ՄԱՂԹԱՆՔ ՀԱՅ ԶԻՆՎՈՐԻՆ

Սիրելի՛ զինվոր,

Ես Մերի Աննա Քեսաբլյանն եմ: Ես  շատ հպարտ եմ, որ իմ հայրենիքը քեզ նման երիտասարդ ունի, որ իրեն պաշտպանում է: Ես չեմ կարողանում մտածել, թե դու ու քո ընտանիքը ինչ եք զգում իրարից հեռու: Սրտիս մեջ զգում եմ, որ պատերազմ չի լինելու, դու վերադառնալու ես տուն ու ընտանիքիդ հետ միասին ապրելու ես խաղաղ ու երջանիկ: Ամեն օր աղոթում եմ քո ու մյուս զինվորների համար: Շուտով տուն հասիր, քաջ զինվոր:

Սիրով` Մերի Քեսաբլյան

♦♦♦

Որտեղի՞ց սկսեմ ձեզ շնորհակալություն հայտնել, իմ հայ զինվորներ: Ձեր շնորհիվ մենք քայլում ենք դեպի խաղաղություն: Դուք ոչ միայն մեզ համար եք կռվում, բայց եւ մեր պապերի: Դուք մեզ հպարտ եք պահում եւ ոգեւորում եք, որ մեր հայրենիքը պաշտպանենք: Ես հնարավորություն չեմ ունեցել անձամբ ձեզ շնորհակալություն հայտնելու, բայց միշտ հիշեք, որ մենք ձեզ հետ ենք եւ ձեր կողքին:

♦♦♦

Սիրելի զինվոր, բարեւ, իմ անունը Էրիքա է:  Ես սովորում եմ 6-րդ դասարանում, 11 տարեկան եմ: Շատ եմ սիրում խաղալ բասկետբոլ, վոլեյբոլ: Ես գնում եմ Մարի Մանուկյան-Դեմիրճյան վարժարան: Շնորհակալ եմ, որ դու պաշտպանում ես մեր երկիրը, քո գործը շատ դժվար է: Դու շատ ուժեղ ես, որովհետեւ մեր երկրի համար կռվում ես: Խնդրում եմ, պատմի՛ր, թե ինչո՞վ ես զբաղվում ազատ ժամանակ: Այսքանը, սիրով՝ Էրիքա Ասատրյան:

♦♦♦

Սիրելի՛ հայ զինվոր,

Սրտիս խորքից շնորհակալություն եմ հայտնում քեզ եւ բոլոր հայ բանակին ձեր զոհողությունների համար: Ես որպես հայուհի հպարտ եմ հայրենիքովս: Գիտեմ, թե առանց ձեր քաջության դժվար կլիներ ունենալ մայր հայրենիք: Մեր ցավալի պատմությունն իմանալով՝ ավելի պարծանք եմ զգում ձեր ամենօրյա պայքարով, որպեսզի պահպանեք մեր հրաշալի երկիրը, հարուստ մշակույթը, հաճելի ավանդությունները եւ քրիստոնեական հավատքը: Աստված ձեզ ուժ ու կարողություն թող պարգեւի, որ շարունակեք այս կարեւոր գործը:

Ձեզ միշտ սիրող եւ մեծ հպարտությամբ` Ալին  Խաչերյան

♦♦♦

Հայ հերոս զինվորին

Դու մեր պարծանք, ազգի զինվոր,

Պաշտպան հողի հայրենական,

Մոր կաթի պես սուրբ, անարատ,

Դու պահեցիր հողը հայկյան:

Կրծքով ելար ոսոխի դեմ,

Պատնեշ դարձար մի անխորտակ,

Քո տաք սրտով պատանեկան

Անտեսեցիր վախ ու սարսափ:

Սուրբ Վարդանի ոգով օծված,

Հայի՛ որդի, կռվի ելար,

Ափսոս, հեղվեց արյունը տաք,

Ընկերներիդ` քաջ հարյուրակ:

Անեղծ պահած մեր հողն Արցախ,

Հիմա տունդ ես վերաշինում,

Որպես հերոս` Ազգի պարծանք,

Մեր սրտերն ես փառավորում:

ՎԻՈԼԵՏԱ ՂԱՐԱԳՈՒԼՅԱՆ

Նինոծմինդայի թիվ 1 հանրային դպրոցի

XII դասարան, գյուղ Մեծ Խանչալի