Թուրքիան ընդլայնում է Իրաքի տարածքում Քրդական բանվորական կուսակցության գրոհայինների դեմ ռազմական գործողությունները: Թուրքական զրահատեխնիկայի շարասյունը 20 կմ խորանում է Իրաքի տարածքում` ուղղվելով դեպի Զակհո քաղաքի մերձակայք: Այնտեղ հետախուզության տվյալներով տեղակայված են մինչև 400 քուրդ զինյալներ: Շարասյան կազմում են 20 տանկեր և 30 բեռնատարներ:
Ավելի վաղ թուրքական կողմը հայտնել էր, որ քրդերի դեմ ռազմական օպերացիային ներգրավված են մոտ 10 000 զինծառայողներ:

ԱՄՆ ռազմաօդային ուժերի հետազոտական լաբորատորիան F-22 Raptor կործանիչների շարժիչների վիբրացիան մարելու նոր միջոց է գտել, ինչի շնորհիվ հնարավոր կլինի ինքնաթիռների նորոգման և շահագործման ժամանակ խնայել մինչև 40 միլիոն դոլար:
Պարզապես շարժիչներում կտեղադրվեն ընդամենը 35 դոլար արժողությամբ միջադիրներ, որոնք կկանխարգելեն համապատասխան հատվածի վնասումը: Յուրաքանչյուր շարժիչ համար կպահանջվի 7 այդպիսի միջադիր, այդպիսով երկշարժիչանի մեկ կործանիչի արդիականացման համար կծախսվի ընդամենը 500 դոլար:

ԱՄՆ ռազմածովային ուժերում 2012թ. կսկսեն փորձարկել ավիակրի տախտակամածին վայրէջք կատարելու նոր համակարգ: Նոր համակարգը կներառի վայրէջքի գոտում տեղադրվող ազդանշանային սարքավորումներ և դրանք կառավարող ծրագրային ապահովում: Ինքնաթիռի օդաչուի խցիկի ապակու վրա արտաբերվող նշանների հետ համատեղմամբ այն կբարձրացնի վայրէջքների ճշգրտությունն ու անվտանգությունը:

ԱՄՆ ռազմածովային ուժերը 2013-2014թթ.. դուրս կգրեն 12 ռազմանավ: Նավատորմի կազմից դուրս կբերվեն 9 հածանավ և 3 դեսանտային նավ: 20 տարվա միջին տարիք ունեցող ռազմանավերի դուրսգրման պատճառ է հանդիսացել ԱՄՆ ռազմական բյուջեի ծախսերի կրճատումը: Առաջիկա 10 տարիների ընթացքում Պենտագոնը պետք է խնայի շուրջ 450 միլիարդ դոլար:
Չի բացառվում, որ դուրս գրված ռազմանավերը վաճառքի հանվեն միջազգային շուկայում: Ավելի վաղ ամերիկյան նավերի հանդեպ հետաքրքրություն են ցուցաբերել Թաիլանդը և Հնդկաստանը:

ԱՄՆ կենտրոնական հետախուզական վարչությունը երկար տարիներ տեղեկատվություն է հավաքել Գերմանիայի դաշնային հետախուզական ծառայության աշխատակիցների վերաբերյալ: Այդ մասին հայտնում է Focus գործակալությունը` հենվելով Վաշինգտոնի ազգային արխիվում պահվող ԿՀՎ փաստաթղթերի ուսումնասիրության արդյունքների վրա:
Լրատվամիջոցին հայտնի են դարձել ընդհուպ մինչև 1990-ական թթ. կատարվող լրտեսության մանրամասները: Ամերիկացիներին հետաքրքրել են հատկապես անձնական բնույթի տեղեկությունները` ծննդյան ամսաթվերը, ամուսնությունների տարեթվերը, նույնիսկ կին աշխատակիցների` երեխա ունենալուց հետո ֆիզոլոգիական արձակուրդ գնալու ժամկետները:

Ամերիկացի Մեթյու Վանդայկը, որը պահվել է լիբիական բանտում և ազատ արձակվելուց հետո կռվել է ապստամբների շարքերում, շուտով կվերադառնա տուն: Նա զանգահարել է իր մորը, ասել է, որ որ ապստամբներն իրեն ապահովել են անհրաժեշտ ամեն ինչով, իսկ այժմ գտնվում է Տրիպոլիի Radisson հյուրանոցում և մոտ երկու շաբաթից կվերադառնա: Մինչ այդ նա նորից կայցելի Սիրտ քաղաք, ուր գտնվել է Քադաֆիի սպանության պահին:

Նևադա նահանգում, Լաս-Վեգաս քաղաքից 160 կմ հեռավորության վրա կործանվել է ԱՄՆ ռազմաօդային ուժերի F-15C Eagle ինքնաթիռը: Կործանիչն ընկել է անապատի տարածքում, օդաչուն հասցրել է ինքնանետվել և փրկվել: Առայժմ թռիչքի բնույթի, վթարի պատճառների վերաբերյալ մանրամասներ հայտնի չեն: