Language:

  • Հայերեն
  • Русский
  • English

ՇԱՐՈՒՆԱԿՎՈՂ ՑԵՂԱՍՊԱՆՈՒԹՅՈՒՆ



Օգոստոսի 3-ին լրանում է երկու տարին, երբ «Իսլամական պետություն» կոչվածի հրեշները հարձակվեցին մեր բնօրրանի, մեր տան, Իրաքի Հանրապետության Շանգալ եզդիաբնակ նահանգի վրա և սկիզբ դրեցին եզդի ժողովրդի էթնիկ զտումներին, կոտորածներին՝ ցեղասպանությանը:

Այն խլեց մեր ժողովրդի հազարավոր զավակների կյանքը, տասնյակ հազարավորները գերեվարվեցին ու դատապարտվեցին ստրկության… Հնագույն մեր ժողովուրդը ենթարկվեց այնպիսի ոճրագործության, որ նույնիսկ ամենազարհուրելի երազում անգամ հնարավոր չէր տեսնել:

Շանգալը մեր բնօրրան է: Մենք այնտեղ եկվոր չենք, ոչ էլ անցվոր, մենք եղել ենք և կլինենք մեր բնօրրանի դարավոր տերը:

ՄԱԿ-ը եզդիների նկատմամբ ԻՊ ոճրագործությունները որակեց որպես ցեղասպանություն՝ Հաագայի միջազգային քրեական դատարանին կոչ անելով զբաղվել եզդիների ցեղասպանության խնդրով: Եզդիների ցեղասպանությունը ճանաչեցին և դատապարտեցին Եվրոպական Միությունը, Եվրոպական Խորհուրդը և մի շարք պետություններ:

Եզդիների ցեղասպանությունը ցնցել էր Հայաստան աշխարհը, հայ ժողովրդին: Ամենուր ձևավորվեցին «Օգնիր եզդիներին» համահայաստանյան խմբեր: ՀՀ ղեկավարությունը միջազգային տարբեր ատյաններում դատապարտեց եզդիերի ցեղասպանությունը և կոչ արեց սատար կանգնելու եզդի ժողովրդին:

Եվ եզդի ժողովուրդը ձեռքերը ծալած չնստեց: Մեր ազատամարտիկները զինված պայքարով ազատագրեցին սրբավայր Շանգալը՝ եզդի ժողովրդի կենսատարածքը, եզդիների գոյության ամրոցը, որտեղ ապրելու և հավիտյան արարելու է: Իսլամիստների սև դրոշը Շանգալում այրվեց եզդի ազատամարտիկների ձեռքերով և կոխկրտվեց ոտքերի տակ:

Մենք երախտապարտ ենք բոլոր նրանց, ովքեր այդ սարսափելի օրերին օգնության ձեռք մեկնեցին մեր ժողովրդին: Մենք ամբողջ աշխարհով մեկ զգացինք ու տեսանք մեր բարեկամների և ընկերների կարեկցանքն ու օգնությունը: Աշխարհը տեսավ և ճանաչեց քաջ ու հնամենի եզդի ժողովրդին:

Մենք հավատում էինք մեր հաղթանակին, վստահ էինք մեր ժողովրդի ուժին ու կամքին:  Բայց վերջնական հաղթանակը դեռ հեռու է:  Շատ հարցեր դեռևս անպատասխան են: Գերհզոր պետությունների՝ ԻՊ-ի հրեշներին չեզոքացնելու, արմատախիլ անելու անցած երկու տարիների ջանքերը դեռևս ցանկալի արդյունք չեն գրանցել: Աշխարհն օրեցօր ավելի է թաղվում հակամարտությունների մեջ: Վիշտը միայն մերը չէ, այլ համայն մարդկությանը:

Պետք է վերջ տրվի ստի և կեղծիքի քաղաքականությանը:

Աշխարհի մեծամեծներ, կույր և խուլ մի՛ ձևացեք՝ մարդկությունը փրկենք իսլամական չարիքից:

Մենք չենք կարող փոխել ցեղասպանությունների անցյալը, ինչպես ասում է մեր երկրի՝ ՀՀ նախագահ Ս. Սարգսյանը, բայց մենք պարտավոր ենք նման ոճրագործություններից զերծ ապագա ստեղծել:

Մեր ցավը մոռանալ հնարավոր չէ, բայց մեր ժողովուրդը թույլ չի տա, որպեսզի անցյալը իրեն սպանի:

Նա պայքարում է նաև ապագայի համար:

Ոգեկոչում եմ աշխարհում բոլոր ժողովուրդների անմեղ զոհերի հիշատակը և երախտագիտությամբ խոնարհվում նրանց հիշատակի առաջ:

Հավերժ հիշատակ:

 

Ամո ՇԱՐՈՅԱՆ

«Միդիա-Շանգալ» Եզդիների ազգային

միավորում ՀԿ խորհրդի նախագահ

12-2-1

12-2-2

Խորագիր՝ #29 (1149) 03.08.2016 - 09.08.2016, Ռազմաքաղաքական, Տարածաշրջան


03/08/2016