Ապրիլի 13-ին ԱՄՆ-ի զինված ուժերի ներկայացուցիչը հայտարարել է, որ եթե տարեվերջին ԱՄՆ-ի զորքերը դուրս բերվեն Իրաքից, ապա Իրաքի ղեկավարները չպետք է ակնկալեն, որ երկրում սպասվող ճգնաժամի ժամանակ օգնություն կստանան: Այս հայտարարությունը հնչեց ԱՄՆ-ի պաշտպանության նախարար Ռոբերտ Գեյթսի՝ Իրաք կատարած այցից մի քանի օր անց:
Ըստ երկկողմանի անվտանգության պայմանագրի` այս տարվա վերջում ամերիկյան զորքերն ամբողջությամբ դուրս կբերվեն Իրաքից:

Lockheed Martin-ը անվտանգության համակարգերով զբաղվող միջազգային ընկերություն է, որի` աշխարհով մեկ սփռված գրասենյակներում աշխատում է մոտ 126000 մարդ: Ընկերությունն ակտիվորեն զբաղվում է առաջադեմ տեխնոլոգիական համակարգերի ուսումնասիրությամբ , նախագծմամբ, մշակմամբ և արտադրմամբ: Ընկերության եկամուտը 2010թ.-ի ընթացքում կազմել է մոտ 45.8 միլիարդ ԱՄՆ դոլար:

Բրազիլիան գերձայնային թռչող ապարատի սեփական տարբերակի ստեղծման ճանապարհին է: Նախագծումն իրականացվում 2006թ., առաջին թռիչքը նախատեսված է 2013թ.: Նոր ապարատն ստեղծվում է առավելապես տեխնոլոգիաների ցուցադրման համար, և եթե փորձարկումները հաջող անցնեն, դրա հիման վրա կստեղծվեն գերձայնային նոր հրթիռներ, մասնավորապես, արբանյակներ ուղեծիր հասցնելու համար: Նշված ոլորտում գերձայնային հրթիռները կօգտագործեն իրենց առավելությունները` արագությունն ու բեռնատարողությունը:

Հնդկաստանը մտադիր է մեծ քանակությամբ միջին հեռահարության զենիթահրթիռային կայաններ ձեռք բերել՝ երկրի հակաօդային պաշտպանության համակարգում առկա բացերը լրացնելու նպատակով: Պաշտպանության նախարարությունը ներքին և միջազգային մի քանի ընկերությունների հարցում է ուղարկել նման կայաններ մատակարարելու հնարավորության վերաբերյալ: Ներկայացվող հիմնական պահանջներից մեկը նոր կայանների արագացված առաքումն է: Նախնական տեղեկատվություն ստանալուց հետո կհայտարարվի նաև մատակարարման մրցույթ, որի ընթացքում զինվորականները ներկայացնելու են ժամանակակից զենիթահրթիռային համակարգերին անհրաժեշտ պահանջներ` բարձր շարժունակություն և անցանելիություն, համաեղանակային գործելու կարողություն, միաժամանակ մի քանի թիրախներ ուղեկցելու ունակություն, կրակի կառավարման կետի հետ ներգրավվածություն և այլն:

ԱՄՆ կառավարությունը որոշել է վերանայել Մերձավոր Արևելքի երկրների հետ նախկինում կնքված ռազմական պայմանագրերը՝ տարածաշրջանում ռազմական և քաղաքական անկայուն իրավիճակի պատճառով: Որոշ պայմանագրերի կատարումը արգելափակվել է: Առայժմ հայտնի է կառավարության հավանությանն արժանացած` ռազմական տեխնիկայի մատակարարման երկու խոշոր պայմանագրերի՝ Սաուդյան Արաբիային 84 միավոր F-15 Eagle կործանիչների և Արաբական Միացյալ Էմիրություններին THAAD հակահրթիռային համակարգերի մատակարարման մասին է: Գործարքները կարժենան համապատասխանաբար 29,4 և 7 միլիարդ դոլար:

Միացյալ Թագավորությունը, բացի Tornado GR4 օդանավերից, NATO-ին ապահովելու է նաև նոր Typhoon օդանավերով: NATO-ն դրանք կօգտագործի Լիբիայում իրականացվող ռազմական գործողություններում: Typhoon օդանավերը օժտված են վերգետնյա հարձակումներ կատարելու հնարավորությամբ և զինված են ուժեղացված ազդեցության Enhanced Paveway II ռումբերով:
Typhoon և Tornado GR4 օդանավերի համատեղ կիրառումը ապահովում է գերարդյունավետ պայքար: Մեծ Բրիտանիան 12-ով ավելացրել է մատակարարվող Tornado GR4-երի քանակը, ինչպես նաև 4 Typhoon օդանավերը այնպես զինել, որ նրանք օգտագործվեն ոչ միայն վերգետնյա, այլև օդային մարտերում:

Ամերիկյան հեռանկարային X-47B ծովային անօդաչու թռչող ապարատը մյուս անօդաչուներից կտարբերվի կառավարման համակարգով: Այն թռիչք կիրականացնի ավտոնոմ ռեժիմով, իսկ օպերատորը հրամաններ կտա համակարգչային մկնիկի միջոցով: Անօդաչու ապարատը պատրաստվում Northrop Grumman ընկերությունում, որի ներկայացրած տվյալներով սարքի ծրագրային ապահովման բազայում կներառվեն թռիչքի, վայրէջքի տարբեր սցենարներ: Օպերատորը միայն մկնիկը սեղմելով պետք է հրամաններ տա սարքին, ասենք, անցում թռիչքուղով, շարժիչի միացում և անջատում, խուսանավում և այլն: