Language:

  • Հայերեն
  • Русский
  • English

Նորություններ

ԾԱՌԱՅՈՒԹՅՈՒՆԻՑ ԽՈՒՍԱՓՈՂՆԵՐԻՆ ՄՈՌԱՑԵԼ ԷԻՆ

Անդրբայկալյան երկրամասի զինվորական կոմիսարիատը դիմել է Չիտայի քաղխորհրդի պատգամավորներին` պահանջելով փոփոխություններ մտցնել «Ոստիկանության մասին» օրենքում և ամրագրել, որ ոստիկանությունը պետք է զբաղվի զինվորական ծառայությունից խուսափողների որոնմամբ: Այդ պարտականությունը ժամանակին կատարում էր միլիցիան, իսկ ահա «Ոստիկանության մասին» օրենքը մշակողները զինծառայությունից խուսափողների մասին մոռացել էին, և ոստիկանության գործառույթներում նրանց մասին ոչ մի խոսք չկա:

ԻՐԱՆԸ «Flame»-Ի ՀԱՄԱՐ ՄԵՂԱԴՐՈՒՄ Է ԻՍՐԱՅԵԼԻՆ

Թեհրանն Իսրայելին մեղադրում է համակարգչային բարդագույն «Flame» վիրուսի ստեղծման ու դրանով Իրանի գաղտնի տեղեկություններին մեծ վնաս հասցնելու համար: Վիրուսը վերջերս բացահայտել են ռուսաստանյան մասնագետները:
Փորձագետների պնդմամբ, համակարգչային վիրուսն արդեն հինգ տարի գտնվում է Մերձավոր Արևելքի համակարգչային ցանցերում և կազմակերպված կիբեռնետիկ լրտեսության մի մասն է: Նրա թիրախներ են դարձել Իրանի 189, Արևմտյան ափի 100 և Սիրիայի 30 համակարգչային ցանցեր:

5 ԱՄԻՍ` ՖԻՆ ԼՐՏԵՍ-ԳԻՏՆԱԿԱՆԻՆ

Դանիայի դատարանը Կոպենհագենի համալսարանի պրոֆեսոր Տիմո Կիվիմակիին ռուսական հետախուզության հետ համագործակցելու մեղադրանքով դատապարտել է հինգ ամսվա ազատազրկման, ինչն անսպասելի էր գիտնականի համար, քանի որ կարծում էր, թե իրեն կարդարացնեն:

ԳԼԽԱՎՈՐ ՇՏԱԲԻ ՍՊԱՆ` ԱՄԵՐԻԿՅԱՆ ԼՐՏԵՍ

ՌԴ զինված ուժերի գլխավոր շտաբի ռազմատեխնիկական վարչության նախկին սպա Վլադիմիր Լազարը Միացյալ Նահանգների օգտին լրտեսության համար դատապարտվել է 12 տավա ազատազրկման և զրկվել գնդապետի զինվորական կոչումից: Դավաճան գնդապետը պատիժը կկրի խիստ ռեժիմի աշխատանքային գաղութում: Զորացրվելուց հետո նա աշխատում էր «Госземкадастрсъемка» դաշնային կազմակերպությունում և վերստին շփվում էր պետական գաղտնիքների հետ:

ՀԵՏԱԽՈՒԶԱԿԱՆ ՀՍԿԱ ԴԻՐԻԺԱԲԼԸ ԴԵՌԵՎՍ ՉԻ ԿԱՌՈՒՑՎԻ

Համաձայն «Aviation Week» պարբերականի, ԱՄՆ պաշտպանության նախարարությունը դադարեցրել է «Blue Devil II» («Երկնագույն սատանա-2» հետախուզական հսկա դիրիժաբլի կառուցման ծրագիրը, որը, փորձագետների պնդմամբ, «նոր էջ էր բացելու հետախուզական թռչող սարքերի պատմության մեջ»: Դիրիժաբլը հագեցած էր լինելու գիշերային ու ցերեկային պայմաններում դիտարկման, ունկնդրման ու ռադիոէլեկտրոնային հետախուզության ամենաարդիական բազմաթիվ սարքավորումներով, ունենալու էր բարձր ճշգրտության «Argus» քարտեզագրական համակարգ, ինչպես նաև տվյալների վերլուծության և պահպանման հզոր համակարգիչ, որի շնորհիվ հնարավոր է դառնում հաղորդել ոչ թե տվյալների անընդհատ հոսք, այլ միայն անհրաժեշտ տեղեկատվությունը:

50 ՏԱՐԻ` ՆԱԽԿԻՆ ՆԱԽԱԳԱՀԻՆ

Հաագայի միջազգային դատարանը Լիբերիայի նախկին նախագահ Չարլզ Թեյլորին մարդկության դեմ կատարած հանցագործությունների համար դատապարտել է 50 տարվա ազատազրկման, թեև մեղադրող կողմն 80 տարի էր պահանջում «այդչափ ծանր ու զանգվածային հանցագործություններում նրա ունեցած դերի համար»: Դատարանն ապացուցված է համարել նրան ներկայացված բոլոր մեղադրանքները. մեղսակցություն զանգվածային սպանություններին, բռնաբարություններ, մարմնական վնասվածներ հասցնել և անչափահասների ներգրավում մարտական գործողություններում: 64-ամյա նախկին բռնապետն իր կեսդարյա պատիը կկրի Մեծ Բրիտանիայում:

ԴՕՍԱԱՖ-Ի ԴՊՐՈՑԻ ՏՆՕՐԵՆԸ 7 ՄԻԼԻՈՆ ՌՈՒԲԼԻ Է ՅՈՒՐԱՑՐԵԼ

Մոսկվայի ԴՕՍԱԱՖ-ի ծովային ու ռադիոտեխնիկական միացյալ դպրոցի տնօրեն Իվան Սլյուսարենկոյին յոթ միլիոն ՌԴ ռուբլի յուրացնելու համար դատարանը դատապարտել է վեց տարվա ազատազրկման: Քննությամբ պարզվել է, որ Սլյուսարենկոն դպրոցին հատկացվող բյուջետային միջոցները բազմիցս փոխանցել է տարբեր ֆիրմաների և խարդախությունները թաքցնելու համար դիմել ֆինանսական մեքենայությունների: Նա նաև զրկվել է առաջին կարգի կապիտանի զինվորական կոչումից, ինչպես նաև տուգանվել 300.000 ՌԴ ռուբլի, իսկ յուրացված գումարը կբռնագանձվի հօգուտ ԴՕՍԱԱՖԻ: