Գնդապետ Արթուր Մկրտչյանը արդեն 28 տարի ծառայում է ՀՀ զինված ուժերում։ Ավարտել է Վ. Սարգսյանի անվան ռազմական ակադեմիան (այն ժամանակ՝ ինստիտուտ), գերազանցությամբ սովորել է նաև ՌԴ ռազմահրետանային ակադեմիայում: Ծառայողական տարիների մեծ մասն անցկացրել է մարտական հերթապահություն իրականացնող զորամասերում: Մարտական գործողությունների մասնակից է, «Մարտական խաչ» 1-ին աստիճանի շքանշանակիր։ Ներկայումս գնդապետը Վ. Սարգսյանի անվան ռազմական ակադեմիայի սպաների որակավորման կենտրոնի պետն է, զորքերում ձեռք բերած իր հարուստ փորձը ներդնում է ռազմական կրթության ոլորտում։ Իր օրինակով է ցույց տալիս, թե որքան կարևոր է ինքնակատարելագործման ձգտումը։ Վերջերս գնդապետ Մկրտչյանը մասնակցել է ատեստավորման քննություններին, բոլոր առարկաներից ստացել է «գերազանց» գնահատական։

Ռազմական սպորտի միջազգային խորհրդի միջոցառումների ծրագրի շրջանակում ՀՀ ԶՈՒ ներկայացուցիչները մասնակցել են «Վերելք՝ հանուն խաղաղության» արշավին։ 13 երկրների ավելի քան հինգ տասնյակ զինծառայողների շարքում Հայաստանի զինված ուժերի ներկայացուցիչները եզակիներից են, որ հաղթահարել են Եվրոպայի ամենաբարձր լեռնագագաթը՝ Էլբրուսը։

Էրիկ Հախվերդյանը Տավուշի մարզի սահմանամերձ Բերդավան գյուղից է: Նրա մանկությունը համընկավ պատերազմի, տնտեսական ճգնաժամի, ցրտի ու խավարի տարիների հետ: Բայց դժվարությունները ոչ թե բնակավայրը փոխելու, ապահով ու բարեկեցիկ ապրելու ցանկություն արթնացրին, այլ սեփական ծննդավայրը անվտանգ ու շեն դարձնելու միջոցների փնտրտուքի պատճառ դարձան: Որոնումները նրան տարան արտերկիր: Զինծառայությունն ավարտելուց հետո Էրիկ Հախվերդյանը 14 տարի ապրեց հայրենիքից հեռու և վերադարձավ մշտատև գյուղատնտեսության առաջադեմ փորձը հարազատ գյուղում ներդնելու հաստատ մտադրությամբ:

Տանկային զորամասում տեսական դասաժամ է: Ժամկետային զինվորներին ուսուցանում են ծանր զրահատեխնիկայի կառավարման ու կիրառման նրբությունները:

ՀՀ ՊՆ «Բաղրամյան» զորավարժարանում ընթանում են «Պատիվ ունեմ» ծրագրով Վազգեն Սարգսյանի անվան ռազմական ակադեմիայի ունկնդիրների եռամսյա վարժական հավաքները: Դրանց ավարտին տղաները կստանան «լեյտենանտի» զինվորական կոչում, կհամալրեն զինված ուժերի շարքերը՝ որպես ստորաբաժանման հրամանատարներ, բանիմաց ու կիրթ սպաներ:

Ավետիս Եգանյանը վանաձորցի է: Ավարտել է Երևանի ճարտարագիտական համալսարանը, ապա զորակոչվել է ժամկետային զինծառայության: Բանակից վերադարձել է «Բանակի գերազանցիկ» «Քաջարի մարտիկ» կրծքանշաններով, բազմաթիվ շնորհակալագրերով և պատվոգրերով:

Զինված ուժերում անցկացվում է զինծառայողների ատեստավորման գործընթացի հերթական փուլը: Զորավարժարաններից մեկում հետևեցինք ատեստավորվող խմբերից մեկի կրակային պատրաստության քննությանը: