Նորություններ
Շահագործման ոչ պիտանի ատոմային սուզանավերի միջուկային ռեակտորների երկարաժամկետ պահպանման համար Պրիմորիեում գործող բազային Ճապոնական կառավարությունը նվիրել է երկու միլիարդ ՌԴ ռուբլու արժողությամբ սարքավորումներ, որոնք թույլ կտան մինչև 2020 թվականն առանց շրջակա միջավայրին վնաս հասցնելու, ոչնչացնել 70 միջուկային ռեակտոր:
Հյուսիսատլանտյան դաշինքի գագաթնաժողովի ընդունած հռչակագրում ասվում է, որ կազմակերպությունը ցավում է հակահրթիռային պաշտպանության եվրոպական համակարգի ծավալմանը հակազդելու նպատակով հակաքայերի դիմելու մասին Ռուսաստանից պարբերաբար հնչող հայտարարությունների համար, սակայն պատրաստ է շարունակել համագործակցությունը Մոսկվայի հետ և համատեղ որոնել խնդրի լուծման ուղիները, որոնք ՆԱՏՕ-ին պատկերանում են հակահրթիռային պաշտպանության եվրոպական ու ռուսաստանյան համակարգերի պատրաստության վիճակի մասին տեղեկատվության պարբերական փոխանակման տեսքով:
ՆԱՏՕ-ի գագաթնաժողովում որոշում է ընդունվել Մերձբալթիկայի երկնքում օդային պարեկման առաքելությունն անժամկետ դարձնելու մասին: Մերձբալթյան պետությունների զինված ուժերի սպառազինությունում չկան օդային պարեկման համար պիտանի ինքնաթիռներ, և 2004 թվականի ապրիլին ՆԱՏՕ-ի անդամ դառնալուց հետո կազմակերպության անդամ պետությունները հերթով իրականացնում են Եվրոպայի այս հատվածի օդային սահմանների պարեկությունը:
Չիկագոյում սկսված Հյուսիսատլանտյան դաշինքի գագաթաժողովում կազմակերպության գլխավոր քարտուղար Անդերս Ֆոգ Ռասմուսենը հայտարարել է, որ ՆԱՏՕ-ն չի միջամտի Սիրիայում ծավալվող իրադարձություններին, ինչպես արեց Լիբիայի պարագայում, Սակայն Սիրիայի իշխանություններին քննադատել է իրավիճակի խաղաղ կարգավորման ծրագրով ստանձնած պարտավորությունների չկատարման համար:
Հարավային Կորեայի պաշտպանության նախարար Կիմ Կվան Չժինը հայտարարել է, որ իր երկիրը պատրաստվում է Չինաստանի հետ կնքել ռազմական սարքավորումների նյութատեխնիկական ապահովման ոլորտում համագործակցության համաձայնագիր, իսկ Ճապոնիայի հետ կշարունակի ռազմական հետախուզության ոլորտում համագործակցության համաձայնագիր ստորագրելու բանակցությունները:
Միաժամանակ հայտնի է դարձել, որ Պեկինը ևս փորձում է Հյուսիսային Կորեային ետ պահել միջուկային փորձարկումների շարունակումից, զգուշանալով սահմանամերձ Չանբայշան լեռան շրջանում բնության աղտոտումից և ճառագայթման տարածումից:
Մոսկվայի հյուսիս-արևմուտքում, Ռուբլյովյան խճուղում սպանվել է Վրաստանի զինված ուժերի 25-րդ մոտոհրաձգային բրիգադի նախկին հրամանատար, 48-ամյա գեներալ Ռոման Դումբաձեն: Մարդասպանները նրան են մոտեցել մոտոցիկլետով և մի քանի բառ փոխանակելուց հետո կրակել գլխին ու փորին: Գեներալը ստացած վերքերից տեղում մահացել է:
Եվրամիության անդամ 27 պետությունները պաշտպանության կարիքների համար տարեկան ծախսում են 200 միլիոն եվրո: Այդ մասին Չիկագոյում սկսված ՆԱՏՕ-ի գագաթնաժողովում հայտարարել է Եվրոպական խորհրդի նախագահ Հերման վան Ռոմպեյը: Նա միաժամանակ մատնացույց է արել եվրոպական պաշտպանության արդյունաբերական-տեխնոլոգիական բազայի, ինչպես նաև Եվրամիության ու ՆԱՏՕ-ի ռազմավարական համագործակցության ամրապնդման անհրաժեշտությունը: