Հայերեն | На русском | In English
Ամառային զորակոչի ավարտին մնացին հաշված օրեր:
Հայկ Աբրահամյանը զորակոչվում է «Ես եմ» ծրագրով: Հայկը Շիրակի մարզի Մարալիկ համայնքից է:
-Անցյալ տարի զորակոչի ժամանակ ծանոթներ ունեի, որոնք գնացին բանակ «Ես եմ» ծրագրով: Հետաքրքրվեցի ու պարզեցի, որ այդ ծրագիրը բազմաթիվ առավելություններ ունի: Գրեթե չես կտրվում ընտանիքից, ծառայավարձ ես ստանում:
-Մինչ համաձայնելը, Գրիգորյանի՝ մեր զինկոմի հետ խոսեցի: Նա փարատեց բոլոր մտահոգություններս: Մանավանդ՝ Հայկն էլ շատ ոգևորված էր. նա Մարալիկի միակ զինվորն է, որ երեք տարի պիտի ծառայի,- պատմում է զինվորի հայրը, հետո ավելացնում հպարտությամբ.
-Երեք որդիներս հերթով պիտի զինվոր դառնան: Իմ խորհուրդը մեկն է՝ զգոն լինեն սահմանին:
Հայկին բանակ ճանապարհելու են եկել հարազատները, մտերիմներն ու ընկերները: Բոլորը շրջապատել են հայրենիքի ապագա պաշտպանին: Լուսանկարվում են, գրկախառնվում, ոգևորում են նորաթուխ զինվորին: Մինչ զորահավաքակայան տանող ավտոբուսը կշարժվեր, Հայկը հասցրեց բոլորին ասել, որ «Ես եմ» ծրագրով է ծառայելու, հազար անգամ հպարտությամբ կրկնեց՝ երեք տարի…
-Ես երեք տարի եմ ծառայելու…
ՀԱՅԿ ՄԱԳՈՅԱՆ
