ՄԱՅԻՍՅԱՆ ՀԱՂԹԱՆԱԿՆԵՐԻ ՏՈՆ ԳՈՐԻՍՈՒՄ

Մայիսի 9-ին Մեծ հայրենականի եւ Արցախյան պատերազմի զոհերի հիշատակը հավերժացնող հուշահամալիրում տեղի ունեցավ միջոցառում` նվիրված Հայրենական մեծ պատերազմի հաղթանակի 72-րդ եւ Շուշիի ազատագրման 25-րդ տարեդարձներին:

Տոնական միջոցառմանը մասնակցում էին Գորիսի քաղաքապետ Վաչագան Ադունցը, զորամիավորման հրամանատարի տեղակալ, գնդապետ Ալեքսանդր Ցականյանը, զորամիավորման սպաներ, Գորիսի ԵԿՄ տարածքային  նախագահ, փոխգնդապետ Սուրեն Բաղդասարյանը, Մեծ հայրենականի վետերաններ, մինչեւ Բեռլին հասած 92-ամյա  Հովհաննես Դաջունցը, 91-ամյա Երեմ Ճաղարյանը, Արցախյան պատերազմի ազատամարտիկ–վետերաններ, մեծաթիվ գորիսեցիներ, հյուրեր, դպրոցականներ:

Մեծ հայրենականում եւ Արցախյան պատերազմում զոհված հայորդիների հիշատակին ջերմ եւ սրտառուչ խոսք ասաց Վաչագան Ադունցը՝ շնորհակալություն հայտնելով պատերազմների մասնակից վետերաններին, մայիսի 9-ը իրենց սխրանքներով կայացրած մարտիկներին:

Մայիսյան հաղթանակների առթիվ զորամիավորման բոլոր զինծառայողների անունից շնորհավորանքի խոսք ասաց 1-ին զորամիավորման հրամանատարի տեղակալ, գնդապետ Ալեքսանդր Ցականյանը:

Գնդապետ Ցականյանը հիշատակեց Մեծ հայրենականում հայորդի լեգենդար մարշալներին, հարյուրավոր գեներալներին, տասնյակ հազարավոր հրամանատարներին, սպաներին ու զինվորներին, որոնց անուրանալի սխրանքների շնորհիվ կերտվեց նաեւ ֆաշիզմի դեմ տարած հաղթանակը:

Մեր ժողովրդի կյանքում այն անուղղակի հաղթանակ էր նաեւ ակնհայտ ծառացած  թուրքական սպառնալիքի դեմ:

Գնդապետն անդրադարձավ նաեւ Շուշիի մարտերին, նրա 11 անմահ զոհերին:

Խաղաղ երկինք եւ ստեղծարար աշխատանք, առողջություն բարեմաղթելով պատերազմների մասնակից վետերաններին, գորիսեցիներին, ողջ հայ ժողովրդին՝ գնդապետը հավաստիացրեց, որ Հայոց բանակը մարտունակ է, աչալուրջ, պատրաստ է նոր ոտնձգության դեպքում թշնամուն վերջնական եւ ջախջախիչ հարված հասցնելու:

1-ին զորամիավորման ավագ սպա Վահրամ Հովհաննիսյանն ընթերցեց հրամանատար, գեներալ–մայոր Տիգրան Փարվանյանի շնորհավորական եւ շնորհակալական ուղերձը:

Այդուհետ  հրամանատարի կողմից  լավագույն զինծառայողներին գնդապետ Ցականյանը խրախուսեց  շնորհակալությամբ եւ պատվոգրերով:

Ելույթներ ունեցան նաեւ Գորիսի տարածքային վետերանների խորհրդի նախագահ Խ. Հարությունյանը, տարածքային պատանի երկրապահների միության նախագահ Արթուր Հովսեփյանը, զորամասի գրադարանի վարիչ Հերմինե Առուստամյանը:

Գորիսի ԵԿՄ տարածքային նախագահ, փոխգնդապետ Սուրեն Բաղդասարյանը հուշամեդալներ եւ պատվոգրեր հանձնեց պատանի երկրապահներին:

Տոնական միջոցառումը շարունակվեց քաղաքի Գուսան Աշոտի անվան մշակույթի կենտրոնի սաների համերգային կատարումներով, դրամատիկական թատրոնի ներկայացումով: