ՀԱՐԳԱՆՔԻ ՏՈՒՐՔ՝ ՄՈՎՍԵՍ ԳՈՐԳԻՍՅԱՆԻ ՀԻՇԱՏԱԿԻՆ

Հայաստանի անկախության դրոշակակիր, Հայաստանի Հանրապետության Ազգային հերոս Մովսես Գորգիսյանը դեկտեմբերի 3-ին կդառնար 50 տարեկան:

Այդ կապակցությամբ ՀՀ պաշտպանության նախարար Սեյրան Օհանյանը, զինված ուժերի ղեկավար կազմը, Երեւանի քաղաքապետ Տարոն Մարգարյանը, Մովսես Գորգիսյանի ընտանիքի անդամները, զինակից ընկերները այցելեցին Ծիծեռնակաբերդ` հարգանքի տուրք մատուցելու այդ խորհրդանշական վայրում հանգչող հերոսի հիշատակին: Ներկաները ծաղկեպսակ եւ ծաղիկներ դրեցին Գորգիսյանի շիրիմին եւ Հայոց ցեղասպանության զոհերի հիշատակը հավերժացնող հուշակոթողին:

Մովսես Գորգիսյանն առաջինն էր, որ 1988թ. մայիսի 28-ին Երևանի Ազատության հրապարակում վեր պարզեց Հայոց Եռագույնը և կոչ արեց բոլորին վարվել նույն կերպ: «Դրոշ ծածանելը Արցախյան ազատամարտի հաղթանակի առաջին գրավականներից մեկն էր,-շեշտեց հերոսի ընկեր, «Մովսես Գորգիսյան» հիմնադրամի նախագահ Սամվել Թադևոսյանը եւ ավելացրեց,- նա իր վրա վերցրեց պատասխանատվությունը` ծածանելու եռագույնը, այն դեպքում, երբ նրան կարող էին գնդակահարել»: Մովսես Գորգիսյանի դուստր Գոհար Գորգիսյանը նշեց, որ իր հայրը եռագույնը բարձրացրեց՝ ամբողջ ժողովրդի պատասխանատվությունը վերցնելով իր վրա. «Ես չեմ նայում նրան որպես իմ հորը. նա ժողովրդինն է: Մենք այսօր ունենք հերոսների կարիք: Գնահատելով պատմությունը՝ մենք մեզ ենք գնահատում»: Գոհարն ունի երեք երեխա և ուզում է, որ «նրանք իրենց հողի վրա քայլեն տիրոջ իրավունքով»:

Ընկերոջ բնորոշմամբ՝ Մովսես Գորգիսյանը կրակոտ, ընդվզող անհատ էր, նա ապացուցեց, որ ավելի հզոր ու պատվելի բան կա այս աշխարհում, քան ստրկաբար ապրելը. «Նա դեմ կանգնեց հրեշին: Կարճ ժամանակահատվածում դարձավ քաղաքական խոշոր գործիչ, մեր մտքերի և սրտերի առաջնորդը: Նրա հայրենասիրությունը, կրակոտ խոսքերը, ընկերասիրությունը վարակիչ էին: Շատ բան ենք սովորել նրանից: Պատահական չէ, որ Մովսեսը առաջիններից մեկը ձեռքը վերցրեց զենքը և Երասխավանում կանգնեց թշնամու դեմ»: Հենց այնտեղ էլ Մովսես Գորգիսյանը զոհվեց, 1990 թ. հունվարի 19-ին:

«Մովսեսը զորեղ դերակատարում ունեցավ ազատագրական պայքարում. նա մեծացավ մեր ժողովրդի աչքի առջեւ: Ժողովուրդը սիրեց նրան, հարգեց եւ վստահեց, քանի որ հասկացավ՝ Մովսեսի խոսքն ու գործը ներդաշնակ են»,- ասաց Մովսես Գորգիսյանի կինը՝ Ռուզաննա Գորգիսյանը:

Մովսես Գորգիսյանի մարտական ընկերներն ու հարազատները, պաշտպանության նախարարը, կրթության ու գիտության նախարարը, զինված ուժերի ղեկավար կազմը, Ազգային ժողովի պատգամավորներ, քաղաքացիական հասարակության ներկայացուցիչներ այնուհետեւ մասնակցեցին «Առնո Բաբաջանյան» համերգասրահում կազմակերպված հուշ-ցերեկույթին:

«Ծնունդդ շնորահավոր, Մովսե՛ս: Դու միշտ մեզ հետ ես,- իր շնորհավորանքը այս խոսքով սկսեց Սեյրան Օհանյանը:- Մովսես Գորգիսյանը գաղափարի մարտիկ էր, սակայն նա ոչ միայն գաղափարներ տարածեց, այլ նաեւ սկսեց դրանք կյանքի կոչել: Մովսես Գորգիսյանն առաջիններից էր, որ առաջ քաշեց կանոնավոր բանակ ստեղծելու գաղափարը»: Սեյրան Օհանյանն արձանագրեց` հպարտորեն կարելի է ասել, որ այսօր Գորգիսյանի խոսքը գործ է դարձել, նրա գաղափարները ոչ միայն նրա հարազատների, այլեւ մեր հայոց բանակի կայացման հիմքում են. «Այսօր Մովսեսի գաղափարները պաշտպանում եւ իրագործում է հայոց բանակի զինվորը:

Ազգային հերոս Մովսես Գորգիսյանի հիշատակին նվիրված այս միջոցառման մասնակիցների առջեւ ելույթ ունենալով` որպես պաշտպանության նախարար վստահեցնում եմ, որ մեր բանակը կատարում եւ ցանկացած իրավիճակում պատվով է կատարելու իր առջեւ դրված խնդիրները եւ անառիկ է պահելու մեր պետության սահմանները»:

Մովսես Գորգիսյանի կինը՝ Ռուզաննա Գորգիսյանը, նշեց, որ Մովսեսը հանդես եկավ որպես ազատատենչ հայի մարմնացում. «Նա մարմնավորում է մեր պատմության գլխավոր էջերից մեկը: Ես Մովսեսի փառաբանումը ուզում եմ կիսել մեր բոլոր մյուս քաջ նահատակների հետ, իմ երկրի հպարտություն բանակի հետ: Հայոց պետականության համար պայքարին մասնակցած մեր հայորդիները Մովսեսի կերպարի մեջ տեսնում են իրենց կենսագրությունը: Մեր՝ զինված ուժերի զորամասեր կատարած այցերից շատ տպավորված եմ եւ վստահ եմ` ինչ պատերազմ էլ լինի, մենք հաղթելու ենք»:

Միջոցառման ընթացքում Սեյրան Օհանյանը «Անկախության բանակ» հասարակական կազմակերպության մի խումբ անդամների պարգեւատրեց պաշտպանության նախարարության գերատեսչական մեդալներով:

Միջոցառումը շարունակվեց Երգի պետական թատրոնի երգչախմբի եւ ՀՀ ՊՆ «Զորական» համույթի ելույթներով, ասմունքով, ցուցադրվեց Մովսես Գորգիսյանի կյանքի ու գործունեության վերաբերյալ ՊՆ տեղեկատվության եւ հասարակայնության հետ կապերի վարչության պատրաստած ֆիլմը:

ՇՈՒՇԱՆ ՍՏԵՓԱՆՅԱՆ
Լուս.` ԱՐԵԳ ՎԱՐԴԱՆՅԱՆԻ