Նորություններ
ՌԴ նախագահ Վլադիմիր Պուտինի հրամանագրով Ելենա Կոզլովան, որ վերջին մեկ տարում ղեկավարում էր պաշտպանության նախարարության ֆինանսական վերահսկիչ տեսչությունը, իսկ մինչ այդ ՌԴ հարկային դաշնային ծառայության պետի տեղակալն էր, նշանակվել է պաշտպանության նախարարի տեղակալ:
Կոզլովան ծնվել է 1965 թվականին, ավարտել Լենինգրադի Էնգելսի անվան խորհրդային առևտրի ինստիտուտը, 1993 թվականից աշխատել հարկային մարմիններում:
Սանկտ-Պետերբուրգի Օրենսդիր ժողովի մի խումբ պատգամավորներ, որոնք ներկայացնում են «Միասնական Ռուսաստան» շարժումը, դիմել են ՌԴ նախագահ Վլադիմիր Պուտինին՝ խնդրելով «Ավրորա» հածանավին վերադարձնել երկրի ռազմածովային նավատորմի թիվ մեկ նավի կարգավիճակը:
«Ավրորան», որը 1956 թվականից համարվում է Կենտրոնական ռազմածովային թանգարանի յոթ մասնաճյուղերից մեկը, կարող է զրկվել պատմական հուշարձանի կարգավիճակից և վերածվել զվարճանքի վայրի:
Զինվորական բժիշկ, մայոր Տոպոլսկին, որը կասկածվում է անչափահասների նկատմամբ սեռական բնույթի բազմաթիվ գործողություններ կատարելու համար, ձերբակալվել է ծառայության վայրում:
Աֆղանական պատերազմի մասնակիցներին միավորող հասարակական կազմակերպությունների «Ղազախստանի վետերաններ» ասոցիացիան հանդես է եկել հայտարարությամբ, որով իր մտահգությունն է հայտնում երկրի սահմանապահ զորքերում տիրող բարոյահոգեբանական անառողջ մթնոլորտի ու կարգապահական ցածր մակարդակի համար, որը, նախկին զինծառայողների կարծիքով, արդեն վտանգել է Ղազախստանի Հանրապետության սահմանների պաշտպանվածությունն ու երկրի անվտանգությունը, ինչպես նաև սպառնում է երկրի ներքին կայունությանը:
Չեչնիայում տեղակայված զորամասերից մեկի ֆինանսական ծառայության պետը, զորամասի հաշվապահը և հարկային դաշնային ծառայության միջշրջանային տեսչության արտագնա ստուգումների բաժնի ավագ պետական տեսուչը դատապարտվել են համապատասխանաբար 5, 8 և 9 տարի ազատազրկման` 2008-2009 թվականներին զորամասի գանձարկղից շուրջ 114 միլիոն ռուբլի գումար հափշտակելու համար:
Բելգրադի դատարանը երեկ Հարավսլավիայի ժողովրդական բանակի և սերբական ռազմականացված կազմավորումների 14 նախկին մարտիկի 1991-1995 թվականների ընթացքում խորվաթների դեմ գործած ռազմական հանցագործությունների համար դատապարտել է ընդհանուր առմամբ 128 տարվա ազատազրկման: Դատարանն ապացուցված է համարել նրանց մեղսակցությունը 1991 թվականի հոկտեմբեր-նոյեմբեր ամիսներին առնվազն 70 խորվաթ քաղաքացիական անձանց սպանություններին:
Հյուսիսատլանտյան դաշինքի խորհրդի արտահերթ նիստում կազմակերպության անդամ 28 պետությունների ներկայացուցիչներ դատապարտել են սիրիական ՀՕՊ ուժերի կողմից թուրքական հետախուզական ինքնաթիռի ոչնչացումը` միջադեպը որակելով որպես «անընդունելի» և Դամասկոսից պահանջել են միջոցներ ձեռնարկել նման միջադեպերի կրկնությունը բացառելու համար: