Language:

  • Հայերեն
  • Русский
  • English

Տարածաշրջան

Ադրբեջանն ու Թուրքիան մայիսի 11-ին Ստամբուլում 2 պայմանագիր են ստորագրել ռազմական համագործակցության մասին: Առաջին պայմանագրի համաձայն` Ադրբեջանը մասնակցելու է Թուրքիայի գործարաններում MODERN հետևակային հրացանների և 105մմ տրամաչափի հրանոթների արտադրությանը: Երկրորդ պայմանագրի համաձայն` երկու երկրները համատեղ կարտադրեն MKEK 120 մմ-անոց ականանետներ:

Առաջիկա 4 տարում միջին և ռազմավարական ռազմատրանսպորտային ինքնաթիռների շուկայում ակնկալվում է վաճառքի ծավալի ավելացում 304 միավորով կամ 20,56 մլրդ դոլար ընդհանուր արժողությամբ (եթե իրականացվեն ընթացիկ պայմանագրերով նախատեսված բոլոր մատակարարումները):

Իրանում սկսել են Ан-140 տուրբոպտուտակային ինքնաթիռների սերիական արտադրություն, որն իրականացվում է Սպահանի ավիագործարանում: Այդ ինքնաթիռները քաղաքացիական ուղևորներ են տեղափոխում երկրի ներքին երթուղիներով: Ан-140 ինքնաթիռներ են տրամադրվել նաև իրանական ոստիկանությանը` ծառայողական չվերթների համար:

Մայիսի 10-ին հրապարակված ՄԱԿ-ի զեկույցի համաձայն` Իրանը շարունակում է կեղծ ընկերությունների միջոցով իրականացնել ֆինանսական օպերացիաներ և գաղտնի մատակարարումներ, որոնց նպատակը միջազգային պատժամիջոցները շրջանցելն է: Հիշեցնենք, որ անցյալ տարվա հունիսին ՄԱԿ-ի Անվտանգության խորհուրդը պատժամիջոցների չորրորդ փաթեթը կիրառեց Իրանի դեմ, երբ վերջինս հրաժարվեց դադարեցնել ուրանի հարստացումը և բանակցություն սկսել ԱՄՆ-ի, Ռուսաստանի, Չինաստանի, Մեծ Բրիտանիայի, Ֆրանսիայի և Գերմանիայի հետ:

Ռազմական փորձագետների կարծիքով՝ Վրաստանը վերականգնել է 2008թ. օգոստոսի պատերազմից հետո կորցրած ռազմական ներուժը, որն այսօր նույնիսկ գերազանցում է մինչպատերազմյան մակարդակը: Անցած երեք տարիների ընթացքում Վրաստանում կառուցվել են ռազմակայաններ, ուսումնական փորձադաշտեր, ռազմական օբյեկտներ, գնվել է ժամանակակից զենք և ռազմական տեխնիկա, ավելացվել է զինծառայողների քանակն ու բարելավվել նրանց մասնագիտական պատրաստությունը:

Վրաստանի նախագահ Մ.Սահակաշվիլիի խոսքով, օդանավակայաններ են կառուցվում Զուգդիդիում, Փոթիում, Սվանեթիա-Մեստիա բարձրլեռնային վարչական կենտրոնում և Քութայիսում: «Դա միայն սկիզբն է: Վրաստանում մենք կկառուցենք 10 օդանավակայան, և դրանցից յուրաքանչյուրը ես անձամբ կբացեմ»,- հայտարարել է Վրաստանի նախագահը: Նրա խոսքով, եկող տարի Վրաստանը Ֆրանսիայից կգնի մի քանի ժամանակակից ինքնաթիռ:

ԱՄՆ-ից զենք ստանալու նպատակով միայն 2010 թվականին Վրաստանը 1.5 միլիոն դոլար է ծախսել Վաշինգտոնի 4 առաջատար շահախմբերի (լոբբիստական ընկերությունների) ծառայությունների վրա: Այդ կամպանիային մասնակցում է նաև սենատոր Ջոն Մաքքեյնը: Այս մասին հաղորդում է ամերիկյան «Ատլանտիկ» ամսագիրը: Վրաստանի նախագահ Մ.Սահակաշվիլին ամերիկյան զենքի անհրաժեշտությունը հիմնավորում է «ռուսական սպառնալիքով»: ԱՄՆ Պետքարտուղարությունը լռելյայն խոչընդոտում է Վրաստանի այդ փորձերը: