Language:

  • Հայերեն
  • Русский
  • English

Տարածաշրջան

ՌՈՒՍԱՍՏԱՆԸ ՍԿՍԵԼ Է «ՄԻԳ»-ԵՐԻ ՄԱՏԱԿԱՐԱՐՈՒՄԸ ՀՆԴԿԱՍՏԱՆ

Ռուսական «ՄԻԳ» ավիաշինական կորպորացիան Հնդկաստանի ռազմածովային ուժերին է փոխանցել ՄԻԳ-29Կ/ԿՈՒԲ 5 կործանիչ, նաև օդաչուների ուսուցանման` շարժունակության համակարգով համալիր վարժասարք, կործանիչների սպասարկման համար անհրաժեշտ սարքավորումներ: 1,5 միլիարդ դոլար արժողությամբ 29 հատ ՄԻԳ-29 ինքնաթիռների մատակարարման մասին պայմանագիրը կնքվել է 2010թ. մարտին ՌԴ վարչապետ Վլադիմիր Պուտինի` Հնդկաստան կատարած այցի ընթացքում:

Ռուսաստանի պաշտպանության նախարարությունը շուրջ 100 միավոր հեռանկարային բազմանպատակ ռազմատրանսպորտային ԿԱ-60 ուղղաթիռներ է պատվիրել: Ուղղաթիռի սերիական արտադրությունը նախատեսվում է սկսել 2015թ.:

ՀԱՊԿ ԵՒ ԱՊՀ ԵՐԿՐՆԵՐԸ ՎԱՂ ԹԵ ՈՒՇ ՍՏԻՊՎԱԾ ԵՆ ԶԵՆՔ ԳՆԵԼ ՌՈՒՍԱՍՏԱՆԻՑ

Ռուսական սպառազինության ու ռազմական տեխնիկայի արտահանմամբ զբաղվող «Ռոսօբորոնէքսպորտ» ընկերության հատուկ հանձնարարությունների գծով տնօրեն Նիկոլայ Դիմիդյուկի կարծիքով, Հավաքական անվտանգության պայմանագրի կազմակերպության (ՀԱՊԿ) և ԱՊՀ անդամ երկրները վաղ թե ուշ ստիպված են նոր զենք գնել Ռուսաստանից, քանի որ սպառազինությունը նույնպես հնանում է և չի կարող շարունակ արդիականացվել:

ԿՈՐԾԱՆԻՉՆԵՐԻ ՀԱՐՑՈՒՄ ԱՄԵՐԻԿԱՆ ԹՈՒՐՔԻԱՅԻՆ ՄԵՐԺՈՒՄ Է, ԵՎՐՈՊԱՆ` ՍԱՏԱՐՈՒՄ

Ամերիկյան «Lckheed Martin» ավիաշինական ընկերությունը հրաժարվել է Թուրքիային տրամադրել 5-րդ սերնդի «F-35» կործանիչի արտադրման տեխնոլոգիան, ինչի պատճառով Թուրքիան դեռևս այս տարվա մարտ ամսին հայտարարել էր, որ դադարեցնում է 100 հատ ամերիկյան «F-35» գնելու շուրջ բանակցությունները: Ամերիկյան ընկերությունը չի տալիս կործանիչի ծրագրային ապահովման ներքին և արտաքին բանալիները (կոդերը), առանց որոնց թուրք ճարտարագետները չեն կարող փոփոխություն կատարել ինքնաթիռի ծրագրային ապահովման մեջ:

ԻՐԱՆԻ ՊԱՇՏՊԱՆՈՒԹՅԱՆ ՆԱԽԱՐԱՐԸ 32 ՏԱՐՎԱ ԸՆԹԱՑՔՈՒՄ ԱՌԱՋԻՆ ԱՆԳԱՄ ԱՅՑԵԼԵԼ Է ԲՈԼԻՎԻԱ

Իրանի պաշտպանության նախարար Ահմադ Վահիդին Բոլիվիայի իր գործընկերոջ հրավերով հունիսի 1-ին այցելել է Սանտա-Կրուս: Նա կմասնակցի Լատինական Ամերիկայի և Կարիբյան ավազանի երկրների դաշինքի (որի անդամ են Կուբան, Վենեսուելան, Բոլիվիան, Նիկարագուան և Դոմինիկյան Հանրապետությունը) ռազմական դպրոցի բացման արարողությանը: Իրանում իսլամական հեղափոխությունից հետո առաջին անգամ է, որ Իրանի պաշտպանության նախարարն այցելում է Բոլիվիա:

Մոտ ժամանակներում ՌԴ ռազմական օկրուգների ՀՕՊ զորքերի մարտական հնարավորությունները կավելանան 40%-ով: Այս մասին հայտարարել է ՌԴ Ցամաքային զորքերի ՀՕՊ-ի պետ գեներալ-մայոր Ալեքսանդր Լեոնովը` նշելով, որ 2011թ. պետական պաշտպանական պատվերի շրջանակում ձեռք կբերվի ավելի քան 400 միավոր հրթիռահրետանային սպառազինություն, կարդիականացվի 100 միավորը:

Ռուսական «Սուխոյ» ընկերության փորձարկող-օդաչու Սերգեյ Բոգդանին շնորհվել է Ռուսաստանի հերոսի կոչում` «Су-35»-ի և 5-րդ սերնդի ռուսական հեռանկարային կործանիչի փորձարկումների համար: Համապատասխան հրամանագիր է ստորագրել ՌԴ նախագահ Դմիտրի Մեդվեդևը` բարձր գնահատելով օդաչուի ներդրումը ռուսական մարտական ավիացիայի զարգացման գործում: