Language:

  • Հայերեն
  • Русский
  • English

Ռազմական

ԹՈՒՐՔԻԱՆ 600 ՄԻԼԻՈՆ ԴՈԼԱՐԻ ՏԵԽՆԻԿԱ Է ՎԱՃԱՌԵԼ ՄԱԼԱՅԶԻԱՅԻՆ

Թուրքիան խոշորածավալ` 600 միլիոն դոլարի ռազմական գործարք է կնքել Մալայզիայի հետ «Pars» զրահամեքենաների մատակարարման վերաբերյալ: Համաձայնությունը ձեռք է բերվել Մալայզիայի վարչապետի` Թուրքիա կատարած այցի ընթացքում, երբ վերջինս հայտարարել է երկու երկրների հարաբերությունները ստրատեգիական մակարդակի հասցնելու որոշման մասին: Մալայզիան կդառնա թուրքական զրահամեքենաների արտասահմանյան առաջին ներկրողը: Պայմանագիրը ստորագրել են թուրքական FNSS և մալայզիական DEFTECH ընկերությունները:

Հնդկաստանի պաշտպանական հետազոտությունների և նախագծումների կազմակերպությունը (DRDO) հայտարարել է, որ ավարտել է Arjun MK ΙΙ հիմնական տանկի կատարելագործված տեսակի ստեղծումը: Նոր մոդելը 90 տոկոսով կհավաքվի տեղական արտադրության դետալներից, այն դեպքում, որ նախորդ մոդելի դետալների ընդամենը 58 տոկոսն էր հավաքված տեղում:

ՌԻԱ-Նովոստի գործակալությունը տեղեկացնում է, որ Արաբական Միացյալ Էմիրությունների պաշտպանության նախարարությունը և ռուսական «Ռոսօբորոնէքսպորտ» ընկերությունը պայմանագիր են ստորագրել 135 ՀՄՄ-3-ի արդիականացման շուրջ: Գործարքը կարժենա մոտ 73,8 միլիոն դոլար: Ներկայումս արաբական երկրի բանակում կա 1992-2000թթ. գնված ռուսական արտադրության 600-ից ավելի ՀՄՄ-3: Ամենայն հավանականությամբ դրանք կձևափոխվեն ՀՄՄ-3Մ տեսակի պահանջներին համապատասխան:

ԲՈԻՆԳԸ ՀԱՂԹԵԼ Է

Ամերիկյան «Բոինգ» ավիաշինական կոնցեռնը հաղթող է ճանաչվել ԱՄՆ ռազմաօդային ուժերի համար նոր սերնդի լիցքավորող ինքնաթիռների մատակարարման նպատակով հայտարարված մրցույթում: Մրցույթին մասնակցում էր նաև եվրոպական ԵԱԴՍ ընկերությունը: «Բոինգը» պայմանագիրը կնքելուց հետո կստանա 3,5 միլիարդ դոլար՝ մինչև 2017թ. 18 ինքնաթիռ նախագծելու և արտադրելու համար: Մրցույթը հայտարարվել էր 2009թ.։

ԿՈՐԾԱՆԻՉՆԵՐԻ ԼԱՎԱԳՈՒՅՆ ՏԱՍՆՅԱԿԸ

Ֆ-18E Super Hornet-ը Ֆ-18 Hornet-ի կատարելագործված տեսակն է: Ի տարբերություն հին տեսակի՝ թեւերի բացվածքը 20%-ով մեծացված է: Այս մոդելում ընդլայնված են ինքնաթիռի մարտական հնարավորությունները: Տեղադրված է նոր ռադիոլոկացիոն համակարգ եւ նվազագույնի է հասցված ինքնաթիռի խոցելիությունը մարտի ժամանակ: Այս հարցում ԱՄՆ ՌՕՈՒ-ը շատ հավասարակշիռ մոտեցում են ցուցաբերել:
Boeing ընկերությունը շեշտը դրել է ոչ թե ինքնաթիռի քիչ տեսանելիության, այլ՝ մարտում կենսունակության եւ մարտական ունակությունների ընդլայնման վրա: Ֆ-18 E Super Hornet-ը ճկուն եւ արագընթաց ինքնաթիռ է, ոչ լիարժեք հինգերորդ սերնդի կործանիչ:

ՌՈՒՍԱՍՏԱՆՆ ԱՄՐԱՑՆՈՒՄ Է ԿՈՒՐԻԼՅԱՆ ԿՂԶԻՆԵՐԸ

Ակնկալվում է, որ Ֆրանսիայում Ռուսաստանի պատվերով կառուցվելիք «Միստրալ» դասի չորս ռազմանավերը, որոնցից երկուսը Ռուսաստանը կստանա 2014-15թթ., օգտագործվելու են Կուրիլյան կղզիների պաշտպանության նպատակով:
Բացի դրանից, Ռուսաստանի նախագահ Դմիտրի Մեդվեդևի կարգադրությամբ, Կուրիլյան կղզիներում տեղակայված ռուսական զորքը համալրվելու է ամենաարդիական սպառազինությամբ: Մոսկվան Կուրիլներ կուղարկի, մասնավորապես, կարճ և երկար հեռահարության հակահրթիռային պաշտպանության համակարգեր, ներառյալ «Ս-400 Տրիումֆ»:

Խաղաղության հետազոտությունների Ստոկհոլմի միջազգային ինստիտուտի (SIPRI) տվյալներով, սպառազինություն արտադրող` աշխարհի 100 ամենամեծ ընկերությունների արտադրանքի վաճառքի ծավալը 2009 թվականին 2008թ. համեմատ ավելացել է 14.8 մլրդ դոլարով կամ 8%-ով` կազմելով 401 մլրդ դոլար: Ուշագրավ է, որ աճն արձանագրվել է համաշխարհային ֆինանսական ճգնաժամի ժամանակաշրջանում: 2002թ. համեմատ աճը կազմում է 59%: