Language:

  • Հայերեն
  • Русский
  • English

ԱՐԴՅՈՔ ՉԱՓԻՑ ԱՎԵԼԻ ԻՆՔՆԱՎՍՏԱՀ ՉԵ՞Ք



Թեստը մշակվել է 2008 թվականին` «Հոգեբանական թեստերի մշակման մոսկովյան լաբորատորիայում»: Որպես ինքնագնահատականի ստուգման հուսալի մեթոդիկա` արտոնագրված է GNU (General public License` ընդհանուր հանրային արտոնագիր) FDL-ի (Free documental license` ազատ փաստաթղթերի արտոնագիր) կողմից:

ՈՒՇԱԴՐՈՒԹՅՈՒՆ

1. Թեստը նախատեսված է ինքնաստուգման համար եւ նպատակ ունի նպաստելու միմիայն անհատի ինքնաբացահայտմանն ու ինքնաճանաչողությանը: Չի կարելի այն լրացնել մեկ ուրիշի հետ կամ, առավել եւս, ուրիշի փոխարեն, քանի որ նման դեպքերում ճիշտ արդյունք չի ստացվի:

2. Հիշեք, որ թեստի արդյունքները չեն կարող մեկնաբանվել միանշանակ:

Հաստատեք («այո՛») կամ ժխտեք («ո՛չ») հետևյալ պնդումները.

1. Վերջին մի քանի տարում ես առնվազն մեկ անգամ վարկ եմ վերցրել:

2. Վերջին մեկ տարում ես կարդացել եմ գոնե մեկ գիրք այն մասին, թե ինչպես է կարելի ինքնավստահ լինել:

3. Ես գիտեմ, որ մարդն իր ուղեղի հնարավորությունների առավելագույնը 5 տոկոսն է օգտագործում և չեմ կասկածում, որ այդպես է:

4. Իմ մտերիմներն այնքան ինքնավստահ չեն, որ կյանքում հասնեն իրենց ուզածին:

5. Որպես կանոն` ես կարողանում եմ թողնել գործունյա և իր ուժերին վստահ մարդու տպավորություն, ով գիտի, թե ինչ է ուզում:

6. Ես կարողանում եմ այլ մարդկանց վարքը ղեկավարել անգամ ձայնիս տոնայնությամբ:

7. Ես երբեք չեմ անհանգստացել նոր գիտելիք և հմտություն ձեռք բերելու համար, քանի որ վատագույն դեպքում կարող եմ գտնել մարդկանց, ովքեր ինձ ճիշտ խորհուրդ կտան:

8. Եթե իմ ինքնավստահությունն ինչ-ինչ պատճառներով նվազում է, ապա, միևնույնն է, ես ամեն ինչ անում եմ` նպատակիս հասնելու համար:

9. Եթե ցանկանամ, ինձ համար դժվար չի լինի մի երեկո անցկացնել որևէ համակրելի կնոջ (տղամարդու) հետ:

10. Ես երբեք կուչ չեմ գալիս, ընդհակառակը` միշտ փորձում եմ որքան հնարավոր է ձիգ կեցվածքով լինել:

11. Հարկ եղած դեպքում ես կարող եմ առանց կաշկանդվելու ցանկացած բան ասել ցանկացած մարդու երեսին:

12. Առնվազն շաբաթը մեկ անգամ ես կանգնում եմ հայելու դիմաց և փորձում իմ հիմնական ժեստերն ու արտահայտությունները:

ԱՐԴՅՈՒՆՔՆԵՐԻ ՄՇԱԿՈՒՄ

Ցանկացած «այո» պատասխան գնահատեք 1 միավոր, «ոչ»` 0 միավոր, և հաշվեք գումարը:

0-2 միավոր – Դուք ինքնավստահության պակաս ունեք և հնարավոր է, որ ինքներդ Ձեզ չեք վստահում: Սակայն դա դեռ վերջնական եզրակացություն չէ, քանի որ այս թեստը նախատեսված է միայն ինքնավստահության «ավելցուկի» բացահայտման համար, ուստի վերն առաջարկված համոզմունքները ինչ-որ չափով ծայրահեղացված են: Փորձեք հասկանալ, թե ինչն է, որ թույլ չի տալիս Ձեզ վստահել սեփական ուժերին:

3-6 միավոր – Դուք ինքնավստահ մարդ եք, բայց Ձեր ինքնավստահությունը ծայրահեղության հասնելու հակում ունի: Հաջողության հասնելու համար պարզապես գտեք Ձեր տեղն այս կյանքում, որտեղ առավելագույն օգուտ կտաք մարդկանց և կվայելեք շրջապատի հարգանքն ու սերը: Մի մոռացեք նաև մշտապես ինքնակրթվել. Ձեր գիտելիքներն այն հիմքը կլինեն, որը ոչ մի ֆինանսական ճգնաժամ չի կարող փլուզել:

7-12 միավոր – Կարելի է ասել, որ Դուք «թունավորված եք» ինքնավստահությամբ: Դուք այնքան եք ինքնավստահ, որ օրեցօր ավելի եք դժվարանալու շրջապատող աշխարհը գնահատել օբյեկտիվորեն, քանի որ Ձեր կարծիքով Դուք եք աշխարհի կենտրոնը: Մտածեք այս մասին:

ԱՆԻ ՄԵՐՈՒԺԱՆԻ ՄԱՐԳԱՐՅԱՆ

Խորագիր՝ #48 (913) 8.12.2011 – 14.12.2011, Ռազմական


14/12/2011