Նորություններ
ՌԴ արտգործնախարարությունը հայտարարել է, որ ԱՄՆ պետքարտուղար Հիլարի Քլինթոնը, Վրաստան կատարած այցի ընթացքում խոստանալով շարունակել այդ երկրին սպառազինության ու ռազմական տեխնիկայի մատակարարումները, Թբիլիսիին դրդում է Կովկասում ձեռնարկելու նոր պատերազմների:
Ալեքսանդր Իլյիչենկոն, որ ժամանակին չորսուկես տարի ծառայել է ՌԴ զինված ուժերի գլխավոր շտաբի գլխավոր օպերատիվ վարչությունում, անբավարար է համարել ծառայության բերումով պետական գաղտնիքների տիրապետող քաղաքացիների իրավունքների սահմանափակման մասին ՌԴ սահմանադրական դատարանի պարզաբանումները և դիմել է Մարդու իրավունքների եվրոպական դատարան, քանի որ ՌԴ դաշնային միգրացիոն ծառայությունը հրաժարվել էր նրան արտասահմանյան անձնագիր և երկրից դուրս գալու թույլտվություն տալ:
ՌԴ ռազմավարական նշանակության հրթիռային զորքերը երեկ, Աստրախանի մարզում գտնվող «Կապուստին Յար» զինափորձարանից Մոսկվայի ժամանակով 21.39-ին իրականացրել են «Տոպոլ» միջմայրցամաքային բալիստիկ հրթիռի հաջող արձակում: Հրթիռի մարտական մասը հանձնարարված ճշգրտությամբ խոցել է Ղազախստանի տարածքում գտնվող «Սարի-Շագան» զինափորձարանում եղած պայմանական նշանակետը:
ՌԴ արևմտյան զինվորական օկրուգի ռազմաօդային ուժերը շուտով կհամալրվեն 14 ճակատային «Су-34» ժամանակակից ռմբակոծիչներով, որոնք աստիճանաբար կփոխարինեն արդեն հնացած համարվող «Су-24» ռմբակոծիչներին:
Ղազախստանի գլխավոր դատախազությունը հայտարարել է, որ «Արքանքերգեն» սահմանապահ ուղեկալում 14 զինվորի ու անտառապահի սպանության պատճառ են եղել անձնակազմի շրջանում ոչ կանոնադրային հարաբերություններն ու ներքին հակասությունները: Ուղեկալի պետը մայիսի 28-ից 30-ը զորամասից ուղեկալի հետ կապի բացակայությունը միտումնավոր թաքցնելու մեղադրանքով ձերբակալվել է: Այրված ուղեկալի մոտակայքում մեկ շաբաթ առաջ հայտնաբերվել էր կենդանի մնացած միակ զինվորը՝ Վլադիսլավ Չելախը, որը նաև միակ ռուսն էր անձնակազմում:
Երեկ Լեոն Պանետտան ժամանել է Քաբուլ` վերահսկելու գրոհայինների դեմ իրականացվող գործողության ընթացքը և քննարկելու ՆԱՏՕ-ի խաղաղապահ ուժերի՝ 2014 թվականին նախատեսված դուրսբերմանն առնչվող խնդիրներ: Նա հանդիպել է Աֆղանստանում կոալիցիայի ուժերի հրամանատար, գեներալ Ջոն Ալլենի, Միացյալ Նահանգների դեսպան Ռայան Քրոքերի և Աֆղանստանի պաշտպանության նախարար Աբդուլ Ռահիմ Վարդակի հետ:
ՌԴ արտգործնախարար Սերգեյ Լավրովը վստահ է և լրագրողներին երաշխավորել է, որ ՄԱԿ անվտանգության խորհուրդը թույլ չի տա Սիրիայում դիմել ռազմական միջամտության:
Միաժամանակ արտգործնախարարության պաշտոնական ներկայացուցիչ Ալեքսանդր Լուկաշևիչը Քոֆի Անանի առաջարկած ծրագիրը տապալելու նպատակով իրականացված «նողկալի սադրանք» է որակել նախօրեին Համա նահանգի Ալ-Քուբեյր և Մաարզաֆ գյուղերում տեղի ունեցած նոր խոշոր ողբերգությունը, որին զոհ է գնացել առնվազն 86 մարդ, այդ թվում նաև կանայք ու երեխաներ: