Սեպտեմբերին Նիժնի Տագիլում սպառազինության ցուցահանդեսի ժամանակ «Ուրալվագոնզավոդ» ընկերությունը գործողության մեջ կներկայացնի ռուսական նոր «Տ-90ԱՄ» տանկը: Նախնական փորձարկումների ընթացքում զինվորականները տանկի տեխնիկական տվյալների հետ կապված որոշակի թերացումներ են հայտնաբերել, որոնք այժմ վերացվել են: Մասնավորապես, հզորացվել է շարժիչը, փոխվել է փողը, տեղադրվել է բոլորովին նոր, պաշտպանված գնդացրային համակարգ: Մեքենան լրամշակվել է` հաշվի առնելով պաշտպանության նախարարության պատասխանատուների բոլոր դիտողությունները:

2010թ. Իսրայելի ռազմական արտահանման ծավալը հատել է 7,4 միլիարդ դոլարի սահմանը: Վերջնական ճշտված տվյալները կհրապարակվեն լրացուցիչ ծառայությունների մատուցման պայմանագրերի տվյալները հաշվարկելուց հետո: Ամեն տարի Իսրայելի ռազմական արդյունաբերության համակարգի արտադրանքի շուրջ 80 տոկոսը արտահանվում է, ընդ որում՝ արտահանման ծավալը տարեցտարի աճում է, համեմատության համար նշենք, որ 2005թ. այն կազմել է 3,5 միլիարդ դոլար: Սակայն երկրի ռազմական արդյունաբերության ոլորտի ներկայացուցիչները կարծիք են հայտնել, որ արտահանման ծավալը առաջիկա տարիներին կկրճատվի:

Հանրահայտ Վիքիլիքս կայքի հրապարակած նյութերի համաձայն՝ դեռ 5 տարի առաջ Իսրայելը հրաժարվել է Իրանի ատոմային օբյեկտները ոչնչացնելու նպատակով ռազմական օպերացիա անցկացնելու գաղափարից: Լրատվամիջոցներին, մասնավորապես «Հաարեց» թերթին արդեն փոխանցված դիվանագիտական գրագրության մի մասը ԱՄՆ կոնգրեսական Գարի Ակերմանի և Իսրայելի ատոմային էներգետիկայի հանձնաժողովի պետի տեղակալ Արիել Լեվիտի հանդիպման արդյունքներն է արձանագրում: Հենց այդ հանդիպման ժամանակ էլ Լեվիտը հայտնել է, որ Իսրայելի ղեկավարությունը Իրանի դեմ ռազմական օպերացիան առավելապես անհնարին է համարում:

Ռազմական փորձագետ Արծրուն Հովհաննիսյանը «Հայ զինվորի» ընթերցողին ծանոթ է ռազմաօդային ուժերի պատմությանը եվ ընդհանրապես ավիացիային վերաբերող բազմաթիվ հոդվածներով: Վերջերս մասնագիտական մեկնաբանություններով հանդես է գալիս նաեւ ԶԼՄ-ներում:
Ա.Հովհաննիսյանը ծնվել է 1980թ. Շիրակի մարզի Ցողամարգ գյուղում: 2001թ. ավարտել է ՀՀ ՊՆ Վ.Սարգսյանի անվան ռազմական ինստիտուտը: Զբաղվում է սպառազինությունների պատմության եվ զարգացման հեռանկարների, ինչպես նաեւ տարածաշրջանային ռազմաքաղաքական հիմնախնդիրների ուսումնասիրությամբ: Երեք մենագրության եւ տասից ավելի գիտական ու վերլուծական հոդվածների հեղինակ է:

Իսրայելի օդուժը փորձնական հերթապահության է կանգնեցրել հակահրթիռային պաշտպանության «Երկաթե գմբեթ» (Iron Dome) նոր համակարգը: Տեխնիկական տվյալների համաձայն, իսրայելական Rafael ընկերության արտադրանքը կարող է որսալ 4-70 կմ հեռավորությունից արձակված հրթիռները: Ընդ որում, համակարգն ունակ է հաշվարկել, թե որտեղ կընկնի հակառակորդի հրթիռը, և եթե տեղանքը մարդաբնակ չէ, հակահրթիռ չի արձակվի: Զինատեսակի մեկ մարտկոցը բաղկացած է մեկնարկային երեք կայանից` յուրաքանչյուրը քսան Tamir հակահրթիռով, կրակի կառավարման կետից և բազմաֆունկցիոնալ ռադիոտեղորոշիչ կայանից:

Ամերիկյան բանակը սկսել է փորձարկումը մի համակարգի, որը հնարավորություն կտա մի քանի անօդաչու թռչող ապարատներից ստացվող տեղեկատվությունը համատեղել ղեկավարման կետի մեկ էկրանի վրա՝ համադրելով տարբեր տիպի սարքավորումներից եկող տեղեկությունը: Համակարգը մի քանի ծրագրային ապահովման միացություն է, որոնցից մեկն էլ հանդիսանում Google Earth ծրագիրը: Օրինակ՝ Անօդաչու սարքերից ստացված ինֆորմացիան կնշվի Google Earth-ի քարտեզի վրա, ինչը հնարավորություն կտա օպերատորներին ավելի արագ և ճշգրիտ մշակել տեղեկատվությունը և թիրախների ընտրություն կատարել:

Մեծ Բրիտանիայի պաշտպանական գիտության և տեխնիկայի լաբորատորիան մի քանի այլ ձեռնարկությունների հետ համատեղ տեսադիտման և նույնականացման նոր համակարգի ստեղծման աշխատանքներ է սկսել, ինչը թույլ կտա ուղղաթիռների օդաչուներին խնդիրներ կատարել վատ տեսանելիության պայմաններում: Նոր տեխնոլոգիան հնարավորություն կտա շրջակա տարածքի մասին ինֆորմացիան եռաչափ ֆորմատով արտաբերել օդաչուի սաղավարտի ցուցիչի վրա: Համակարգն իրենից ներկայացնելու է հաշվարկային մեխանիզմի և սենսորների միացություն, վերջիններս որոշելու են օդաչուի գլխի ուղղվածությունը: