Արդի զարգացման ինստիտուտը (Институт современного развития – փորձագիտական կազմակերպություն, որի հոգաբարձուների խորհուրդը ղեկավարում է ՌԴ նախագահ Դմիտրի Մեդվեդևը) առաջարկներ է պատրաստել Հավաքական անվտանգության պայմանագրի կազմակերպության բարեփոխման վերաբերյալ: Առաջարկները նախատեսում են ՀԱՊԿ-ի և ՆԱՏՕ-ի մերձեցում:
Տվյալ թեմայով զեկույցը կներկայացվի առաջիկա օրերին Յարոսլավլում անցկացվելիք համաշխարհային քաղաքական ֆորումում, որտեղ ելույթ է ունենալու նաև Դմիտրի Մեդվեդևը:

Այդ մասին հայտարարել է զինված ուժերի թիկունքի զորքերի հրամանատար, գեներալ Էյալ Այզենբերգը` նշելով, որ այդ մռայլ սցենարի իրականացմանը մեծապես նպաստում է նաև թուրք-իսրայելական հարաբերությունների սրումը:
Գեներալը նաև չի բացառել մարտական գործողությունների ընթացքում զանգվածային ոչնչացման զենքի կիրառման հնարավորությունը և մտահոգություն հայտնել քաղաքացիական բնակչության պաշտպանության ասպարեզում Իսրայելի պատրաստվածության ցածր մակարդակի առնչությամբ:

Ենթադրվում է, որ միայն այս տարի ԱՄՆ-ում կվաճառվի 15 միլիոն ատրճանակ: Ամենամեծ սպահանջարկը վայելում են այսպես կոչված Ռեմբո-ատրճանակները՝ ամերիկյան մարտաֆիլմերի հերոսների հիմնական զենքը:
Հրազենի արտադրությամբ և վաճառքով զբաղվող տեխասյան Sturm Ruger ընկերության ղեկավարությունը հայտարարել է, որ Բարաք Օբամայի նախագահության ընթացքում ընկերության բաժնեթղթերի արժեքն աճել է 400%-ով, այն դեպքում, երբ համաշխարհային ֆինանսատնտեսական ճգնաժամի հետևանքով ոսկին թանկացել է ընդամենը 113%-ով:

Վրաստանի փոխարտգործնախարար Նինո Կալանդաձեն հերքել է Wikileaks-ի հրապարակած այն տեղեկությունը, որ Վրաստանը Ռուսաստանին թույլ է տվել իր օդային տարածքով ռազմական նշանակության բեռներ տեղափոխել Հայաստանի Հանրապետություն և հայտարարել է, որ Ռուսաստանը նման խնդրանքով վերջին անգամ պաշտոնական Թբիլիսիին դիմել է 2008 թվականի օգոստոսին և մերժում ստացել:

Մեծ Բրիտանիայի վարչապետ Դեվիդ Քեմերոնը «Լիբիայի բարեկամների համաժողովի» ավարտից անմիջապես հետո հայտարարել է, որ ելնելով «բարոյական պարտավորություններից», ամիսներ առաջ ինքն է պնդել աջակցել ապստամբներին, իսկ այժմ իր երկիրը պատրաստ է «հաջորդ ռազմական գործողությանը»:
Փորձագետների միահամուռ կարծիքով, խոսքը վերաբերում է Սիրային: Առավել ևս, որ վարչապետը հայտարարել է, թե Մեծ Բրիտանիան Դամասկոսի նկատմամբ ավելի խիստ միջոցների կիրառման կողմնակից է, սակայն դրա համար անհրաժեշտ է միջազգային լայն աջակցություն:

ԱՄՆ-ը և Թուրքիան պայմանավորվել են վերջինիս տարածքում ռադիոտեղորոշման համալիր տեղադրելու մասին: Նոր համալիրը կընդգրկվի ՆԱՏՕ-ի հակահրթիռային պաշտպանության եվրոպական համակարգում և կօգտագործվի Իրանի տարածքից հեռահար հրթիռների արձակման մասին վաղ ազդարարման նպատակով:
Նոր ռադարը տվյալներ կփոխանցի հակահրթիռային պաշտպանության Aegis համակարգով համալրված ամերիկյան հածանավերին, որոնց խնդիրն է բալիստիկ հրթիռների ոչնչացումը:

Ռուսաստանը ճանաչել է Լիբիայի անցումային ազգային խորհուրդը` որպես երկրի օրինական իշխանություն: Ռազմական փորձագետների կարծիքով, դա ճիշտ քայլ էր, որը թույլ կտա հեռանկարում վերականգնել երկու երկրների միջև ռազմատեխնիկական սերտ համագործակցությունը:
Լիբիայում ռազմական գործողություններ սկսվելուց հետո ՄԱԿ-ի Անվտանգության խորհրդի ընդունած սպառազինության մատակարարման արգելքի պատճառով Ռուսաստանը կորցրեց ավելի քան 4 միլիարդ դոլար: