Հնդկաստանի Պաշտպանության հետազոտությունների և զարգացման կազմակերպությունը (ՊՀԶԿ) վերջապես սկսել է անօդաչու մարտական օդանավերի արտադրման աշխատանքները: Ծրագրի հիմնական նպատակն է Հնդկաստանի ռազմաօդային ուժերի համար մշակել մարտական անօդաչու օդանավեր, որոնք զինված կլինեն լազերային նշանառությամբ հրթիռներով:

Սանկտ Պետերբուրգի «Ալմազ» նավաշինական ընկերությունը ջրարկել է Վիետնամի ռազմածովային ուժերի համար կառուցվող երրորդ պահականավը: Առաջին երկուսն արդեն վիետնամական զինված ուժերի կազմում են, ընդհանուր առմամբ պայմանագրով պետք է մատակարարվի 4 նավ: Տվյալ դասի նավերն ունեն 375 տոննա ջրատարողություն, կարող են շարժվել մինչև 30 հանգույց արագությամբ, նավարկության հեռավորությունը 2,2 հազար մղոն է: Սպառազինված են 30 մմ-անոց ԱԿ-306 հրետանային կայանքով, 76,2 մմ-անոց ԱԿ-176Մ հրետանային կայանքով, ԻԳԼԱ-1Մ հրթիռների արձակման 16 կայաններով և 14,5 մմ-անոց երկու գնդացրով:

Թուրքիայի պաշտպանության նախարարությունը ամերիկյան Sikorski ընկերության արտադրած 109 հատ T-70 ուղղաթիռ գնելու որոշում է կայացրել: Գործարքը կարժենա 3,5 միլիարդ դոլար: Պայմանագիրը կնախատեսի նաև առաջիկա 10 տարիներին ևս 500 ուղղաթիռի մատակարարում: Ամերիկյան ուղղաթիռների արտադրությանը կմասնակցի նաև թուրքական TUCAS ընկերությունը, որը որոշ պահեստամասեր կարտադրի: T-70-ը հաղթել է մրցույթում, որին մասնակցում էր նաև իտալական Agusta Westland ընկերությունը: Վերջինս թուրք զինվորականներին ներկայացրել էր TUHP149 ուղղաթիռը:

Ամերիկյան բանակը տարբեր ընկերությունների հարցում է արել 60 000 հատ HMMWV զրահամեքենաների արդիականացման հնարավորության վերաբերյալ: Յուրաքանչյուր մեքենայի վրա կատարվող աշխատանքները գնահատվում են 180 000 դոլար, ամբողջական փաթեթը` 10,8 միլիարդ դոլար: Արդիականացման շրջանակներում նախատեսվում է ուժեղացնել զրահապատումը:

Ամերիկյան Lockheed Martin ընկերությունում սկսվել են անօդաչու թռչող ապարատների համար նախատեսված Tracer նոր ռադարների փորձարկումները: Նոր ռադարը կարող է հայտնաբերել անտառային ծածկույթի տակ թաքնված հակառակորդի թիրախները: Նման ռադարներ սկսել են մշակել նախկին Հարավսլավիայում ՆԱՏՕ-ի իրականացրած ռազմական օպերացիայից հետո, երբ պարզ դարձավ, որ ռազմական տեխնիկայի զգալի մասը սերբերը թաքցրել են անտառներում կամ համապատասխան քողարկող ծածկոցների տակ:

ԱՄՆ ծովային հետևակի` մարտական գործողությունների վարման լաբորատորիան հեռակառավարվող բեռնատարների նախագծման աշխատանքներ է իրականացնում: Դրանք կկիրառվեն զինամթերքի, սննդի և այլ տեսակի բեռների տեղափոխման համար: Նման մեքենաներ կստեղծվեն առնվազն երկու տարբերակով, այդ թվում 7 տոննա բեռնատարողությամբ: Առաջին փորձարկումներն արդեն նշանակված են այս տարվա մայիսին:

Նախագահ Սերժ Սարգսյանը Սահմանապահի օրվա՝ ապրիլի 26-ի նախօրեին այցելել է մայրաքաղաքի Դավիթաշեն համայնքում գտնվող ՀՀ կառավարությանն առընթեր ազգային անվտանգության ծառայության սահմանապահ զորքերի նորակառույց համալիր:
Հանրապետության ղեկավարը շրջել է համալիրում, ծանոթացել նորակառույցի պայմաններին: Համալիրի շինարարական, բարեկարգման աշխատանքներն ավարտված են, և այն պատրաստ է շահագործման: Բոլոր շենքերը և շինությունները կառուցված են շինարարական ժամանակակից նորմերին համապատասխան: