Իրանի ռազմածովային նավատորմի հրամանատարությունը հայտարարել է, որ երկիրը ռազմանավեր է ուղարկել ԱՄՆ-ի ծովային սահմանների մոտ: Այս մասին հայտնում է Fars գործակալությունը։Ըստ աղբյուրի` Թեհրանն այդպիսով պատասխանում է «Պարսից ծոցում ամերիկյան նավատորմի ուժեղացված ներկայությանը»:

Իրանի և ԱԷՄԳ ներկայացուցիչները բանակցությունների ընթացքում համաձայնության են եկել իրանական միջուկային ծրագրի հետ կապված իրավիճակի կարգավորմանն ուղղված միջոցառումների երկրորդ փաթեթի ևս յոթ կետի շուրջ: Բանակցությունների մասին մանրամասներ չեն հաղորդվում:

Աշխարհում ռազմաքաղաքական իրավիճակը բնութագրվում է աճող անկայունությամբ և անորոշությամբ, միաժամանակ ուժերի հավասարակշռությունը Արևմուտքից ավելի ու ավելի է թեքվում դեպի նոր շուկաներ ունեցող, առաջին հերթին ասիական երկրներ: Ըստ Panorama.am-ի` նման աշխարհաքաղաքական գնահատական է տրված Լոնդոնի Ռազմավարական հետազոտությունների միջազգային ինստիտուտի (IISS) հրապարակած ամենամյա «Ռազմական հավասարակշռություն 2014» զեկույցում:

ԱՄՆ-ն դեպի Սոչի չվերթներ կատարող ավիաընկերություններին նախազգուշացրել է ինքնաթիռում ատամի մածուկի տուփերում թաքցված պայթուցիկ նյութերի վտանգի մասին: Այս մասին, ըստ Panorama.am-ի տեղեկացնում է «Բի-Բի-Սի» լրատվական գործակալությունը:
Ըստ Միացյալ Նահանգների հատուկ ծառայությունների տվյալների՝ ավիաուղևորների ձեռնածանրոցում և ուղեբեռում ատամի մածուկով տուփերը կարող են պարունակել նյութեր, որոնց միջոցով պայթուցիկներ կարելի է պատրաստել անմիջականորեն ինքնաթիռում կամ էլ Սոչի ժամանելուն պես:

Սիրիայում կառավարական ուժերի դեմ կռվող ադրբեջանցի ահաբեկիչները հայտարարություն են տարածել, որում խոստովանել են, որ այնտեղ իրենք իրականում կռվում են իրանցիների, հայերի և ռուսների դեմ: Ըստ Panorama.am-ի` «Avropa.info» կայքը հայտնում է, որ նրանք հանդես են եկել Ադրբեջանի մահմեդականներին ուղղված ուղերձով:

Ռուսաստանն ու Չինաստանը կձեռնարկեն բոլոր անհրաժեշտ միջոցառումները միջազգային անվտանգության ապահովման համար, ինչպես արդեն արվել է Սիրիայի իրավիճակի կարգավորման հարցում: Tert.am-ի փոխանցմամբ՝ այս մասին հայտարարել է ՌԴ նախագահ Վլադիմիր Պուտինը:

ՆԱՏՕ-ի գլխավոր քարտուղար Անդերս Ֆոգ Ռասմուսենը հուսով է, որ Ուելսում կայանալիք գագաթնաժողովում կարձանագրվի այն զգալի առաջընթացը, որը ձեռք է բերել Վրաստանը վերջին տարիներին:
«Երրորդ երկրները չէ, որ պետք է որոշեն, թե ՆԱՏՕ-ն ինչ պետք է անի բաց դռների քաղաքականություն անցկացնելիս: Կայանալիք գագաթնաժողովին մենք կհաստատենք, որ մեր դռները բաց են մնում: Մենք կշարունակենք գնահատել այն պետություններին, որոնք ցանկանում են Դաշինքի անդամ դառնալ: Վերջնական որոշում կկայացնենք դրանից հետո»,- ըստ 1in.am-ի, ասել է նա: