազրկման վայրերում լուրջ քննություն էին սկսել:

ՌԴ պաշտպանության նախարարության տեղորոշման ու օվկիանոսագրության գլխավոր վարչության նախկին պետ, ծովակալ Անատոլի Կոմարիցինը հայտարարել է, որ ռազմական քարտեզագրությունը վերջին 20 տարիների ընթացքում Ռուսաստանում գործանականում որևէ զարգացում չի ապրել ու աստիճանաբար կորցնում է բարձրակարգ մասնագետներին, որոնց միջին տարիքը վաղուց արդեն անցել է 60-ը:

Համաձայն Համաշխարհային պրոբլեմների ուսումնասիրման ստոկհոլմյան ինստիտուտի վերջին հետազոտությունների, սպառազինությունների գնման ծավալներով Ասիան գերազանցում է աշխարհի մնացած բոլոր տարածաշրջաններին: Ասիական պետությունները գնում են աշխարհում վաճառվող զենքի ու սպառազինության ընդհանուր առմամբ 44 տոկոսն այն դեպքում, երբ Եվրոպային բաժին է հասնում 17, Հյուսիսային ու Հարավային Ամերիկաներին` 11, իսկ աֆրիկյան պետություններին`գնումների ընդամենը 9 տոկոսը: Վերջին տարիների սպառազինության ներմուծման բացարձակ առաջատարը Հնդկաստանն է, որին հետևում են Հարավային Կորեան, Պակիստանը, Չինաստանն ու Սինգապուրը:

Հարավային Կորեան ԿԺԴՀ իշխանություններին մեղադրել է միջուկային մարտագլխիկ կրելու ունակ և գործողության հեռավոր շառավիղ ունեցող հրթիռների ստեղծման աշխատանքները շարունակելու մեջ` հայտարարելով, որ ապրիլին նախատեսված փորձարկումը Հյուսիսային Կորեայի միջուկային ծրագրի մի մասն է և իրենից «լուրջ սադրանք» է ներկայացնում:

ՌԴ պաշտպանության նախարարությունը հերքել է Սիրիայի ափերի մոտ ռուսական ռազմանավերի մասին լուրերը և հայտնել, որ միայն Տարտուս նավահանգստում արդեն 10 օր գտնվում է քաղաքացիական անձնակազմ ունեցող «Իման» տանկերը, որը վառելիքով է ապահովում Ադենի ծովածոցում հակածովահենային գործողությունում ներգրավված Սևծովյան ու Հյուսիսային նավատորմի ռազմանավերին:

Դամասկոսի կենտրոնական շրջաններից առավել ուժեղ պահպանվող ալ-Մեզեում, որտեղ տեղակայված է Սիրիայի անվտանգության ծառայության մի քանի օբյեկտ, ինչպես նաև զինվորական օդանավակայան, մարտի լույս 19-ի գիշերը դաժան մարտեր են սկսվել Բաշար Ասադին հավատարիմ կառավարական զորքերի և «Սիրիական ազատ բանակի» ստորաբաժանումների միջև: