Հայերեն | На русском | In English
Իվան Անտոնյանը մշակութային միջոցառումների համակարգող է, «Ֆորտունա» հեռուստաընկերությամբ հեռարձակվող «Լոռու արվեստագետներ» ֆիլմաշարի հեղինակը, նաև խմբագրում է «Արվեստագետ» կրթամշակութային հանդեսը:
Նրա նկարահանած 30-ից ավելի ֆիլմերը, խմբագրած «Արվեստագետ» հանդեսը նվիրված են արվեստի, մշակույթի մարդկանց:
«Մշակույթի նվիրյալ Իվան Անտոնյանը աստվածահաճո գործ է անում. ճանաչված ու հայտնի մտավորականներին ներկայացնում է գալիք սերունդներին»՝ շնորհաշատ երիտասարդին այսպես է բնութագրում ժողովրդական արտիստ Թովմաս Պողոսյանը:
«Իվան Անտոնյանի հեղինակային «Լոռու արվեստագետներ» ֆիլմաշարը մի յուրատիպ մշակութային ու ազգանպաստ իրողություն է: …Մեր մշակույթի պահպանողներից մեկն էլ Իվան Անտոնյանն է, որը ստեղծեց ու եկող սերունդներին հանձնեց «Լոռու արվեստագետներ» ֆիլմաշարը…»՝ պաշտպանության նախարարի խորհրդական, գնդապետ Ռազմիկ Պետրոսյանի գնահատանքի խոսքն է Իվանի կատարած աշխատանքին:
Թերթում եմ «Արվեստագետ» հանդեսը, ամեն համարում հայ ազգի մեծերն են՝ Արտավազդ Փելեշյան, Տիգրան Մանսուրյան, Համո Սահյան, Գևորգ Ջահուկյան, Ռուբեն Մաթևոսյան, Հակոբ Ազիզյան, Վանդոս Ղարագյոզյան, Էդվարդ Խլղաթյան, Արկադի Տեր-Թադևոսյան… Ամսագրում անդրադարձ կա նաև զինվորականներին, հայրենիքը կյանքով ու զենքով պահող մեր նորօրյա քաջերին…
«Արվեստագետը» շուրջ հինգ տարվա կենսագրություն ունի: Ամսագրի վերջին համարներից մեկն էլ նվիրված է Հայաստանի ազգային հերոս Վազգեն Սարգսյանին՝ «Արձակագիր սպարապետը» վերտառությամբ, որտեղ հիմնականում սպարապետի մտավորական կերպարն է շեշտադրված, իսկ նրա մասին փոքրիկ պատմություններն ու հուշերը մի նոր երանգ են հաղորդում Վազգեն Սարգսյանի լուսավոր ու առինքնող կերպարին:
***
Իվան Անտոնյանը հաճախակի է այցելում դպրոցներ, զորամասեր, հայրենասիրական բանաստեղծություններ է ասմունքում:
-Արվեստն ունի կրթելու, դաստիարակելու, միավորելու, հոգեպես մաքրելու, դեպի կատարյալը մղելու հատկություն: Զինվորը հայրենիքն է պաշտպանում, արվեստի մարդն էլ՝ մեր հոգևոր սահմանները: Եթե կորցնենք մեր ազգայինը, կկորցնենք մեր ինքնությունը: Ուստի՝ զինվորի նվիրումով պետք է տեր կանգնենք մեր ազգային արժեքներին, մեր արմատներին,- ասում է Իվան Անտոնյանը:
ԱԼԻՍ ԱԼԱՎԵՐԴՅԱՆ
