ԿԺԴՀ-ն հրաժարվել է ընդառաջել Եվրամիության խնդրանքին և հետաձգել այս տարվա ապրիլի առաջին կեսին նախատեսված գործողության հեռավոր շառավիղ ունեցող տիեզերական արբանյակով հրթիռի փորձարկումը, որը նվիրված է Կիմ Իր Սենի ծննդյան 100-րդ տարեդարձին:
Հյուսիսային Կորեայի իշխանությունները խիստ քննադատության են ենթարկել ԱՄՆ-ի, Հարավային Կորեայի ու Ճապոնիայի դիրքորոշումը և հայտարարել, որ նրանք սուտ տեղեկություններ են տարածում, որ իբր, ի խախտումն ՄԱԿ անվտանգության խորհրդի բանաձևի, Փխենյանը պատրաստվում է գործողության մեծ շառավիղ ունեցող հրթիռ փորձարկել, և այն որակել են որպես «ԿԺԴՀ-ին տիեզերական տարածությունը խաղաղ նպատակներով օգտագործելու իրավունքից զրկելու փորձ:

Կանադայի զինված ուժերը մտադիր են հեռավոր ռադիոլոկացիոն հետախուզության «AWACS» ինքնաթիռների և հետախուզական անօդաչու թռչող սարքերի օգտագործումից հրաժարվելու միջոցով խնայել շուրջ 90 միլիոն ԱՄՆ դոլար, ինչի մասին երկրի պաշտպանության նախարարը դեռ անցած տարեվերջին տեղեկացրել էր Պենտագոնին:
Կանադան, որ արդեն 25 տարի օգտագործում է «AWACS» համակարգը, մինչ այժմ հանդիսանում էր ՆԱՏՕ-ի օդային անվտանգության ապահովման ու ռազմական լրտեսության ծրագրերի երրորդ խոշոր հովանավորը:

Հալեպի հայաշատ Սուլթանիե բնակելի թաղամասում պայթուցիկ նյութով լի մեքենայի պայթյունն առնվազն զոհի, այդ թվում մեկ հայուհու ու 30 վիրավորի պատճառ է դարձել: Վերջիններիս թվում, ըստ տեղեկությունների, նույնպես հայեր կան: Սա Սիրիայում զինված հակամարտության սկզբից ի վեր առաջին խոշոր ահաբեկչությունն էր Հալեպում:
Եվս երկու զոհի պատճառ է դարձել Դամասկոսից 8 կիլոմետր հեռավորության վրա գտնվող պաղեստինցի փախստականների ամենամեծ`պաշտոնական տվյալներով կես միլիոն բնակչություն ունեցող Յարմուկ ճամբարում իրականացված պայթյունը:

Լիբիայի արտգործնախարարն անուղղակիորեն ընդունել է Սիրիայում կառավարական զորքերի դեմ կռվող լիբիացի գրոհայինների գոյության փաստը` Թունիսի ու Եգիպտոսի արտգործնախարարների հետ հանդիպմանը հաջորդած մամուլի ասուլիսում հայտարարելով՝ եթե Սիրիայում լիբիացի գրոհայիններ կան, ապա նրանք այնտեղ են մեկնել սեփական նախաձեռնությամբ. «Լիբիայի յուրաքանչյուր քաղաքացի իրավունք ունի զբաղվելու ինչով ցանկանում է, և մեկնել՝ ուր ուզում է: Սակայն լիբիացիների մասնակցությունը Սիրիայում ընթացող մարտական գործողություններին դեռևս չի նշանակում, թե դա կատարվում է Լիբիայի կառավարության որոշմամբ»:

Գերմանիայի Նյուրնբերգ քաղաքում մարտի 9-ից 12-ը անցկացված մարզական ու որսորդական զենքերի ցուցահանդես-տոնավաճառում Լեհաստանի ու Ավստրալիայի ուժային գերատեսչությունները սեփական փորձակումների անցկացման համար պատվիրել են ռուսաստանյան արտադրության «Сайга-12» հրացանի մի քանի մոդիֆիկացիաներ:

ՌԴ արտգործնախարարության պաշտոնական ներկայացուցչը հայտարարել է, որ Աֆղանստանում ՆԱՏՕ-ի ուժերի մատակարարման նպատակով ոչ ռազմական նշանակության բեռների տեղափոխման` Ուլյանովսկում ստեղծվելիք տրանզիտային կետում Հյուսիսատլանտյան դաշինքի զինծառայողների, ինչպես նաև ռազմական բազաների ու օբյեկտների առկայություն չի նախատեսվում: Այնտեղ կլինեն միայն նյութատեխնիկական ապահովման քաղաքացիական օբյեկտներ` ժամանակավոր պահպանության պահեստներ և այլն:

ՌԴ կենտրոնական զինվորական օկրուգի հրամանատար, գեներալ-գնդապետ Վլադիմիր Չիրկինը հայտնել է, որ օկրուգի երեք` Սարատովի, Սվերդլովսի ու Չելյաբինսկի մարզերում գտնվող զորավարժաններում «Разрушитель Р-40» սարքավորման օգնությամբ, որը պայթեցնելու փոխարեն այրում է արկի վառոդը, առաջիկայում կսկսվի արկերի անվնաս՝ առանց պայթեցման ոչնչացումը, ինչը պայմանավորված է զորավարժարաններին մոտ գտնվող բնակավայրերի բնակչության չդադարող բողոքներով: