ԵՌՕՐՅԱ ՀԱՎԱՔ

Սպառազինությունն ու ռազմական տեխնիկան ամառային շահագործման ռեժիմի նախապատրաստելու պլանի համաձայն գեներալ–մայոր Տիգրան Փարվանյանի հրամանատարությամբ գործող զորամիավորման ենթակա զորամասերից մեկի հենքի վրա անցկացվեց եռօրյա հավաք: Մասնակցեցին զորամիավորման ենթակա զորամասերի հրամանատարների՝ սպառազինության և նյութատեխնիկական ապահովման գծով տեղակալներն ու տեխնիկական ծառայությունների պետերը: Հավաքի նպատակը մասնակիցներին սպառազինության և ռազմական տեխնիկայի սպասարկման պլանավորման և իրականացման կանոնակարգին մեկ անգամ ևս ծանոթացնելն էր, սպառազինության և ռազմական տեխնիկայի ամառային շահագործման ռեժիմի փոխադրման աշխատանքների հերթականությունը ցուցադրելը, ինչպես նաև մշակվող փաստաթղթերի լրացման տիպային կարգը պարզաբանելը:

Տեսական ու գործնական պարապմունքների ընթացքում դասավանդվեցին սպառազինության և զինամթերքի սպասարկման և կազմաքանդման, ինչպես անեւ նորոգման, հավաքման ժամանակ զինծառայողին ներկայացվող անվտանգության պահանջները, ամառային պայմաններում ավտոմոբիլային տեխնիկայի, հրթիռահրետանային  սպառազինության շահագործման առանձնահատկությունները, ռազմատեխնիկական ունեցվածքի ապահովման կազմակերպման ճիշտ եղանակները, և այլն: Ստուգարքների միջոցով հավաքի մասնակիցները ցուցադրեցին իրենց ձեռք բերած գիտելիքները:

Հավաքը եզրափակվեց ցուցադրական պարապմունքով, որի ժամանակ բացազատվեցին տարբեր ուսումնական կետեր, արծարծվեցին տարբեր թեմաներ՝ զրահատանկային սպառազինության, ավտոմոբիլային տեխնիկայի ամառային շահագործման ռեժիմին անցնելու առանձնահատկությունները, հրթիռահրետանային սպառազինության միջոցների և զինամթերքի սպասարկման կարգը, վառելիքաքսուքային նյութերի օգտագործման եղանակները, անվտանգության կանոնների պահպանումը և այլն:

ՎԱՉԵ ՄԿՐՏՉՅԱՆ

1-ին զորամիավորման թղթակցական կետ