ՀԱՄԱԽՄԲՎԵՆՔ ԳԼԽԱՎՈՐ ՆՊԱՏԱԿԻ ՇՈՒՐՋ…

Գնդապետ Սուրեն Սուրենյանը զինվորական ուղին սկսել է Արցախյան ազատամարտի ժամանակ, երբ տասնյոթ տարեկան էր: Հայրենի հողը կամավոր  տղերքի պաշտպանության կարիքն ուներ, որոնցից շատերը  հետագայում դառնալու էին նոր կազմավորված հայկական բանակի առաջին սպաները: Գնդապետ Սուրեն Սուրենյանը ծնվել է Արցախի Խաչեն գյուղում:

Սուրեն Սուրենյանն ուսանել է Արցախի պետական համալսարանում՝ ռադիոտեխնիկա եւ կապ մասնագիտությամբ, ավարտել է ՌԴ ԶՈՒ համազորային ակադեմիան: Ծառայել է սահմանամերձ տարբեր հատվածներում, զբաղեցրել մի շարք պաշտոններ:

Գնդապետ Սուրեն Սուրենյանը  2020 թ. հուլիս ամսից ղեկավարում  է ՀՀ ՊՆ զորամասերից մեկը:

Մասնակցել է 44-օրյա պատերազմին: Պատերազմում զորամասի ստորաբաժանումները ներգրավված են եղել ռազմական կարևոր գործողություններում, մարտնչելով ռազմաճակատի տարբեր հատվածներում:

-Զորամասի սպաներն ընդգծված հարգանքով են խոսում հրամանատաի մասին: Գնդապետ Սուրենյանը հերոսի վառ օրինակ է, եւ նրա հետ  միշտ պատրաստ են հաղթահարելու դժվարությունները: Իր կյանքի լավագույն տարիները բանակին նվիրած սպային բնորոշ գծերից են խիզախությունն ու անկոտրում կամքը,- մեզ հետ զրույցում ասաց փոխգնդապետ Նվեր Ներսիսյանը:

-44-օրյա պատերազմը փորձություն էր եւ անհավասար կռիվ, որի միջով մեր զինվորն ու սպան պատվով անցան: Ամեն բան լավ կլինի, եթե համախմբվենք եւ ուժերը կենտրոնացնենք մեկ գլխավոր նպատակի՝ Հայրենիքի անվտանգության համար,- ասում է փորձառու զինվորականը:

Զորամասի հրամանատար, գնդապետ Սուրեն Սուրենյանի աշխատասենյակի պատին ՀՀ ազգային հերոսների լուսանկարներն են: Ինքն էլ նույն ոգով ծառայել ու մարտնչել է հայոց սահմանների պաշտպանության համար: Բազմաթիվ խրախուսանքների արժանացած հրամանատարը պարգեւատրվել է ԼՂՀ եւ ՀՀ «Մարտական ծառայության» մեդալներով, ինչպես նաեւ ՀՀ  «Մարտական խաչ»  2-րդ աստիճանի շքանշանով:

ԱՆՆԱ ՍԱՀԱԿՅԱՆ