ՌԴ արտակարգ իրավիճակների նախարարությունը մոտ առաջիկայում ՌԴ բոլոր սուբյեկտներում, որոնց տարածքում կան զինապահեստներ, կկազմակերպի արտակարգ իրավիճակի առաջացման դեպքում համատեղ զորավարժություններ տարբեր ծառայությունների հետ` մշակելու իրավիճակին արձագանքելու, բնակչությանը տեղեկացնելու և տարհանելու համատեղ գործողությունները: Որոշումը վերջնականպես ընդունվել է վերջերս Օրենբուրգում գտնվող զինապահեստում տեղի ունեցած խոշոր պայթյունից հետո:

Ինքնաշեն ականապայթուցիկ նյութերի դեմ պայքարի գործում Հյուսիսատլանտյան դաշինքի մասնագետների պատվիրակությունն առաջին անգամ այցելել է Մոսկվա: Պատվիրակության ղեկավար, գնդապետ Ջոն Գրեյվսը հայտարարել է, որ ՆԱՏՕ-ն նկատի առնելով խնդրի սրությունը, մեծապես կարևորում է այս ասպարեզում համագործակցությունը Ռուսաստանի հետ:

ԱՊՀ անդամ պետությունների պաշտպանության նախարարների հերթական` 62-րդ նիստը հուլիսի 5-ին կկայանա Կալինինգրադում և հիմնականում նվիրված կլինի ռազմական կարիքների համար ՌԴ զինված ուժերի ուղեծրային խմբավորման համատեղ օգտագործման խնդիրներին:

Զինվորական քննիչներն առաջարկել են կարգապահական միջոցներ կիրառել Աֆղանստանում գտնվող ռազմակայանում Ղուրանն այրած ՆԱՏՕ-ի յոթ զինծառայողների նկատմամբ: Կատարվածի վերաբերյալ քննության նյութերն արդեն ուղարկվել են Պենտագոն: Միջադեպը լուրջ հուզումներ էր առաջացրել Աֆղանստանում ու հանգեցրել անգամ միջազգային խաղաղապահ ուժերի ռազմակայանների վրա իրականացված հարձակումների:

Վիետնամի պաշտպանության նախարարության պատվիրակությունն օրերս այցելել է Բելառուսիայում գտնվող 558-րդ ավիանորոգման գործարան և պատրաստակամություն է հայտնել գնելու այնտեղ գտնվող «Су-30К» բոլոր 18 ծանր ռմբակոծիչները: Հին ինքնաթիռների գինն այնքան գայթակղիչ է եղել, որ վիետնամական կողմը նահանջել է բացառապես նոր մարտական տեխնիկա գնելու իր անսասան սկզբունքից:

Երեկ ապստամբ գրոհայինների դեմ մարտերի ընթացքում Լաթաքիայում զոհվել է 20, իսկ Իդլիբում զինվորական պահակակետի պայթեցման հետևանքով` սիրիական բանակի ևս 5 զինծառայող: Միաժամանակ, կառավարական զորքերը գնդակոծել են Համայի գավառում գտնվող Քերնազ բնակավայրը:

Աֆղանստանի հարավում ոստիկանի համազգեստով երեք գրոհային կրակ է բացել ամերիկյան զինծառայողների խմբի վրա: Զոհվել է մեկ, վիրավորվել ութ զինվորական, իսկ գրոհայիններին հաջողվել է թաքնվել: