Ապրիլի 16-ին Իրանի պետական լրատվական «ԻՐՆԱ» գործակալությունը հաղորդել է, որ Միացյալ Նահանգները և Իսրայելն են ստեղծել «Stuxnet» համակարգչային վիրուսը, որպեսզի խոչընդոտեն Իրանի միջուկային ծրագրին:
-Հետազոտությունները և ուսումնասիրությունները ցույց տվեցին, որ «Stuxnet»-ի ստեղծման ակունքում են ամերիկյան և սիոնիստական ռեժիմները ,- հայտարարել է Իրանի քաղաքացիական պաշտպանության հրամանատար Ղոլամ Ռեզա Ջալալին:
Ջալալին առաջին իրանցի պաշտոնյան էր, ով Թեհրանի երկու ոխերիմ թշնամիներին մեղադրեց «Stuxnet»-ի ստեղծման համար:

Վերջերս բրիտանական սուզանավերից մեկի հերթապահող նավաստին կրակ էր բացել ատրճանակից, ինչի հետեւանքով մի սպա մահացել էր, իսկ մեկ այլ նավաստի` վիրավորվել: Այժմ էլ Մեծ Բրիտանիայի պաշտպանության նախարարության աշխատակիցների թույլ տված տեխնիկական սխալի պատճառով ատոմային սուզանավերի վերաբերյալ գաղտնի տեղեկատվությունը հայտնվել է ինտերնետում: 2009թ. ոլորտի վերաբերյալ կազմված հաշվետվությունը վերջերս հրապարակվել է բրիտանական խորհրդարանի կայքում, ընդ որում՝ գաղտնի տեղեկություններ պարունակող հատվածները պարզապես «ներկվել» են սպիտակ։ Այդ էջերը սևացվելու դեպքում համակարգչով աշխատելու տարրական հմտություններ ունեցող ցանկացած անձ կարող էր վերականգնել և կարդալ գաղտնի տվյալները: Գաղտնի է եղել հաշվետվության զգալի մասը:

Աֆղանստանում ծառայող ամերիկյան ծովային հետևակայինները մոտ ժամանակներս պինդ գործվածքի նոր վարտիքներ կստանան: Դրանք պետք է պաշտպանեն զինվորի աճուկային մասը ինքնաշեն պայթուցիկ սարքերի պայթյուններից: Նոր ներքնաշորը բեկորներից չի պաշտպանում, սակայն ամրության շնորհիվ թույլ չի տալիս, որ ավազն ու պայթուցիկի մանր մասնիկները թափանցեն վերքի մեջ, կանխում է ազդրային հատվածում զարկերակային ծանր վնասվածքները: Վարտիքի կտորը նաև հակամանրէային հատկություն ունի: Նշենք, որ նմանատիպ վարտիքներ արդեն մատակարարվում են բրիտանական զինծառայողներին:

Սանկտ Պետերբուրգի ափերի մոտ ջրարկվել է «Հսկող» դասի երրորդ կորվետը: Նոր նավը Ռուսաստանի ռազմածովային ուժերին կհանձնվի 2012թ. և կտեղակայվի բալթյան նավատորմում: Նախատեսվում է, որ նույն դասի երկրորդ նավը, որ ջրարկվել է 2010թ. մարտին, շարք կմտնի այս տարվա կեսերին: Այս դասի առաջին նավը սպառազինության է վերցվել 2008թ.: Նախկինում այս դասի ռազմական նավեր չեն առանձնացվել: Դրանք կառուցվում են անտեսանելիության տեխնոլոգիայի կիրառմամբ և նախատեսված են ծովին մոտ տարածքում ռազմական գործողություններ վարելու, ստորջրյա և վերջրյա նավերի դեմ պայքարի և դեսանտին հրետանային օժանդակություն ցուցաբերելու համար:

ԱՄՆ հակահրթիռային պաշտպանության գործակալությունը հրթիռային հարձակման մասին նախազգուշացման STSS արբանյակային համակարգի փորձարկումներ է անցկացրել: 2009թ. ուղեծրում գտնվող STSS-ի երկու արբանյակներ կարողացել են հայտնաբերել պայմանական հակառակորդի կողմից արձակված միջին հեռահարության բալիստիկ հրթիռը, ուղեկցել մինչև Aegis հակահրթիռային համակարգի համար հասանելի տիրույթ և «ոչնչացնել»:
STSS-ը կդառնա ամերիկյան հակահրթիռային պաշտպանության հեռանկարային համակարգի բաղադրիչներից մեկը:

Ամերիկյան զինված ուժերում նախատեսվում է մոտ 5 միլիարդ դոլար ծախսել՝ բանակի, ռազմածովային ուժերի, ծովային հետևակի համար 33 000 հատ «երկինք-երկիր» դասի JAGM միանման հրթիռներ գնելու նպատակով: Հրթիռների արտադրության մրցույթին մասնակցում են Lockheed Martin ընկերությունը և Raytheon/Boeing կոնսորցիումը: Նոր JAGM-ները կփոխարինեն ամերիկյան սպառազինության մեջ առկա միանգամից երեք տեսակի հրթիռների` BGM-71 TOW, AGM-114 Hellfire և AGM-65 Maverick:
JAGM հրթիռի երկարությունը 1,8 մետր է, տրամագիծը` 17,8 սմ, քաշը` 48,9 կգ: Այն պետք է խոցի հակառակորդի թիրախները առնվազն 28 կիլոմետր հեռավորությունից:

ԱՄՆ պաշտպանության նախարարության ներկայացուոցիչը հայտնել է, որ Չինաստանի կողմից Վենեսուելային վաճառվող զինամթերքի քանակը կրճատվել է, քանի որ Չինաստանը կոմերցիոն նպատակներով ավելացրել է Լատինական Ամերիկայի այլ երկրներին վաճառվող զենքի ծավալը: Չինաստանի ակտիվությունը Լատինական Ամերիկայում աճել է, ինչը մտահոգում է ԱՄՆ-ին: