ՄԵՐ ԶՈՐԱՄԱՍԻ ԿԻՐԱԿԻՆ

Ինչպես զինված ուժերում, այնպես էլ մեր զորամասում, որի հրամանատարը փոխգնդապետ Վալենտին  Բուռնուսուզյանն է, կիրակի օրերն անցնում են համաձայն հանգստյան օրվա պլանի: Այս կիրակին էլ անցավ հետաքրքիր ու հագեցած: Նախ, առավոտյան, ուղիղ ժամը 7-ին, օրապահի  «Գումարտա՛կ, վե՛ր կաց» կանչով, հաշված րոպեների ընթացքում գումարտակի անձնակազմը մի մարդու պես շարվեց զորանոցի դիմաց և համապատասխան հրահանգավորում ստանալուց հետո ձեռնամուխ եղավ իրեն կցված տարածքների մաքրման աշխատանքներին:

Օրապահի հաջորդ հրամանով զորամասը շարվեց շարահրապարակում: Հրամանատարի ԲՀԱ գծով տեղակալ, մայոր Արթուր Հովակիմյանի ողջույնի խոսքից հետո ծավալվեց ռազմահայրենասիրական թեմայով կիրակնօրյա զրույց, ինչին հաջորդեցին մարզական միջոցառումները: Զորամասում յուրաքանչյուր զինվոր անհամբերությամբ է սպասում այս իրադարձությանը, չէ՞ որ այն զինծառայողները, որոնք մասնակցություն են ունենում միջոցառմանն ու ցուցաբերում են բարձր ցուցանիշներ, խրախուսվում են շնորհակալագրերով ու պատվոգրերով, ազատական են ստանում: Հարյուրավոր ժամկետային զինծառայողներ մրցակցային մթնոլորտում իրենց ուժերը փորձեցին մի շարք մարզաձևերում` բազկամարտ, վազք, ձգումներ պտտաձողի վրա, ֆուտբոլ, վոլեյբոլ, շախմատ և շաշկի: Ֆուտբոլային մրցաշարում հաղթեց տանկային վաշտը՝ հրամանատար, կապիտան Արթուր Նիկողոսյան:

Վոլեյբոլ մարզաձևում իր հավասարը չուներ մոտոհրաձգային վաշտը`  հրամանատար, կապիտան Ֆայեն Մանդալյան:

Բազկամարտում հաղթող ճանաչվեց տանկային  վաշտի նշանառու-օպերատոր, շարքային Նարեկ Խաչինյանը:

Կիրակնօրյա մարզական միջոցառումների ընթացքում բացազատված էին նաև ուսումնական կետեր: Ուսումնական կետերի ղեկավարներն ընտրված էին զինվորներից և սերժանտներից: Հատկապես ուշադրության կենտրոնում էր շախմատի ուսումնական կետի ղեկավար, շարքային Սարգիս Մանուկյանը: Սարգիսը ՖԻԴԵ-ի վարպետ է, Երևանի տղամարդկանց շախմատի առաջնության եռակի չեմպիոն: Ազատ ժամերին Սարգիսը զինծառայողներին սիրով է ծանոթացնում հնագույն խաղի գաղտնիքներին:

Չմոռանամ նշել, որ կիրակի օրերին եռուզեռ է նաև զորամասի ակումբում: Ակումբի պետ, կրտսեր սերժանտ Մերի Մարտիրոսյանը սիրով գրապահարաններից գտնում է զինվորների նախընտրած գրքերն ու տալիս նրանց ընթերցելու: Մինչ  մի քանիսը  խորասուզված կարդում են գեղարվեստական գրականություն, ակումբի մյուս կողմում շախմատի և շաշկու առաջնության թեժ մրցակցություն է ընթանում: Իսկ օրվա վերջում բոլորը շտապում են ակումբի դահլիճ` կինոդիտման, հընթացս մեկը մյուսից հետաքրքրվելով, թե այս անգամ ինչ հետաքրքիր ֆիլմ են ցուցադրելու: Ահա այսպիսի բուռն, տարբեր ու բազմազան միջոցառումներով է հագեցած կիրակնօրյա մեր առօրյան զորամասում:

ՎԱՂԻՆԱԿ ԳԱԼՍՏՅԱՆ

շարքային