Language:

  • Հայերեն
  • Русский
  • English

Նորություններ

ՊԱՇՏՊԱՆԻՉ ՆԵՐՔՆԱԶԳԵՍՏ

Աֆղանստանում ծառայող ամերիկյան ծովային հետևակայինները մոտ ժամանակներս պինդ գործվածքի նոր վարտիքներ կստանան: Դրանք պետք է պաշտպանեն զինվորի աճուկային մասը ինքնաշեն պայթուցիկ սարքերի պայթյուններից: Նոր ներքնաշորը բեկորներից չի պաշտպանում, սակայն ամրության շնորհիվ թույլ չի տալիս, որ ավազն ու պայթուցիկի մանր մասնիկները թափանցեն վերքի մեջ, կանխում է ազդրային հատվածում զարկերակային ծանր վնասվածքները: Վարտիքի կտորը նաև հակամանրէային հատկություն ունի: Նշենք, որ նմանատիպ վարտիքներ արդեն մատակարարվում են բրիտանական զինծառայողներին:

ՋՐԱՐԿՎԵԼ Է ԵՐՐՈՐԴ ԿՈՐՎԵՏԸ

Սանկտ Պետերբուրգի ափերի մոտ ջրարկվել է «Հսկող» դասի երրորդ կորվետը: Նոր նավը Ռուսաստանի ռազմածովային ուժերին կհանձնվի 2012թ. և կտեղակայվի բալթյան նավատորմում: Նախատեսվում է, որ նույն դասի երկրորդ նավը, որ ջրարկվել է 2010թ. մարտին, շարք կմտնի այս տարվա կեսերին: Այս դասի առաջին նավը սպառազինության է վերցվել 2008թ.: Նախկինում այս դասի ռազմական նավեր չեն առանձնացվել: Դրանք կառուցվում են անտեսանելիության տեխնոլոգիայի կիրառմամբ և նախատեսված են ծովին մոտ տարածքում ռազմական գործողություններ վարելու, ստորջրյա և վերջրյա նավերի դեմ պայքարի և դեսանտին հրետանային օժանդակություն ցուցաբերելու համար:

ՓՈՐՁԱՐԿՎԵԼ Է ԱՐԲԱՆՅԱԿԱՅԻՆ ՀԱԿԱՀՐԹԻՌԱՅԻՆ ՀԱՄԱԿԱՐԳ

ԱՄՆ հակահրթիռային պաշտպանության գործակալությունը հրթիռային հարձակման մասին նախազգուշացման STSS արբանյակային համակարգի փորձարկումներ է անցկացրել: 2009թ. ուղեծրում գտնվող STSS-ի երկու արբանյակներ կարողացել են հայտնաբերել պայմանական հակառակորդի կողմից արձակված միջին հեռահարության բալիստիկ հրթիռը, ուղեկցել մինչև Aegis հակահրթիռային համակարգի համար հասանելի տիրույթ և «ոչնչացնել»:
STSS-ը կդառնա ամերիկյան հակահրթիռային պաշտպանության հեռանկարային համակարգի բաղադրիչներից մեկը:

33000 ՀՐԹԻՌ

Ամերիկյան զինված ուժերում նախատեսվում է մոտ 5 միլիարդ դոլար ծախսել՝ բանակի, ռազմածովային ուժերի, ծովային հետևակի համար 33 000 հատ «երկինք-երկիր» դասի JAGM միանման հրթիռներ գնելու նպատակով: Հրթիռների արտադրության մրցույթին մասնակցում են Lockheed Martin ընկերությունը և Raytheon/Boeing կոնսորցիումը: Նոր JAGM-ները կփոխարինեն ամերիկյան սպառազինության մեջ առկա միանգամից երեք տեսակի հրթիռների` BGM-71 TOW, AGM-114 Hellfire և AGM-65 Maverick:
JAGM հրթիռի երկարությունը 1,8 մետր է, տրամագիծը` 17,8 սմ, քաշը` 48,9 կգ: Այն պետք է խոցի հակառակորդի թիրախները առնվազն 28 կիլոմետր հեռավորությունից:

ԱՄՆ պաշտպանության նախարարության ներկայացուոցիչը հայտնել է, որ Չինաստանի կողմից Վենեսուելային վաճառվող զինամթերքի քանակը կրճատվել է, քանի որ Չինաստանը կոմերցիոն նպատակներով ավելացրել է Լատինական Ամերիկայի այլ երկրներին վաճառվող զենքի ծավալը: Չինաստանի ակտիվությունը Լատինական Ամերիկայում աճել է, ինչը մտահոգում է ԱՄՆ-ին:

Schilling Robotics ընկերությունը, որը հիմնադրվել է 1985թ.-ին, առաջատար դիրքեր է զբաղեցնում ստորջրյա նավերի համար ռոբոտ-համակարգերի արտադրման ոլորտում: Ընկերությունը Կորեայի հանրապետության նավատորմին կմատակարարի նոր HD ROV համակարգեր: Յուրահատուկ կառուցվածքի շնորհիվ HD ROV համակարգը ապահովում է ստորջրյա նավերի մեջ մտնող բոլոր կարևոր ենթահամակարգերի հուսալիությունը և հասանելիությունը, ինչպես նաև հնարավորություն է ընձեռնում զգալիորեն կրճատելու ենթահամակարգերը կազմող բաղադրիչների քանակը և հեշտացնելու դրանց փոխարինման աշխատանքները` կատարման համար պահանջվող ժամանակը մի քանի տասնյակ ժամից նվազեցնելով մինչև մի քանի ժամի: HD ROV-ը օժտված է նաև հեռահար կառավարման կատարելագործված համակարգով:

Ապրիլի 13-ին ԱՄՆ-ի զինված ուժերի ներկայացուցիչը հայտարարել է, որ եթե տարեվերջին ԱՄՆ-ի զորքերը դուրս բերվեն Իրաքից, ապա Իրաքի ղեկավարները չպետք է ակնկալեն, որ երկրում սպասվող ճգնաժամի ժամանակ օգնություն կստանան: Այս հայտարարությունը հնչեց ԱՄՆ-ի պաշտպանության նախարար Ռոբերտ Գեյթսի՝ Իրաք կատարած այցից մի քանի օր անց:
Ըստ երկկողմանի անվտանգության պայմանագրի` այս տարվա վերջում ամերիկյան զորքերն ամբողջությամբ դուրս կբերվեն Իրաքից: