ՌԴ պաշտպանության նախարարությունը կմասնակցի Ан-124 «Руслан» նշանավոր ռազմափոխադրական ինքնաթիռների արդիականացված շարժիչների արտադրության վերսկսման ծրագրին, որն իրականացնելու է ռուսաստանյան և արտասահմանյան ինքնաթիռների համար 55 տարբեր շարժիչներ արտադրող ուկրաինական «Мотор Сич» բաց բաժնետիրական ընկերությունը:

Մերձմոսկվայում «ապրանքի իրացման պահին ձերբակալվել է պայթուցիկ սարքերի և հրազենի վաճառքով զբաղվող զինված հանցագործների խումբ: Այժմ ստուգվում է նրանց բոլորի հնարավոր մասնակցությունը ահաբեկչական գործողություններին:

Հոլանի բարձունքներում մի քանի ականանետային արկեր պայթել են Իսրայելի պաշտպանության նախարար Էհուդ Բարաքից ընդամենը 300 մետր հեռավորության վրա: Նախարարը բարձունքների շրջան էր ժամանել անձամբ գնահատելու Սիրիայի հետ սահմանում տիրող իրավիճակը:
Էհուդ Բարաքը հայտարարել է, որ Թել Ավիվն ուշադիր հետևում է զինապահեստներից սպառազինության հնարավոր արտահոսքին և պատրաստ է Ասադի վարչակարգի անկումից հետո իրավիճակի ցանկացած զարգացման:

ՌԴ արևմտյան զինվորական օկրուգի բանակային ավիացիայի օդաչուները երեկ սկսված զորավարժությունների անծանոթ օդանավակայաններում գործելու վարժանք են իրականացրել: Սմոլենսկի մարզի «Դորոգոբուժ» և Լենինգրադի մարզի «Կինգիսեպպ» զորավարժարաններում անցկացվող մարտական պատրաստության ստուգատեսին մասնակցել է ավելի քան երկու տասնյակ «Ми-24» և «Ми-8» մարտական ուղղաթիռ:

Ռուսաստանի 2013 թվականի պետական բյուջեում ազգային պաշտպանության բաժնում նախատեսված ծախսերը կավելանան 25,8, իսկ ազգային անվտանգության ու իրավապահ մարմինների գործունեության համար նախատեսված հատկացումները` 9 տոկոսով: Սակայն պաշտպանական բնագավառին հատկացումների աճի դինամիկան 2014-2015 թվականներին անհամեմատ կնվազի: Ընդհանուր առմամբ, 2013-2015 թվականներին պաշտպանությանը, անվտանգությանը և իրավապահ մարմիններին կհատկացվի ՌԴ պետբյուջեի 32-33 տոկոսը:
Առաջիկա երեք տարիներին կաճեն նաև զինծառայողների համար նախատեսված սոցիալական ծախսերը:

ՌԴ զինված ուժերի բարձրագույն հրամկազմի հետ հանդիպման ժամանակ Ռուսաստանի նախագահ Վլադիմիր Պուտինը հայտարարել է, որ աշխարհում լարվածության մեծացումը պարտադրում է կատարելագործել Ռուսաստանի ազգային անվտանգության ռազմավարությունը: Նրա կարծիքով, անհրաժեշտ է հաշվի առնել ոչ միայն անմիջականորեն ՌԴ սահմանների մոտ, այլև աշխարհի այլ տարածաշրջաններում, ամենից առաջ՝ Մերձավոր Արևելքում, Հյուսիսային Աֆրիկայի «անկայունության առանցքում» ու աֆղանական ուղղությունում տեղի ունեցող իրավիճակի փոփոխությունները և Ռուսաստանի հուսալի պաշտպանությունը շարունակում է մնալ թիվ մեկ առաջնահերթությունը:

Դամասկոսում ծանր մարտերը շարունակվել են ողջ գիշեր և երկու կողմերն էլ մեծաթիվ զոհեր ունեն, սակայն զոհերի հիմնական մասը խաղաղ բնակիչներ են: Զինված ընդիմությունը պնդում է, որ կառավարական ուժերը մայրաքաղաքում օգտագործում են տանկեր և հրետանի, և որ դեպի Դամասկոս են շարժվում նորանոր տանկային շարասյուներ: