Language:

  • Հայերեն
  • Русский
  • English

Նորություններ

ՄԱԿ-Ն ԱՌԱՅԺՄ ԱՆԶՈՐ Է ԼԻԲԻԱՅՈՒՄ ԻՐԱԿԱՆԱՑՆԵԼՈՒ ԻՐ ԱՌԱՔԵԼՈՒԹՅՈՒՆԸ

Դրա պատճառը երկրում աշխատունակ կառավարության բացակայությունն ու շարունակվող մարտական գործողություններն են: Այդ մասին խոստովանել է ՄԱԿ գլխավոր քարտուղարի հատուկ ներկայացուցիչ Իան Մարտինը, որի զեկույցը ՄԱԿ-ում ՌԴ մշտական ներկայացուցիչ Վիտալի Չուրկինն անվանել է «անկեղծ ու սթափեցնող»:
Լավատեսական երանգներ չկան նաև Լիբիայում տիրող իրավիճակի վերաբերյալ Պորտուգալիայի գնահատականներում: Պորտուգալիայի իշխանությունները պնդում են, որ Լիբիայում ստեղծված իրավիճակը թույլ չի տալիս ապասառեցնել արևմտյան բանկերում Քադաֆիի վարչակարգի ունեցած գումարները, քանի որ հայտնի չէ, թե դրանք Լիբիային տրամադրելիս ում ձեռքում կհայտնվեն:

ՄԵԾ ԲՐԻՏԱՆԻԱՆ ԼԻԲԻԱՅՈՒՄ ՄՂՈՒՄ Է «ԱՐՏԱԲՅՈՒՋԵՏԱՅԻՆ» ՊԱՏԵՐԱԶՄ

Մեծ Բրիտանիայի պաշտպանության նախարար Լիամ Ֆոքսը հայտնել է, որ լիբիական պատերազմին իր երկրի մասնակցության գինն արդեն իսկ հատել է 470 միլիոն ԱՄՆ դոլարի սահմանը, որի շուրջ կեսը կծախսվի «Լիբիայում ժողովրդավարության հաստատման» հետևանքով դատարկվող բրիտանական զինապահեստների պարունակությունը վերականգնելու համար: Ֆոքսը միաժամանակ հավելել է, որ բոլոր միջոցները ծախսվել են ոչ թե Մեծ Բրիտանիայի հիմնական բյուջեից, այլ գանձարանի պահուստային միջոցներից:

ՊԵՆՏԱԳՈՆԸ ՇՏԱՊ ՎԵՐԱՆԱՅՈՒՄ Է ԻՐԱՔԻ ԲԱՆԱԿԻ ՈՒՍՈՒՑՄԱՆ ԾՐԱԳԻՐԸ

ԱՄՆ ռազմական գերատեսչությանը այս քայլին դիմել պարտադրեց իրաքյան իշխանությունների՝ ամերիկյան զորախմբի հիմնական ուժերի հեռանալուց հետո տեղում մնացող զինծառայողներին հանցանք գործելու դեպքում Իրաքի տարածքում դատական հետապնդումից չազատելու մասին որոշումը, քանի որ նրանք «անցած ութ տարիների ընթացքում չարաշահել են այդ իրավունքը»:
Դրանից անմիջապես հետո Պենտագոնը սկսեց այլընտրանքային ուղիներ որոնել Իրաքի զինծառայողների ուսուցումն իրականացնելու անհատ պայմանագրային հրահանգիչների, Հյուսիսատլանտյան դաշինքի և կամ իրավաբանական անձանց միջոցով, «որոնք կունենան իրավական որոշակի պաշտպանվածություն»:

ՌՈՒՍԱՍՏԱՆՆ ՈՒԺԵՂԱՑՆՈՒՄ Է ԿՈՒՐԻԼՅԱՆ ԿՂԶԻՆԵՐՈՒՄ ՏԵՂԱԿԱՅՎԱԾ ԶՈՐԱԽՈՒՄԲԸ

Ճապոնիայի հետ տարածքային վեճի առարկա հանդիսացող կղզիներում տեղակայվել են «Бук-М1» զենիթահրթիռային համալիրներ, կապի արդիական միջոցներ, ինչպես նաև «Տ-80» տանկերի մեկ գումարտակ:
ՌԴ պաշտպանության նախարարության աղբյուրը հայտարարել է, որ զորախմբի վերազինումը կշարունակվի, և առաջիկայում կղզիներում կտեղաբաշխվեն նաև «Панцирь-C1» և «Бук-М2» շարժական հրթիռահրետանային համալիրներ, առափնյա հականավատորմային գերձայնային թևավոր հրթիռների «Бастион» շարժական համալիրներ, ինչպես նաև «Ми-28Н»` «Գիշերային որսորդ» մարտական ուղղաթիռներ:

ԶԻՆՂԵԿԸ ԿԵՆԹԱՐԿՎԻ ՔՐԵԱԿԱՆ ՊԱՏԱՍԽԱՆԱՏՎՈՒԹՅԱՆ

ՌԴ Ելագուբա քաղաքի դպրոցներից մեկի զինղեկը դասի ժամանակ շարքում խոսելու համար երկու հինգերորդ դասարանցիների նկատմամբ կիրառել է «զինվորական արևահարություն» անվանումով «դաստիարակչական մեթոդը», և ողջ շարքին հրամայել է մոտենալ ու… հարվածել անկարգապահ աշակերտներին, ինչի հետևանքով երկուսն էլ հայտնվել են հիվանդանոցում, որից հետո զինղեկի գործերով զբաղվել է դատախազությունը: Հարուցվել է քրեական գործ:

ՍՎԻՆ-ԴԱՆԱԿԸ ԿՄՆԱ ՌՈՒՍԱԿԱՆ ԲԱՆԱԿԻ ՍՊԱՌԱԶԻՆՈՒԹՅՈՒՆՈՒՄ

Որոշումն ընդունվել է վերջերս ՌԴ ԶՈՒ գլխավոր շտաբում կայացած խորհրդակցության ժամանակ: Ըստ այդմ, ինքնաձիգին դանակի ամրացման հարմարանքը ներառվել է AK-74-ին փոխարինելու կոչված և այժմ մշակման փուլում գտնվող նոր ինքնաձիգի տեխնիկական բնութագրի ցանկում:
Սվին-դանակի կիրառության դեմ արտահայտվողների հիմնական փաստարկը ժամանակակից «թվային» մարտում վերջինիս գործածության անչափ ցածր հավականությունն է: Սակայն, ի վերջո, հաղթել են սվին-դանակի կողմնակիցները, որոնք մատնացույց են արել այն հանգամանքը, որ փամփուշտները սպառվելուց հետո այն մնում է զինվորի միակ զենքը:

ԽԱՂԱՂՈՒԹՅԱՆ ՓՈՂՈՑԸ ՎԵՐԱՆՎԱՆՎԵԼ Է ՖԱՇԻՍՏՆԵՐԻ ՊԱՀԱՆՋՈՎ

Ուկրաինայի Լվովի մարզի գյուղերից մեկում բնակչության շրջանում կատարված հարցումից հետո Խաղաղության փողոցը վերանվանվել է «Նախտիգալ» գումարտակի զինվորների անունով: Հատուկ նշանակության այս գումարտակը, որն անվանում են նաև Ստեփան Բանդերայի անվան ուկրաինական լեգեոն, աբվերը ստեղծել էր 1941 թվականին։ Այն հիմնականում զբաղվում էր խորհրդային բանակի դեմ խափանարար գործողություններով: