ԱՆԱԿՆԿԱԼ՝ ԶԻՆՎՈՐԱԿԱՆ ՈՃՈՎ

Ամեն զինվոր էլ, հատկապես ծառայության վերջին օրերին, մտովի արդեն պատկերացնում է իրեն զորացրվելիս:

Զինվորներից շատերը հարազատներից գաղտնի են պահում զորացրման օրը, որ տնեցիներին հաճելի անակնկալ մատուցեն, հազար ու մի սցենարներ են մշակում՝ կախված իրենց երեւակայության սահմաններից ու հնարավորություններից: Ու շքեղ ծաղկեփնջով հայտնվում են, ասենք, քրոջ հարսանիքին կամ մայրերի աշխատավայրում, կամ  իրենց տան առաջ, անպայման դռան դիտանցքը փակելով, որ մի քիչ էլ «ինտրիգ» հաղորդեն:

Օրերս զորացրված տղաներից մեկը պատմեց, որ ինքն էլ տնեցիներին իր զորացրման օրը չէր ասել և ինքն էր  «անակնկալի» հանդիպել՝ տնեցիները երկու օրով գնացել էին  Վանաձոր՝ բարեկամներից մեկի որդու զորացրման խնջույքին մասնակցելու:

Զորացրված մի զինվորի քույր էլ պատմեց հետևյալը. «Եղբայրս զորացրվել էր, բայց մեզ չէր տեղեկացրել։ Հարևանի աղջկա հարսանիքն էր։ Հարսանքավորները եկել էին ու բակում ուրախ-զվարթ պարում էին։ Այդ պահին եղբայրս տաքսիից իջնում է ու խառնվելով նրանց՝ սկսում է պարել։ Մայրս հիանալով զինվորի պարով, հարսանքավորներից մեկին դիմելով, ասում է. «Ինչքան նման է որդուս զինվորը: Հենց տղաս վերադառնա ծառայությունից, պատմելու եմ, որ հարսանիքին իր նմանակին եմ տեսել…»:

ԱԼԻՍ ԱԼԱՎԵՐԴՅԱՆ

Հ.Գ. Կարծում ենք՝ զորացրված զինվորներից շատերը զորացրման իրենց գեղեցիկ ու ինքնատիպ պատմությունները կունենան։ «Հայ զինվորը» սիրով իր էջերը կտրամադրի նման հիշարժան դրվագներին։