Ապագայի հստակ տեսլական ու նպատակ ունեն ռազմամարզական վարժարանում սովորող Անդրանիկ Ջավադյանը, Վիոլետա Ֆեոֆիլակտովան,  Կարապետ Դարբինյանը, Մարիամ Մանուկյանը, Վարդան Մանասյանը։ Բարձր առաջադիմությունն այստեղ այլընտրանք չունի, և նրանք քաջ գիտակցում են, որ պետք է ամեն օր ավելացնել գիտելիքների պաշարը և քայլ առ քայլ անցնել դեպի բարձունք տանող ճանապարհը։

Բարձր վարկանիշ ունեցող այս վարժարանում կրթական ծրագիրը հարուստ է, մրցունակ ու բազմաբովանդակ, հնարավորությունը դեպի զինվորական գործ՝ Հայրենիքի պաշտպանի պատվաբեր ծառայություն, լիարժեք ապահովված։

-Վարժարանում նորությունները բազմաթիվ են: Կրթական ծրագրերն ամեն տարի թարմացվում են, նորացվում, զուգահեռ ներդրվում են մոտիվացիոն նոր բաղադրիչներ սաներին ոգևորելու և նրանց առաջադիմությունը խթանելու համար։ Այդ նորություններից մեկն էլ 2024-ի հունվարից գործող կրթաթոշակներն են: Բացի այս, բարձր առաջադիմություն ունեցող սաները այսուհետ կխրախուսվեն նաև ազատ արձակումներով,- ներկայացնում է վարժարանի տնօրեն Ալեքսանդր Մանուչարյանը:

Հանրակրթական դասերին զուգահեռ ռազմական ու մարզական առարկաների խորացված ուսուցումը եղել ու շարունակում է մնալ այս կրթահամալիրի գրավչության կարևոր բաղադրիչը, որն էլ արդեն տարիներ շարունակ դպրոցական պատանիներին ուղղորդում է դեպի Մոնթե Մելքոնյանի անվան ռազմամարզական վարժարան: Ընդ որում, ոչ միայն տղաներին, այլ նաև աղջիկներին, որոնք հավասարապես կրթվում են, կոփվում և մեծ ոգևորությամբ խոսում այստեղ ուսանելու առավելությունների ու վարժարանի տված օգուտների մասին։

Վիոլետա Ֆիոֆիլակտովան այս տարի ավարտում է վարժարանը։ Գերազանց առաջադիմություն ունեցող սաներից է: Նա հաստատապես որոշել է կրթությունը շարունակել ռազմական ոլորտում։

-Ուսումս պարտադիր շարունակելու եմ ռազմական ասպարեզում,- ասում է նա:

-Արդեն երկրորդ տարին է՝ վարժարանում եմ, և ինձ համար մեծ պատիվ է այստեղ սովորելը: Սովորում եմ ջանասիրաբար,- ավագ ընկերուհուն է միանում Մարիամ Մանուկյանը:

Հանրակրթական ու զինվորական դասերին հաջորդում է ֆիզպատրաստությունը, իսկ ավելի ստույգ՝ մարզական խմբակների պարապմունքները։ Սամբո, ըմբշամարտ, բռնցքամարտ, լող և մի շարք այլ մարզաձևեր, որոնք կոփում ու ամրացնում են վարժարանի սաներին։

-Ռազմամարզական վարժարանում մարզիկ սաները միայն առողջ ապրելակերպով չեն սահմանափակվում: Պայմաններ են ստեղծված տարբեր մրցաշարերին մեր մասնակցության, պրոֆեսիոնալ մրցակիցների հետ մրցելու համար,- ասում է կուրսանտ Վարդան Մանասյանը:

Վարժարանում կարող են սովորել 10-րդ, 11-րդ և 12-րդ դասարանի աշակերտները։ Կրթահամալիրում ուսանող տղաների և աղջիկների համար դեպի մեծ կյանք մասնագիտական ընտրությունն ազատ է, և այստեղ շատերն իրենց հետագա ուղին որոշած են գալիս կամ հենց տեղում են որոշում դառնալ ապագա սպաներ:

ՀՈՎՀԱՆՆԵՍ ՊԱՌԱՇՅԱՆ