ՎԱՍՏԱԿԱԾ ՄՐՑԱՆԱԿԸ ՏԵՂ ՀԱՍԱՎ

Ապրիլի 27-ին Հայաստան է տեղափոխվել «Տանկային բիաթլոն-2014» միջազգային մրցույթում հայ տանկիստների նվաճած մրցանակը՝ Т-90С տանկը: Տանկն արտադրվել է 2015թ. դեկտեմբերին և կհամալրի ՀՀ զինված ուժերի սպառազինությունը:

-Մեր տանկիստնե՞րն են գալիս…

-Այո՛, նրանք են:

-Շատ ապրեն, մեր երկրի պատիվը բարձր պահեցին, ես իրանց ցավը տանեմ…

Պատառիկներ քաղաքացիների զրույցից

Դեռ թարմ են տպավորություններն այն օրերի, երբ ազգովի նշում էինք մեր տանկիստների հաղթանակը «Տանկային բիաթլոն-2014» միջազգային մրցույթում: Ոգևորությունն իրոք անսահման էր: Ամենուրեք նրանց մասին էին խոսում: Հատկապես հուզիչ էր օգոստոսյան այն  օրը, երբ «Զվարթնոց» օդանավակայանի ժամանման սրահում դիմավորում էին միջազգային մրցույթից ժամանող մեր տանկիստներին: Նրանք վերադառնում էին հարուստ ավարով՝ փոխչեմպիոնի կոչում, տարբեր պետությունների հիացական գնահատականներ, ահռելի փորձ և նորագույն Т-90С ռուսական տանկի հավաստագիր: Հարազատներ, զինվորականներ, պատահական մարդիկ, օդանավակայանի աշխատակիցներ, այլ չվերթներով իրենց հարազատներին դիմավորողներ, բոլորը շնորհավորում էին միմյանց՝ հպարտությամբ լցված մեր զինված ուժերի յուրաքանչյուր զինվորի ու սպայի նկատմամբ:

Նրանք արժանի էին հաղթանակի, արժանի էին նաև գովասանքի, անսպառ ուշադրության և գնահատանքի: Արժանի էին ոչ միայն նորագույն տեսակի տանկ շահելու, այլեւ առավելապես այն բանի համար, որ պարզ, միևնույն ժամանակ, հզոր ուղերձներ էին հղել իրենց հաղթանակով: Նախ՝ մեր թիմը միակն էր, որ համալրված էր պարտադիր ժամկետային զինծառայողներով, հիմնականում՝ դեռ քսան տարին չբոլորած երիտասարդ տղաներով: Նրանք մրցեցին առավելապես պայմանագրային զինծառայողներից կազմված մյուս թիմերի հետ, որոնք ներկայացնում էին ռազմական առումով շատ հզոր պետություններ: Եվ մերոնք հաղթեցին: Մերոնք ի ցույց դրեցին մեր բանակի հզորությունը, մարտական պատրաստության արդյունավետությունը: Տղաները ապացուցեցին, որ ռազմական ունակությունները մեր արյան մեջ են, և պատահական չէ հայկական բանակի՝ որպես տարածաշրջանի ուժեղագույն բանակներից մեկի համբավը: Թե՛ մասնակիցները, թե՛ ավելի քան քսան պետությունների դիտորդները փաստեցին այդ իրողությունը:

Այս հաղթանակը կարևոր էր մեր հասարակության համար: Շարքային քաղաքացին հաստատ իրեն ավելի վստահ և պաշտպանված կզգա, ավելի կվստահի զինված ուժերին, քանի որ իր երկրի զինվորը մարտականին մոտ իրադրությունում հավասարը հավասարի պես մրցում է ֆինանսական ահռելի հնարավորություններ ունեցող պետության զինվորականների հետ և հաղթում է:

Ինչևէ, Т-90С տանկն արդեն Հայաստանում է: Հնարավոր է, այն կիրառվի որպես ուսումնական բազա: Մասնագետները կկարողանան մանրամասն ուսումնասիրել տվյալ տեխնիկան, հայտնաբերել ուժեղ և թույլ կողմերը, մարտական հնարավորությունները և հակապայքարի համապատասխան մեթոդներ կիրառել: Թեև ապրիլի սկզբին ադրբեջանական կողմի սանձազերծած ռազմական ագրեսիայի ընթացքում մեր զինծառայողները կարողացան խոցել ադրբեջանական նմանատիպ շատ տանկեր, սակայն լրացուցիչ ուսումնասիրությունը կօգնի առավել արդյունավետ պայքարելու դրանց դեմ:

Ուրախ և հպարտ ենք ազգովի, բայց, միևնույն է, ոչինչ չի կարող թերևս համեմատվել այս տանկը նվաճած մեր տղաների ոգևորության հետ: Նրանց տքնաջան աշխատանքի արդյունքը պետք  է գալու հենց այս դժվարին պահին…

Արսեն ԱՂԵԿՅԱՆ