ՄՈՆԹԵԻ ՀԻՇԱՏԱԿԻՆ

2012թ նոյեմբերի 25-ին կլրանար հայ ժողովրդի լեգենդար հերոս, ՀՀ և Արցախի ազգային հերոս Մ. Մելքոնյանի 55 ամյակը…

Մարդաշատ էր նրա անունը կրող Արարատի մարզի Զորակի միջնակարգ դպրոցը:

Պատվավոր հյուրերի ներկայությունը բարձրացրել էր մանկավարժների և աշակերտների տրամադրությունը: Նրանք հպարտ էին, որ հյուրընկալել էին գեներալներ Արկադի Տեր-Թադևոսյանին, Աստվածատուր Պետրոսյանին, Ստեփան Միրզոյանին, Մ. Մելքոնյանի մարտական ընկերներ Հրայր Կարապետյանին, Հովսեփ Հակոբյանին, Մարտիրոս Ժամկոչյանին, Ֆրանսիայի «Հայ մարտիկների օժանդակության մարմին» կազմակերպության ներկայացուցիչներ պարոն Գրիգորին և պարոն Միքայելին: Ներկա էին Արարատի փոխմարզպետ Սամվել Ավետիսյանը և այլ պաշտոնատար անձինք, Արցախյան հերոսամարտի մասնակիցներ:

Ոգևորությունը թևածում էր դպրոցի դահլիճում: Աշակերտները իրենց սրտի ջերմ խոսքերն էին արտասանում, երգում, պարում:

Միջոցառումն անցավ բարձր մակարդակով: Աշակերտները ներկայացրին Մոնթեի անցած հերոսական ուղին, նրա անմնացորդ նվիրումը իր ժողովրդին, հայրենիքը սիրելու հարազատ հողը պաշտպանելու նրա պատգամները:

Հուզմունքը և ուրախությունը միախառնվել էին: Լեփ-լեցուն դահլիճը թնդում էր ծափահարություններից:

Միջոցառումը մեկ անգամ ևս ապացուցեց, որ դժվար է հաղթել Մոնթե Մելքոնյանի նման հերոսներ ծնող ժողովրդին:

Փառք քեզ, քաջ Մոնթե,

Փառք քեզ հավիտյան…