ՄԵՐ ՕՐԵՐՈՒՄ ԱՊՐՈՂԸ

Բոլորին է հայտնի՝ պատերազմը սպանում է, քանդում, ավերում, մանուկներին՝ որբ, կանանց՝ որբևայրի դարձնում, մարդկանց դժբախտացնում, երկիրը՝ ամայացնում…

Արցախյան պատերազմը ևս բացառություն  լինել չէր կարող: Դժբախտացան անթիվ, անհամար ընտանիքներ, զոհվեցին երազանքներով լեցուն բազմաթիվ երիտասարդներ, կիսատ մնացին շատ սերեր ու նվիրական նպատակներ:

Նրանցից մեկն էլ գորիսցի 37-ամյա Սպարտակ Բակունցն էր, որ ավարտել էր Երևանի ժողովրդական  տնտեսության պետական ինստիտուտը և աշխատում էր հայրենի քաղաքի գյուղվարչությունում՝ որպես տնտեսագետ: Նա բանաստեղծություններ էր գրում, բայց չէր թակում խմբագրությունների դռները` ասես սպասելով իր ժամանակին… Եվ եկավ նրա ժամանակը. նա զոհվեց հայրենիքի փրկության ճանապարհին. թշնամական արկը խլեց նվիրյալ հայորդու  կյանքը:

Եվ միայն հետո, նրա անմահացումից հետո նրա կրտսեր եղբայրը՝ Արմիկ Բակունցը, հավաքում Սպարտակի գրածները և տպագրում է առաջին ու վերջին ժողովածուն՝ «Հայացքների պայքար» խորագրով: Գիրքը դառնում է Սպարտակ Բակունցի անձեռակերտ հուշարձանը: Ժողովածուն բացվում է Համո Սահյանի խոսքով, որը բանաստեղծությունների  այդ ժողովածուն բնութագրելու համար այսպիսի սրտառուչ խոսքերի է դիմում. «Անհունորեն ցավալի ու հաճելի մի անակնկալ: Ցավալի է, որ հեղինակն այսօր չկա և չի տեսնելու իր գիրքը: Եվ հաճելի է, որ նոր բանաստեղծի նոր ձայն ես լսում, մտնում ես բանաստեղծական մի նոր աշխարհ…»:

Եվ Սպարտակ Բակունցը շարունակեց ապրել ոչ միայն իր հարազատների, ընկեր-բարեկամների, այլև պոեզիայի բազմահազար սիրահարների սրտերում:

ՈՒ թեև հիմա Սպարտակի  երկրային մահից  անցել է արդեն 23 տարի, բայց նա շատ շատերի համար շարունակում է ապրել՝  թակելով նորանոր սրտերի դռները:

Հունիսի 14-ին լրացավ Սպարտակ Բակունցի ծննդյան 60-ամյակը:

Հանուն հայրենյաց ընկած զինվորի տարեդարձը հանդիսավորությամբ նշվեց Գորիսի պետական դրամատիկական թատրոնի դահլիճում՝ քաղաքային իշխանությունների, հասարակայնության, մանկավարժական կոլեկտիվների և աշակերտության մասնակցությամբ, որի ընթացքում հավաքվածները մեկ անգամ ևս ընդհանուր գծերով հավուր պատշաճի ներկայացրին բանաստեղծ  ազատամարտիկի կյանքն ու գործունեությունը, լուսանկարներ նրա անցած ուղուց, հնչեցին ասմունք, երգ ու պար: Ներկաները առանձնահատուկ հուզմունքով ընդունեցին Սպարտակ Բակունցի որդու՝ Արտակի բեմ բարձրանալը որդու և դստեր հետ:

Ելույթ ունեցավ նաև բանաստեղծ Երվանդ Պետրոսյանը, որն ի դեպ Սպարտակ Բակունցի  «Հայացքների պայքար» գրքի խմբագիրն է:

Օրվա խորհրդի մասին խոսք ասաց նաև Գորիսի քաղաքապետ Վաչիկ Ադունցը, գնահատանքի ջերմ խոսքեր ասացին նաև բանաստեղծներ Լևոն Սահակյանը, Ապետնակ Գրիգորյանը, Կապանի դրամատիկ թատրոնի ռեժիսորը:

Բանաստեղծի 60-ամյակի հոբելյանական երեկոն  մեկ անգամ ևս հավաստեց, որ զոհված հերոսները   շարունակում են   ուժ և հավատ ներարկել  մեզ՝ ապրողներիս:

Հասմիկ  ՄԱԴՈՅԱՆ

մայոր