Ռուսաստանի միացյալ ավիաշինական կորպորացիան դադարեցրել է համագործակցությունը Տաշքենդի` Չկալովի անվան ավիացիոն արտադրական միավորման հետ, որն արտադրում էր ԽՍՀՄ, ապա նաև Ռուսաստանի ռազմատրանսպորտային ավիացիայի հիմնական միջոց հանդիսացող ԻԼ-76 ինքնաթիռները: Արտադրությունն աստիճանաբար Ռուսաստան տեղափոխելու որոշում ընդունելուն զուգահեռ այնտեղ կատարվում էր միայն տեխնիկայի վերջնական հավաքում դեռ ԽՍՀՄ տարիներից մնացած կաղապարներով, պահեստամասերի հիմնական մասը տրամադրում էր Ռուսաստանը:

Եվրոպական Cassidian ընկերությունը Կանադայի ռազմական հետազոտությունների և նախագծումների կազմակերպության կողմից լազերային զենքի բոլոր տեսակներից նավերի պաշտպանության համակարգի ստեղծման պատվեր է ստացել: LOCATES նոր համակարգի հիմնական խնդիրը կլինի լազերային ուղղորդմամբ հրթիռներից և լազերային թիրախացուցիչներից նավերը պաշտպանելը: Այն նաև կկարողանա գրանցել նմանատիպ հրթիռների արձակումները և զգուշացնել անձնակազմին: Որպես հակազդման միջոց համակարգը նույնպես լազեր կկիրառի այլ միջոցների հետ […]

ՀՀ պաշտպանության նախարար Սեյրան Օհանյանը հունիսի 1-ին ընդունել է Հայ բարեգործական ընդհանուր միության նախագահ Պերճ Սեդրակյանին: Հանդիպման ընթացքում քննարկվել են բանակաշինությանը Սփյուռքի աջակցության հարցեր:
Սեյրան Օհանյանը բարձր է գնահատել հայրենիքի պաշտպանության գաղափարի շուրջ Հայրենիք-Սփյուռք համերաշխությունն ու միասնականությունը:
Կարևորելով բանակաշինությանը Սփյուռքի աջակցությունը` Պերճ Սեդրակյանը նշել է, որ այսուհետ ռազմակրթական ծրագրերին աջակցելը լինելու է Հայ բարեգործական ընդհանուր միության ուշադրության կենտրոնում:

Ռուսական սպառազինության ու ռազմական տեխնիկայի արտահանմամբ զբաղվող «Ռոսօբորոնէքսպորտ» ընկերության հատուկ հանձնարարությունների գծով տնօրեն Նիկոլայ Դիմիդյուկի կարծիքով, Հավաքական անվտանգության պայմանագրի կազմակերպության (ՀԱՊԿ) և ԱՊՀ անդամ երկրները վաղ թե ուշ ստիպված են նոր զենք գնել Ռուսաստանից, քանի որ սպառազինությունը նույնպես հնանում է և չի կարող շարունակ արդիականացվել:

Ամերիկյան «Lckheed Martin» ավիաշինական ընկերությունը հրաժարվել է Թուրքիային տրամադրել 5-րդ սերնդի «F-35» կործանիչի արտադրման տեխնոլոգիան, ինչի պատճառով Թուրքիան դեռևս այս տարվա մարտ ամսին հայտարարել էր, որ դադարեցնում է 100 հատ ամերիկյան «F-35» գնելու շուրջ բանակցությունները: Ամերիկյան ընկերությունը չի տալիս կործանիչի ծրագրային ապահովման ներքին և արտաքին բանալիները (կոդերը), առանց որոնց թուրք ճարտարագետները չեն կարող փոփոխություն կատարել ինքնաթիռի ծրագրային ապահովման մեջ:

Իրանի պաշտպանության նախարար Ահմադ Վահիդին Բոլիվիայի իր գործընկերոջ հրավերով հունիսի 1-ին այցելել է Սանտա-Կրուս: Նա կմասնակցի Լատինական Ամերիկայի և Կարիբյան ավազանի երկրների դաշինքի (որի անդամ են Կուբան, Վենեսուելան, Բոլիվիան, Նիկարագուան և Դոմինիկյան Հանրապետությունը) ռազմական դպրոցի բացման արարողությանը: Իրանում իսլամական հեղափոխությունից հետո առաջին անգամ է, որ Իրանի պաշտպանության նախարարն այցելում է Բոլիվիա:

Երեխաների պաշտպանության միջազգային օրվա կապակցությամբ ՀՀ պաշտպանության նախարարության վարչական համալիրում հունիսի 1-ին տեղի է ունեցել տոնական միջոցառում, որին մասնակցել են նախարարության զինծառայողների և քաղաքացիական հատուկ ծառայողների հարյուրավոր երեխաներ:
Միջոցառման ժամանակ կազմակերպվել է տոնական համերգ, մանկական նկարների ցուցահանդես, ինչպես նաև մանկական գնացքով էքսկուրսիա վարչական համալիրի տարածքում: