Language:

  • Հայերեն
  • Русский
  • English

Տարածաշրջան

Իրանի խորհրդարանի ազգային անվտանգության և արտաքին քաղաքականության հարցերով հանձնաժողովի անդամ Մոհամմադ Քարիմ Աբեդին հայտարարել է, որ Իրանը շուտով կստեղծի տեղեկատվական գործակալություն, որն անգլերեն լեզվով զեկույցներ է պատրաստելու ԱՄՆ-ում և Մեծ Բրիտանիայում մարդու իրավունքների վիճակի վերաբերյալ:

ՄԵՂԱՎՈՐՆԵՐԸ ՊԱՏԺՎՈՒՄ ԵՆ

2010թ. Ռուսաստանի պետական ռազմական պատվերի շուրջ 30 տոկոսը չի կատարվել: Զինված ուժերը չեն ստացել մեկ կորվետ, 955 «Բորեյ» և 855 «Յասեն» դասի 3 սուզանավ, ՅԱԿ-130 ուսումնական 9 ինքնաթիռներից 6-ը, 151 ՀՄՄ-3-ների կեսը, ծրագրում ներառված 11 արբանյակներից պատրաստվել է միայն 5-ը: ՌԴ նախագահ Դմիտրի Մեդվեդևի հանձնարարականի համաձայն` մեղավորները պատժվել են. փոխվարչապետ Սերգեյ Իվանովը հայտնել է, որ պաշտոնից հեռացվել է 5 մարդ, որոնց թվում նաև բարձրաստիճան զինվորականներ, ևս 11 մարդ նկատողություն է ստացել: Հնարավոր է, այդ թիվը հետագայում ավելանա:

ԳԱՂՏՆԻ ԲԱՆԱԿՑՈՒԹՅՈՒՆՆԵՐ

«Վաշինգտոն Փոստը» գրել է, որ ԱՄՆ-ը և Թալիբան շարժումը բանակցություններ են անցկացրել Աֆղանստանում իրավիճակի կայունացման շուրջ: Հանդիպում կայացել է առնվազն երեք անգամ, վերջին անգամ Գերմանիայում` մայիսի սկզբներին: ԱՄՆ պետդեպարտամենտի մամլո քարտուղար Մայքլ Ա. Համմերը հրաժարվել է հաստատել բանակցությունների վերաբերյալ տեղեկությունները, սակայն նշել է, որ ԱՄՆ-ը Աֆղանստանում և տարածաշրջանում լայն շփումներ ունի:

«Հաարեց» պարբերականը գրում է, որ այս տարվա փետրվարին Իսրայելի Ազգային անվտանգության խորհրդի ղեկավարի պաշտոնից Ուզի Արադի հեռացման պատճառը նրա կողմից գաղտնի տեղեկատվության արտահոսքն է:

ԿԱՍԿԱԾՎՈՒՄ Է ԼՐՏԵՍՈՒԹՅԱՆ ՄԵՋ

Ռուսական իշխանությունները երկրից արտաքսել են Իսրայելի դեսպանատան ռազմական կցորդ, ռազմաօդային ուժերի գնդապետ Վադիմ Լեյդերմանին` լրտեսական գործունեության համար: Լեյդերմանին ազատ են արձակել և պաշտոնական մեղադրանքներ չեն առաջադրել, քանի որ նա դիվանագիտական պաշտպանվածություն ունի:

Հակատանկային հրթիռային համալիրներ արտադրելու շուրջ Ադրբեջանի և Հարավաֆրիկյան Հանրապետության բանակցությունները ձախողվել են, ինչից հետո Ադրբեջանը բանակցություն է սկսել ուկրաինական «Լուչ» կոնստրուկտորական բյուրոյի հետ: Ուկրաինական հրթիռներն ադրբեջանցի զինվորականներին դուր են գալիս, որովհետև դրանք հնարավոր է տեղադրել ուղղաթիռների և ցամաքային տեխնիկայի վրա:

Վրաստանի Ազգային անվտանգության խորհուրդը մայիսի 17-ին խորհրդարանի որոշմամբ լիազորություն ստացավ քաղաքական բարձրագույն մակարդակում ղեկավարելու, կառավարելու և կոորդինացնելու երկրի ազգային շահերին սպառնացող ցանկացած ճգնաժամային իրավիճակում անհրաժեշտ գործողությունները:
Վրաստանի ԱԱԽ քարտուղարը Գիգա Բոկերիան է: