ՌԴ-ՈՒՄ ԿՈՐԾԱՆՎԵԼ Է СУ-24 ՌՄԲԱԿՈԾԻՉ
Ամուրի շրջանի Ուկրաինկա ռազմաբազայի օդանավակայանում այսօր առավոտյան կործանվել է СУ-24 ռազմաճակատային ռմբակոծիչ: Անձնակազմի երկու անդամները զոհվել են:
Ռմբակոծիչը վթարվել է վայրէջք կատարելիս: Այն դուրս է եկել թռիչքավայրէջքային երթուղու սահմաններից, շուռ է եկել և բոցավառվել է: Նախնական տվյալներով կոտրվել է առջևի շասսիի կանգնակը, ինչի պատճառով ինքնաթիռը հարվածել է գետնին և կործանվել:
Սակայն տեխնիկական անսարքության վարկածից բացի առաջ է քաշվել նաև օդաչուի և ղեկապետի սխալ գործողությունների վարկածը: ՌԴ ռազմաօդային ուժերի ներկայացուցիչ Վլադիմիր Դրիկը РИА Новости գործակալությանը հայտնել է, որ շասսիի կանգնակը կոտրվել է կոշտ վայրէջքի պատճառով:
Վթարի պատճառները քննելու համար ՌԴ զինվորական գլխավոր քննչական վարչությունում հարուցվել է քրեական գործ, ստեղծվել է հատուկ հանձնաժողով: Օդանավակայանում, ուր տեղի է ունեցել վթարը, ուսումնասիրվում են թռիչքների կազմակերպման հետ կապված բոլոր փաստաթղթերը:
Արդեն գտնվել են օդանավային ինքնագրիչները, այսպես կոչված «սև արկղերը», որոնք գրեթե չեն վնասվել: Ինքնաթիռի թռիչքի վերաբերյալ դրանցում գրանցված տվյալները կօգնեն վթարի պատճառների բացահայտմանը:
ՌԴ պաշտպանության նախարարը վթարից հետո կարգադրել է ստուգել երկրի ռազմաօդային ուժերում սպառազինության կանգնած բոլոր СУ-24 ռմբակոծիչների տեխնիկական վիճակը: Տարբեր տվյալներով դրանց թիվը 556-590 միավոր է:
Խորագիր՝ Նորություններ
