Language:

  • Հայերեն
  • Русский
  • English

Տարածաշրջան

ՌՈՒՍԱԿԱՆ ԱՆՁԱՅՆ ՆՌՆԱԿԱՆԵՏՆ ԱՄԵՆԱԼԱՎՆ Է

Ռուսական «Բուրեվեստնիկ» գիտահետազոտական ինստիտուտի զինագործները ռազմական արտադրանքի ցուցահանդեսում ներկայացրել են հատուկ նշանակության ստորաբաժանումների համար նախատեսված նռնականետ: 82 մմ-անոց նռնականետի կրակոցի ժամանակ աղմուկ, կրակի բոց, ծուխ, հարվածային ալիք չի առաջանում: Եւ դա` շնորհիվ այն բանի, որ կրակելիս վառոդային գազերը «փակվում են» մարտագլխիկի հետևի մասում: Կրակելիս միայն թույլ ձայն է լսվում, որը համեմատելի է խլացուցիչով Կալաշնիկովի ինքնաձիգից կրակոցի ձայնի հետ:

ՀԱՄԱԿԱՐԳՉԱՅԻՆ ԳՐՈՀ ՊԵՆՏԱԳՈՆԻ ՎՐԱ

Պենտագոնի մատակարար Lockheed Martin ընկերության համակարգչային ցանցը ենթարկվել է հաքերների գրոհի: Ընկերության տարածած հայտարարության մեջ նշվել է, որ գրոհը նվազագույն հետևանքներ է ունեցել և տեղեկույթի արտահոսքը հնարավոր է եղել կանխել: Lockheed Martin-ը օդատիեզերական տեխնիկայի` աշխարհում խոշորագույն արտադրողներից է, վաճառքի ծավալով ԱՄՆ պաշտպանության նախարարության գլխավոր մատակարարը:

ՎԵՆԵՍՈՒԵԼԱՅՈՒՄ ՀԱՐԳԻ Է ՌՈՒՍԱԿԱՆ ԶԵՆՔԸ

Վենեսուելայի պաշտպանության նախարարությունը կազմավորելու է նոր մոտոհրաձգային բրիգադ, որում կընդգրկվեն ռուսական արտադրության ՀՄՄ-3 և ԲՄՊ-80 զրահափոխադրիչներ: Ֆինանսական ծախսերը ներառվել են 2011թ. բյուջեում: Վերջին տարիներին Վենեսուելան մեծ քանակությամբ ռուսական զենք է գնել, մասնավորապես, Տ-72Մ1Մ տանկեր, զրահամեքենաներ, Սու-30ՄԿ2Բ կործանիչներ, տարբեր մոդիֆիկացիայի ՄԻ ուղղաթիռներ, 1800 հատ «ԻԳԼԱ-Ս» շարժական զենիթահրթիռային համակարգեր, 100 հազար հատ Կալաշնիկով ինքնաձիգներ և այլն, ծրագրվում էր նաև «Սմերչ» և Ս-300 կայանների ձեռքբերում:

ԱՄՆ-Ը ԿՈՐՑՆՈՒՄ Է ԱՌԱՎԵԼՈՒԹՅՈՒՆԸ

ԱՄՆ զինված ուժերի գեներալ-լեյտենանտ Հերբերտ Կարլայլը հայտարարել է, որ ԱՄՆ-ը ավելի արագ է կորցնում առավելությունը դժվար տեսանելիության տեխնոլոգիաներում, քան ենթադրվում էր: Դա կապված է Ռուսաստանում T-50 և Չինաստանում J-20 հինգերորդ սերնդի ինքնաթիռների նախագծման հետ: Նա միաժամանակ ասել է, որ նշված ինքնաթիռները սպառազինության վերցնելուց հետո էլ իրենք որոշակի առավելություն կունենան F-35-ի շնորհիվ, նաև այն բանի, որ անտեսանելիության տեխնոլոգիաների ստեղծումը բարդ և աշխատատար գործընթաց է, իսկ ամերիկացի զինվորականները երկար տարիների փորձ ունեն և այդ ընթացքում կարող են զարգացման նոր փուլ անցնել:

ՖԻՆԱՆՍԱՎՈՐՈՒՄԸ` ՏԱՐԱՁԱՅՆՈՒԹՅԱՆ ՊԱՏՃԱՌ

Սպիտակ տանը խոստացել են արգելք դնել 2012թ. ԱՄՆ պաշտպանական բյուջեի նախագծի վրա, եթե դրանում կրճատվեն F-35 կործանիչի հիմնական` F-135 շարժիչի արտադրման ծախսերը, նաև այն դեպքում, եթե ներառվի այլընտրանքային F-136 շարժիչի ստեղծման համար պահանջվող գումար: Մինչ այդ Կոնգրեսն առաջարկել էր ուղղումներ մտցնել բյուջեում, որոնց համաձայն` հիմնական շարժիչի ֆինանսավորումը կկրճատվի այնքան ժամանակ, մինչև ԱՄՆ պաշտպանության նախարարությունը պայմանագիր կկնքի այլընտրանքային շարժիչի ստեղծման համար:

ԻՍՐԱՅԵԼԸ ԱՆՕԴԱՉՈՒՆԵՐ Է ՄԱՏԱԿԱՐԱՐՈՒՄ ՌՈՒՍԱՍՏԱՆԻՆ

Իսրայելական Israel Aerospace Industries ընկերությունը առաջին անգամ ներկայացրել է Ռուսաստանի պաշտպանության նախարարությանը մատակարարելու համար նախատեսված Searcher ΙΙ անօդաչու թռչող ապարատի լուսանկարները: Անօդաչուների արտադրությունն ու մատակարարումն իրականացվում է 2010թ. կնքված 400 միլիոն դոլար արժողությամբ պայմանագրի շրջանակներում: Ապարատները մատակարարվելու են ՌԴ զինվորականների պահանջած սարքավորումներով և ռուսերեն մակնշմամբ: Առաջին միավորներն արդեն հասցվել են պատվիրատուին:

ԹՈՒՐՔԻԱՆ ՍՏԱՑԱՎ ԻՐ ՏԱՐԱԾՔՈՒՄ ՀԱՎԱՔՎԱԾ ԱՌԱՋԻՆ ԿՈՐԾԱՆԻՉԸ

Թուրքական Turkish Aerospace Industries ընկերությունը ամերիկյան Lockheed Martin ընկերության հետ համատեղ Թուրքիայի ռազմաօդային ուժերին է փոխանցել Անկարայի մոտ գտնվող գործարանում հավաքված F-16 Fighting Falcon Block 50 առաջին կործանիչը: Թուրքիան պետք է ստանա 30 այդպիսի կործանիչ: Հաջորդ 29 ինքնաթիռները պատրաստ կլինեն մինչև 2012թ. վերջը:
ԱՄՆ Կոնգրեսը 2006թ. հավանություն էր տվել Թուրքիայում F-16 ինքնաթիռների խմբաքանակի արտադրությանը: Դրանց արդիականացված` Block 50 տարբերակի վերաբերյալ համաձայնություն ձեռք է բերվել 2009թ.: Նոր ինքնաթիռների համար Թուրքիան կվճարի 1,7 միլիարդ դոլար: