Language:

  • Հայերեն
  • Русский
  • English

Նորություններ

ՎԵՐԱԿԱՆԳՆՈՒՄ ԵՆ ՆԱԽԿԻՆ ԿԱՊԵՐԸ

Նախկին Հարավսլավիայի մաս կազմող երեք հանրապետություններ` Սերբիան, Սլովենիան և Խորվաթիան, մտադիր են վերականգնել նախկին կապերը և ստեղծել համատեղ ձեռնարկություն, որը կզբաղվի Քուվեյթի ցամաքային զորքերի Մ-84 տանկերի (խորհրդային Տ-72-ի հարավսլավական տարբերակը) արդիականացմամբ: Այժմ բանակցություններ են ընթանում Քուվեյթի հետ: Սերբիայի պաշտպանության նախարարությունը գործարքը գնահատել է մոտ 400 միլիոն դոլար: Համատեղ ձեռնարկության ստեղծման նախաձեռնությունն էլ այդ երկրինն է:

ԱՌԱՋԻՆ Ա400Մ-Ը ԿՍՏԱՆԱ ՖՐԱՆՍԻԱՆ

Ֆրանսիան կլինի առաջին երկիրը, որին կմատակարարվի Ա-400Մ ռազմա-տրանսպորտային ինքնաթիռը: Պատվիրված 50 միավորներից առաջինը Ֆրանսիան կստանա 2013թ., ողջ խմբաքանակը սպառազինություն կմտնի մինչև 2024թ.: Եվրոպական ինքնաթիռի սերիական արտադրությունն սկսվել է այս տարվա մարտին: Ընդհանուր առմամբ, պատվիրատու երկրները` Մեծ Բրիտանիան, Ֆրանսիան, Գերմանիան, Բելգիան, Լյուքսեմբուրգը, Իսպանիան և Թուրքիան, պետք է ստանան 174 ինքնաթիռ:
Ա400Մ նախագիծը սկզբնական գրաֆիկից հետ է մնում գրեթե երեք տարով, իսկ ինքնաթիռի ստեղծման ծախսերը գերազանցել են նախահաշվարկը շուրջ 5 միլիարդ եվրոյով:

ՀՀ ՊԱՇՏՊԱՆՈՒԹՅԱՆ ՆԱԽԱՐԱՐՆ ԸՆԴՈՒՆԵԼ Է ՀԱՅԱՍՏԱՆՈՒՄ ՎՐԱՍՏԱՆԻ ԱՐՏԱԿԱՐԳ ԵՎ ԼԻԱԶՈՐ ԴԵՍՊԱՆԻՆ

ՀՀ պաշտպանության նախարար Սեյրան Օհանյանը ապրիլի 13-ին ընդունել է Հայաստանի Հանրապետությունում Վրաստանի նորանշանակ արտակարգ և լիազոր դեսպան Թենգիզ Շարմանաշվիլիին:
Սեյրան Օհանյանը շնորհավորել է Թենգիզ Շարմանաշվիլիին դիվանագիտական նոր առաքելության կապակցությամբ և հույս հայտնել, որ դեսպանի պաշտոնում նրա նշանակումը նոր խթան կհանդիսանա հայ-վրացական ռազմական համագործակցության զարգացման համար:
Հանդիպման ընթացքում քննարկվել են պաշտպանական ոլորտում հայ-վրացական համագործակցությանն առնչվող հարցեր:

ԹԱՆԿԱՐԺԵՔ ԻՆՔՆԱԹԻՌԸ

Ամերիկյան F-35 LightningΙΙ կործանիչի ստեղծման համար վերջին ինը տարիներին ծախսվել է 56,1 միլիարդ դոլար, ասվում է ԱՄՆ գլխավոր վերահսկիչ վարչության հաշվետվությունում: Գումարը ծախսվել է գիտահետազոտական, նախագծման աշխատանքների, ապա նաև փորձարկումների համար անհրաժեշտ ինքնաթիռ-նախատիպերի գնման նպատակով: Կործանիչի պատրաստումը կարժենա 56,4 միլիարդ դոլար, իսկ ծրագիրը կավարտվի 2018թ. նախատեսվածից հինգ տարի ուշ: Ընդ որում, նշվում է, որ F-35-ի ստեղծման ծրագիրը խախտել է Նաննա-Մակկերդիի դրույթը, որը ԱՄՆ պաշտպանության նախարարությանը պարտավորեցնում է փակել ցանկացած ռազմական նախագիծ, եթե դրա արժեքը նախահաշվարկի համեմատ աճում է ավելի քան 25 տոկոսով:

The Sunday Independent թերթում տպագրված հոդվածից տեղեկանում ենք, որ Հարավաֆրիկյան Հանրապետության կառավարությունը 2010թ. աշխարհի 78 երկրներին շուրջ 5,3 միլիարդ դոլարի սպառազինություն վաճառելու հավանություն է տվել: Հենվելով սովորական սպառազինության շրջանառության վերահսկման ազգային կոմիտեի հաշվետվությունում բերված տվյալների վրա` թերթը գրում է, որ թույլատրվել է զենք վաճառել նաև առավել բռնատիրական պետություններին, այսինքն՝ ոչ ժողովրդավարական կառավարությամբ, մարդու իրավունքները խախտող, անկայուն քաղաքական իրավիճակով պետություններին, ինչպես նաև այն երկրներին, որտեղ կատարվող ռազմական ծախսերը խոչընդոտում են սոցիալ-տնտեսական զարգացումը:

ԱՄՆ ռազմածովային ուժերը փոքր նավերից պաշտպանվելու համար նախատեսված լազերի փորձարկումներ են անցկացրել: 2010թ. հոկտեմբերից մինչև այս տարվա ապրիլ փորձարկումներն անցկացվել են բաց ծովում, Կալիֆոռնիայի ափերից քիչ հեռու գտնվող ծովային զորավարժարանում: Դրանց ընթացքում հաջողվել է այրել նավ-թիրախը: Նախնական տվյալները հաստատել են, որ լազերային նոր կայանը կարող է կիրառվել իբրև զենք: Նախատեսվում է փորձարկումների ավարտից հետո լազերային զենքի ստեղծման մրցույթ հայտարարել:

ՄԱՍՇՏԱԲԱՅԻՆ ԴՈՒՐՍԳՐՈՒՄ

Նիդեռլանդների պաշտպանության նախարարությունը հայտարարել է սպառազինության մասշտաբային կրճատման մտադրության մասին՝ մինչև 2014թ. ռազմական ծախսերի մեկ միլիարդ եվրոյով նվազումն ապահովելու նպատակով: Երկրի պաշտպանության նախարարությունում և ենթակա գործակալություններում աշխատում է 69 000 մարդ։ Նրանցից շուրջ 12 000-ը նույնպես կկրճատվի: Պաշտպանության նախարար Հանս Հիլլենի խոսքերով, նախատեսվում է դուրս գրել բոլոր 60 «Լեոպարդ» տանկերը, 2 պարեկային նավ, 17 ուղղաթիռ, մեկ տրանսպորտային ինքնաթիռ և F-16 86 ինքնաթիռներից 19-ը: Իսկ երկրի վարչապետ Մարկ Ռյուտտեն հայտարարել է, որ սպառազինության կրճատումը չի անդրադառնա միջազգային ռազմական օպերացիաներում իրենց մասնակցության վրա: