Պատրաստ է Սևծովյան նավատորմի վերաբերյալ ռուս-ուկրաինական 2 պայմանագիր: Ռուսաստանում Ուկրաինայի դեսպան Վլադիմիր Ելչենկոն հայտնել է, որ դրանք կոստորագրվեն ռուս-ուկրաինական միջպետական հանձնաժողովի առաջիկա նիստում: Դրանցից մեկը կկարգավորի տեղակայման վայրերից դուրս Սևծովյան նավատորմի զինծառայողների գտնվելու հարցերը, իսկ երկրորդը` տարերային աղետների դեպքում համատեղ գործողությունների իրականացման հետ կապված խնդիրները:

Օգոստոսի 25-ին երկօրյա այցով Վրաստան է ժամանել Եվրոպայում ՆԱՏՕ-ի ուժերի գերագույն գլխավոր հրամանատար ծովակալ Ջեյմս Ստավրիդիսը: Վրաստանի պաշտպանության նախարար Բաչո Ախալայայի հետ հանդիպման ընթացքում նա քննարկել Աֆղանստանում ռազմական գործողություններին Վրաստանի մասնակցության հետ կապված հարցեր:
Այսօր Աֆղանստանում ԱՄՆ և Ֆրանսիայի պատասխանատվության գոտում են վրացի 900 զինծառայողներ: Այս տարվա սկզբից նրանց քանակն ավելացել է` հասնելով 1500 մարդու: Աֆղանստանում ռազմական գործողությունների մասնակցելու ամբողջ ընթացքում Վրաստանը տվել է 8 զոհ և շուրջ 20 վիրավոր:

Լիբիայի դեմ ռազմական գործողությունների սկսվելուց ընդամենը 4 ամիս առաջ Մեծ Բրիտանիան Մուամար Քադդաֆիի ռեժիմին վաճառել է ավելի քան 60 մլն ֆունտ ստեռլինգի զենք` դիպուկահար հրացաններ, զինամթերք, արցունքաբեր գազ և ցույցեր ճնշելու միջոցներ:
Վերջին 2 տարում Մեծ Բրիտանիայի կառավարությունը Հյուսիսային Աֆրիկայի և Մերձավոր Արևելքի երկրներ է մատակարարել ավելի քան 2.3 մլրդ ֆունտ ստեռլինգի սպառազինություն: Այս մասին ասվում է երկրի խորհրդարանի զեկույցում:

Իրանը Ռուսաստանի դեմ հայցով դիմել է միջազգային դատարան: Նա Ռուսաստանից պահանջում է կատարել 2007թ. կնքված պայմանագրի դրույթները և մատակարարել խոստացված «С-300» զենիթահրթիռային համալիրները, որոնց վաճառքը, պաշտոնական Թեհրանի կարծիքով, չի հակասում 2010թ. հունվարին Իրանի նկատմամբ սահմանված պատժամիջոցների կիրառմանը: Որպես տարբերակ` Իրանը Ռուսաստանին առաջարկում է մատակարարումն իրականացնել Վենեսուելայի միջնորդությամբ:

ԱՄՆ պաշտպանության նախարարությունը ծրագրում է ՌՕՈՒ զարգացման հետ կապված խնդիրները լուծել անօդաչու թռչող սարքերի (ԱԹՍ) ավտոնոմ (ինքնաբավ) ցանցեր ստեղծելու միջոցով:
Հարյուրավոր թռչող սարքեր միջատների պարսի նման կգրոհեն հակառակորդի վրա` բացահայտելով նրա ՀՕՊ միջոցները և ոչնչացնելով դրանք: Նման գրոհին հակազդել գործնականում հնարավոր չէ: Մեծ թվով ԱԹՍ-ների գործողությունների փոխհամաձայնեցման խնդիրը արդեն լուծման փուլում է:

Չեխիայի պաշտպանության նախարարությունը որոշել է վաճառել պահեստում գտնվող խորհրդային արտադրության 100 հատ «Т-72» տանկերը: Վաճառքից ստացված գումարով Չեխիան մտադիր է իրականացնել մի շարք ռազմական նախագծեր:
Երկրի խորհրդարանի հավանությունը ստանալու դեպքում Չեխիան իր սպառազինության մեջ կթողնի 30 հատ «T-72M» արդիականացված տանկ, որոնց շահագործման ժամկետն ավարտվում է 2025թ.: «T-72M»-ի զանգվածը 48 տ է, արագությունը` 61կմ/ժ: Տանկի վրա տեղադրված է 120 մմ տրամաչափի հրանոթ և 7.62 մմ տրամաչափի գնդացիր, ինչպես նաև 12.7մմ-անոց զենիթային գնդացիր:

Իրանում ավարտվել են 2 նոր տեսակի սպառազինության` հականավային Qader թևավոր հրթիռի և Valfajr տորպեդային համակարգի մշակումները: Այդ մասին հայտարարել է Իրանի նախագահ Մահմուդ Ահմադինեջադը` նշելով, որ նոր զինատեսակները կոչված են պաշտպանելու երկրի ազգային անվտանգությունը:
Qader թևավոր հրթիռի գործողության շառավիղը 120 ծովային մղոն է (մոտ 222 կմ): Այն կարող է խոցել նաև ցամաքային թիրախներ: