Language:

  • Հայերեն
  • Русский
  • English

ԵՌԱՄՍՅԱԿԻ   ԱՐԴՅՈՒՆՔՆԵՐԻ ԱՄՓՈՓՈՒՄ



 

ԵՌԱՄՍՅԱԿԻ   ԱՐԴՅՈՒՆՔՆԵՐԻ ԱՄՓՈՓՈՒՄԳնդապետ Ժիրայր Պողոսյանի հրամանատարությամբ գործող 1-ին զորամիավորումում տեղի ունեցավ 2018թ. ուսումնական տարվա երկորդ եռամսյակի արդյունքների ամփոփում, որի ընթացքում քննության առնվեցին մարտական պատրաստության և պատրաստականության, թիկունքի աշխատանքների, զինվորական կարգապահության և զորքերի ծառայության հարցեր:

Աշխատանքներին մասնակցում էին զորամիավորման հրամանատարությունը, զորամասերի ու ստորաբաժանումների հրամանատարները, ԲԿ վարչակազմը, կայազորի  զինդատախազ Հայկ Մարգարյանը, իրավապահ մարմինների ներկայացուցիչներ:

Զորամիավորման շտաբի պետ, գնդապետ Ալեքսանդր Ցականյանը հաշվետու զեկույցում նշեց, որ ուսումնական տարվա երկրորդ եռամսյակում ստորաբաժանումները ամբողջությամբ իրականացրել են պլանային միջոցառումները:

Նա անդրադարձավ ի հայտ եկած որոշակի բացթողումներին, դրանց վերացման ուղղությամբ տարվող աշխատանքներին, ինչպես նաև՝  առկա խնդիրներին և  լուծման ուղիներին: Ներկայացնելով լավագույն ստորաբաժանումները, ընդհանուր առմամբ, նա զորամիավորման ու ենթակա զորամասերի մարտական պատրաստությունը և պատրաստականությունը,  օպերատիվ և շտաբների պատրաստության, զորքերի ծառայության և զինվորների ծառայության անվտանգության ապահովման, պահակային և պարեկային ծառայության, ներքին ծառայության, կարգապահության վիճակը գնահատեց բավարար:

Զեկույցի վերջում  գնդապետ Ցականյանը հավաստիացրեց, որ զորամիավորման ենթակա զորամասերի շտաբները ունակ են կազմակերպված ղեկավարելու ստորաբաժանումների գործողությունները մարտի նախապատրաստման ժամանակ, պատրաստ են կատարելու ցանկացած մարտական խնդիր:

Ելույթ  ունեցավ նաև կայազորի զինդատախազ Հայկ Մարգարյանը՝ կարևորելով իրավապահ մարմինների և հրամկազմի համատեղ և արդյունավետ աշխատանքը:

Զորամիավորման հրամանատար, գնդապետ Ժիրայր Պողոսյանն ամփոփելով խորհրդակցությունը, քննարկված հարցերի շուրջ կատարեց կարևոր հետևություններ, պարզաբանումներ, ներկայացրեց հաջորդ եռամսյակի անելիքները՝ գերխնդիրը համարելով առավոտյան հրամանատարական զեկույցները, սպառազինության  միջոցների, տեխնիկայի պահպանումը, մարտական պատրաստության և պատրաստականության, կարգապահության շարունակական ամրապնդումը:

Զորամիավորման հրամանատար, գնդապետ Ժ. Պողոսյանը եռամսյակի լավագույն արդյունքներ ապահոված զինծառայողներին, զորամասերն ու ստորաբաժանումները  պարգևատրեց  պատվոգրերով, կրծքանշաններով, դրամական խրախուսանքով:

1-ին զորամիավորման թղթակցական կետ

Խորագիր՝ Նորություններ


13/07/2018