ՈՒԺ ԵՎ ՀԱՎԱՏ՝ Ի ՍԱՐՍԱՓ ԹՇՆԱՄՈՒ

Մեր Տեր և Փրկիչ Հիսուս Քրիստոսի Սուրբ Ծննդյան և Աստվածահայտնության տոնն այս տարի նշանավորվեց նաև գնդապետ Ջալալ Հարությունյանի՝ Ջրօրհնյաց Խաչի կնքահայրությամբ:

Հիսուս Քրիստոսի Սուրբ Ծննդյան և Աստվածահայտնության տոնին Մայր Աթոռ Սուրբ Էջմիածնի Մայր տաճարում պատարագ մատուցվեց Ն.Ս.Օ.Տ.Տ. Գարեգին Բ Ծայրագույն Պատրիարք և Ամենայն Հայոց կաթողիկոսի առաջնորդությամբ:  Սուրբ պատարագի ավարտին Ամենայն Հայոց կաթողիկոսը կատարեց Ջրօրհնեքի արարողություն:  Ջրօրհնեքի Խաչի կնքահայրը, որ մեծագույն պատիվ է հայ քրիստոնյայի համար, ԼՂՀ պաշտպանության բանակի գնդապետ Ջալալ Հարությունյանն էր: Հրամանատար, որին այսպես են բնութագրում մարտական ընկերները, սպաներն ու շարքային զինվորները, նրան ճանաչողները. «Արցախյան բանակի դիմագիծ, ազնվության տիպար, հայկական բանակի լավագույն հրամանատար, հաղթած զինվորական, խիզախ, շիտակ, պարկեշտ, սկզբունքային մարդ»: Ջալալ Հարությունյանը երիտասարդ տարիքից զինվորագրվել է հայ ազատագրական պայքարին. 1992 թվականին նա ընդամենը 17 տարեկան էր:

Եվ պատահական չէ, որ 2015 թվականի դեկտեմբերի 5-ին ադրբեջանական քարոզչամեքենան, փորձելով բարձրացնել բարոյալքված զինուժի մարտական ոգին, տարածեց ստահոդ լուր, թե իրենք հրետակոծել են հայկական դիրքերը, և իբր հարվածների հետևանքով զոհվել է հայտնի հրամանատար գնդապետ Ջալալ Հարությունյանը: Այնինչ, ինչպես ասում են, ստի ոտքերը կարճ են: Եվ նրանք, ովքեր այդքան ուզում էին սպանված տեսնել Ջալալ Հարությունյանին, նույն օրը գնդապետին տեսան իր աշխատասենյակում ուղիղ եթերում լրագրողի հարցերին պատասխանելիս: Ցանկալին իրականության տեղ ներկայացնելու սովոր Ադրբեջանի ռազմական «ագիտպրոպը»  դարձավ ծաղրի առարկա:

Սիրելի հրամանատարի բազկի ուժը է՛լ ավելի կրկնապատկվեց ու զորացավ Սուրբ Խաչով՝ ի տես եւ ի սարսափ թշնամու:

Շ. ՍՏԵՓԱՆՅԱՆ