ՊԱՅՄԱՆԱԳՐԱՅԻՆ ԱՎԱԳ ՍԵՐԺԱՆՏՆԵՐԻ ՈՒՍՈՒՄՆԱԿԱՆ ԴԱՍԸՆԹԱՑ

ՀՀ ԶՈՒ ԳՇ պետի հրամանով 2014թ. փետրվարի 10-ին ՀՀ ՊՆ ենթասպաների դպրոցի բազայի վրա կսկսվի պայմանագրային ավագ սերժանտների ուսումնական 4-ամսյա դասընթացը: Այն իրականացվելու է «ՀՀ ԶՈՒ պայմանագրային ավագ սերժանտների (հրաձգային դասակի հրամանատարի տեղակալներ) դասընթացների չորսամսյա ծրագրի» պահանջների համաձայն: ՀՀ զինված ուժերում պայմանագրային սերժանտական համակարգի (հրաձգային ջոկի հրամանատար) հերթական հոսքի համալրման աշխատանքներն արդեն սկսվել են:

Դասընթացի մասնակիցներին 2014թ. հունվարի 13-ից 24-ը ընտրելու է ԶՈՒ ԳՇ պետի հրամանով ստեղծված հանձնաժողովը` առաջնորդվելով ՀՀ պաշտպանության նախարարի կողմից հաստատված կանոնակարգի դրույթներով: Հանձնաժողովի նախագահն է ՀՀ ԶՈՒ ՄՊՎ սերժանտների և կրտսեր մասնագետների պատրաստության բաժնի պետ, գնդապետ Գ.Հակոբյանը:

Դասընթացին կարող են մասնակցել`

– 1 տարի 6 ամսից ոչ պակաս ծառայած ժամկետային պարտադիր զինծառայողները,

– ծառայության մեջ գտնվող պայմանագրային զինծառայողները (դասընթացն ավարտելուց հետո, համաձայն գործող կարգի, նրանց հետ կկնքվեն նոր պայմանագրեր` համապատասխան սահմանային զորամասերում հետագա ծառայության նշանակվելու համար),

– 2008-2009թթ. պայմանագրային ծառայության ընդունված, նախկինում դասընթացներն ավարտած և ներկայումս զորամասերում ծառայող պայմանագրային զինծառայողները` վերապատրաստման նպատակով,

– անմիջականորեն պահեստազորից ընդունված և ներկայումս ՀՀ ՊՆ ուսումնական զորամասերում պայմանագրային հիմունքներով ծառայող ջոկերի հրամանատարները` վերապատրաստման նպատակով,

– ՀՀ զինված ուժերից զորացրված և մինչև 30 տարեկան զինապարտները: Նրանց հետ կկնքվի պայմանագրային զինվորական ծառայություն անցնելու մասին պայմանագիր` 6 ամիս ժամկետով` «Զինվորական ծառայություն անցնելու մասին» ՀՀ օրենքի 4-րդ հոդվածի 5-րդ մասի 3-րդ կետի համաձայն:

Բոլոր թեկնածուները պետք է լինեն ֆիզիկապես առողջ, բարոյապես կայուն և առնվազն միջնակարգ կրթությամբ:

Դասընթացներում ընդգրկվող անձնակազմի հետ կկնքվեն ուսումնառություն անցնելու մասին պայմանագրեր` 4 ամիս ժամկետով: