Արագածոտնի մարզի Մուղնի համայնքը աչքի չի ընկնում իր մեծությամբ, սակայն այստեղից են սերում բազում հայորդիներ, որոնք բարձր են պահում հայ զորականի պատիվը: Այս սրբազան գործում, անշուշտ, իր դերակատարությունն ունի նաեւ Մուղնիի Մեսրոպ արքեպիսկոպոսի անվան հիմնական դպրոցը: Կրթօջախը միշտ վառ է պահում Մեծ հայրենական պատերազմում, Արցախյան ազատամարտում եւ հրադադարի հաստատումից հետո զոհված իր հայորդիների հիշատակն ու պատիվը: Դպրոցի պատերին մեծ զորականների եւ ռազմարվեստին նվիրված պաստառներ են: Դպրոցի տնօրինության որոշմամբ, ստեղծվել են հերոսացած հայորդիներին նվիրված անկյուններ եւ դասասենյակներ: Զարմանալի չէ, որ դպրոցի շրջանավարտներից շատերն են դառնում կուրսանտներ, սպաներ կամ պարտադիր զինծառայության անցնելով՝ դառնում օրինակելի զինվոր, քանզի ռազմահայրենասիրական ոգին եւ ռազմարվեստի մասին գիտելիքները ստանում են դեռ դպրոցական տարիներից:

Ցավոք, դպրոցն ունի նաեւ հրադադարից հետո զոհված չորս հերոսներ, որոնցից մեկն էլ 2016-ի ապրիլյան մարտագործողությունների ժամանակ Ջրականի պաշտպանական շրջանում զոհված Հովհաննես Հարությունյանն է: Մայիսի 27-ին նա կդառնար 20 տարեկան:

Մայիսի 27-ին Մուղնիի Մեսրոպ արքեպիսկոպոսի անվան հիմնական դպրոցի դահլիճի պատվավոր հյուրերի շարքում հերոսածին մայրերն էին ու Արցախյան ազատամարտի մասնակիցները, եւ դպրոցականների կազմակերպած հերթական միջոցառումը՝ արիության դասը, նվիրված էր Հովհաննես Հարությունյանի անմար հիշատակին: Երեխաներն իրենց ռազմերգերով, ասմունքով եւ պարերով հուզեցին ներկաներին:

 Հովհաննես Հարությունյանի ընտանիքը «Վահագն» ռազմահայրենասիրական բարեգործական կազմակերպության կողմից պարգեւատրվեց «Հայկ նահապետ» արձանիկով: «Ղարաբաղյան պատերազմի վետերաններ» կազմակերպությունը Հովհաննեսի ծնողներին փոխանցեց կազմակերպության կողմից Հովհաննեսին հետմահու շնորհված «Հայրենիքի պաշտպանության համար» շքանշանը, իսկ դպրոցի տնօրենը, փոխտնօրենն ու զինղեկը հայրենանպաստ գործի համար արժանացան պատվոգրերի:

Այնուհետեւ միջոցառման մասնակիցներն այցելեցին Մուղնիի Սուրբ Գեւորգ եկեղեցու՝ հերոսներին նվիրված խաչքարի մոտ, խնկարկեցին նրանց հիշատակը:

Հ. ԿԻՍԵԲԼՅԱՆ