Նորություններ
Մինչ Լիբիայի ազգային անցումային խորհուրդը հայտարարում էր Քադաֆիի որդի Սեյֆ ալ Իսլամի ձերբակալության լուրը, գնդապետի կողմնակիցները «երդմանը դավաճանելով խռովարարների ու ՆԱՏՕ-ի կողմն անցնելու մեղադրանքով» տարբեր քաղաքներում մահապատժի են ենթարկել լիբիական բանակի հինգ գնդապետի: Դիտորդները նշում են, որ լիբիական դիմադրության անդամներն այժմ փոխել են իրենց մարտավարությունը և «թիրախային հարվածներով» ոչնչացնում են նոր բանակի բարձրաստիճան զինվորականներին և նման վախճան խոստանում ազգային անցումային կառավարության հետ համագործակցող բոլոր սպաներին:
Նիգերիայի հետ սահմանն անցնելու փորձի ժամանակ Սեյֆ ալ Իսլամին ձերբակալված զինված խմբավորումը հայտարարել է, որ նա Զինտան քաղաքում հսկողության տակ կմնա այնքան ժամանակ, մինչև Լիբիայում կազմավորվի նոր դատական համակարգ:
Ի պատասխան Միջազգային քրեական դատարանի գլխավոր դատախազ Լուիս Մորենո-Օկամպոյի հայտնած մտահոգության, Լիբիայի ազգային անցումային խորհրդի վարչապետ Աբդելռահիմ ալ-Կիբն իր հերթին հայտարարել է, որ Քադաֆիի որդին չի հանձնվի միազգային քրեական դատարանին, և երաշխավորել է, որ նրա նկատմամբ կընթանա արդար դատավարություն, որը լիովին կհամապատասխանի միջազգային իրավունքի նորմերին, ինչից Լիբիայի քաղաքացիները զրկված են եղել քսան տարի շարունակ:
Ավստրալիայի տեղական թերթերից մեկի թղթակիցը ջրատարում գտել է նախորդ շաբաթ Ավստրալիա ԱՄՆ նախագահ Բարաք Օբամայի կատարած այցի ընթացքում տեղաշարժի պլանը: 120 էջանոց փաստաթուղթը պարունակում է տեղաշարժի բոլոր երթուղիների և այդ ընթացքում նախագահի անվտանգության ապահովման բոլոր մանրամասները, ինչպես նաև ԱՄՆ և Ավստրալիայի բազմաթիվ բարձրաստիճան պաշտոնատար անձանց հեռախոսահամարները:
Փաստի առնչությամբ Ավստրալիայի գլխավոր դատախազությունը հետաքննություն է սկսել:
Ադիս Աբեբան, հետևելով Քենիայի օրինակին, զինվորական ստորաբաժանումներ է մտցրել քաղաքացիական պատերազմի պատճառով փաստականորեն չորս ինքնավար հատվածների բաժանված Սոմալիի տարածք` դիմակայելու այս երկրում տեր ու տնօրինություն անող «Ալ Շաբաբ» իսլամական ծայրահեղական կազմակերպության գրոհայինների հարձակումներին: 20 մարտական մեքենայի ուղեկցությամբ Սոմալի մտած ստորաբաժանումներն այժմ գտնվում են երկու քաղաքներում, որոնցից մեկում արդեն զինվորական բազա են հիմնել և սկսել պաշտպանական ամրությունների կառուցումը:
Սիրիայի հասարակության պատվիրակության անդամները, որոնք Կահիրե էին ժամանել Սիրիայի ներքին գործերին Արաբական պետությունների լիգայի միջամտության դեմ բողոքելու, մայրաքաղաքի կենտրոնում` լիգայի շտաբ-բնակարանի մոտ դաժան ծեծի են ենթարկվել տեղի ընդամադիրների կողմից և տեղափոխվել հիվանդանոց, իսկ ոստիկանությունը չի միջամտել զանգվածային անկարգությանը:
Գերմանիան, Ֆրանսիան ու Մեծ Բրիտանիան ՄԱԿ Գլխավոր ասամբլեայի նստաշրջանի հաստատմանն են ներկայացրել մի օրինագիծ, որն արգելում է թռիչքների իրականացումը Սիրիայի օդային տարածքում: Այն կարող է քվերակության ներկայացվել արդեն եկող շաբաթ և ոչ միայն ԱՄՆ-ն ու Ճապոնիան, այլև մի շարք արաբական պետություններ ցանկանում են հանդես գալ որպես օրինագծի համահեղինակներ:
Նրանք բոլորը ՌԴ պաշտպանության նախարարության ռազմաուսումնական հաստատությունների 2011 թվականի շրջանավարտներ են: Եվս 1.500 նորընծա լեյտենանտ էլ հետագա ծառայության է ուղարկվել ներքին գործերի և արտակարգ իրավիճակների նախարարություններ, ինչպես նաև Անվտանգության դաշնային ծառայություն: Իսկ այն կուրսանտները, որոնք չորս տարի շարունակ սովորել էին այս պահին պաշտպանության նախարարությանը ոչ անհրաժեշտ զինվորական մասնագիտություններ և հետո չեն ցանկացել շարունակել զինվորական ծառայությունը, իրենց իսկ ցանկությամբ իսկույն զորացրվել են: