Language:

  • Հայերեն
  • Русский
  • English

Ո՞Ր ԵՐԿՐՆԵՐԻ ԲԱՆԱԿՆԵՐՆ ԵՆ ԱՄԵՆԱՈՒԺԵՂԸ



Ամերիկյան հայտնի The National Interest հրատարակչությանը հաջողվել է կազմել աշխարհի հինգ ամենաուժեղ բանակներն ունեցող երկրների վարկանիշը: TOP հնգյակում տեղ են գտել հետևյալ երկրների` ԱՄՆ-ի, Չինաստանի, Հնդկաստանի, Ռուսաստանի և Մեծ Բրիտանիայի բանակները:

1. ԱՄՆ

Այս երկրի զինծառայողների թիվը 535 հազար մարդ է: Եվս մեկ միլիոն է կազմում պահեստազորի և Ազգային գվարդիայի անդամների թիվը:
Տեխնիկական բարձր զինվածությունը ԱՄՆ-ի զինված ուժերին հնարավորություն է տալիս ռազմական գործողություն վարելու աշխարհի ցանկացած կետում: Այս երկրի բանակը աշխարհում ունի 730 ռազմակայան:
Տիրապետում է ատոմային զենքին:

2. ՉԻՆԱՍՏԱՆ

Չինաստանի զինված ուժերը ամենամարդաշատն են:

Ցամաքային զորքերում ծառայում է մոտ 1,6 միլիոն մարդ: Թեև նորացվում է այս երկրի ռազմական տեխնիկան, սակայն դեռևս բավականին մեծ տոկոս են կազմում հնացած զինատեսակները: Մոտավոր հաշվարկներով՝ Չինաստանի բանակը ամբողջովին վերազինելու համար կպահանջվի 10-12 տարի:

Ունի ատոմային զենք:

3. ՀՆԴԿԱՍՏԱՆ

Այս երկրի բանակը թվակազմով երկրորդն է Ասիայում: Զինված ուժերի թիվը կազմում է 1,2 միլիոն: Երկրի բանակի հիմքը կազմում են ցամաքային ուժերը, որոնք կենտրոնացած են Չինաստանի և Պակիստանի սահմաններին:

Հնդկաստանի բանակը տեխնիկապես լավ հագեցած է և համապատասխանում է եվրոպական չափանիշներին:

Երկրի ռազմական քաղաքականության ծրագրով նախատեսվում է, որ առաջիկա տասը տարիների ընթացքում Հնդկաստանի արդյունաբերությունը կհոգա ռազմական կարիքների 50 տոկոսը:
Ունի ատոմային զենք:

4. ՌՈՒՍԱՍՏԱՆ

Ռուսաստանի զինված ուժերի թիվը կազմում է 285 հազար մարդ: Համարվում է, որ թեև այս բանակը տեխնիկապես ամենահագեցածներից է և ունի մարտական մեծ փորձառություն, ինչը, սակայն, բավարար չէ պաշտպանելու երկրի հսկայածավալ սահմանների անվտանգությունը: Ամեն զինծառայողի, համաձայն հրատարակչության, հասնում է մոտ 60 քառակուսի կիլոմետր տարածք:

Ունի ատոմային զենք:

5. ՄԵԾ ԲՐԻՏԱՆԻԱ

Զինված ուժերի թիվը կազմում է 102 հազար մարդ: The National Interest հրատարակչության կարծիքով, բրիտանական բանակը ամենամարտունակն է Եվրոպայում: Այն ընդունակ է մարտական գործողություններ վարել ինչպես ցամաքում, այնպես էլ օդում և ծովում:

Զինված է ատոմային զենքով:

Գ. ԱՍԱՏՐՅԱՆ

Խորագիր՝ #45 (1063) 20.11.2014 – 26.11.2014, Ռազմաքաղաքական


20/11/2014