ԱՄԱՆՈՐՅԱ ԺՊԻՏՆԵՐ

♦ Նախագահի ամենագաղտնի հրամանը կոչվում է. «Երկրի պաշտպանունակության գոնե ինչ-որ ձևով ապահովումը յուրաքանչյուր տարվա հունվարի 1-ին ժ.5-ին»:

♦ Ինչքան էլ Ձմեռ պապին խմեցնես, միևնույն է, նա իր պարկը երբեք չի մոռանա:

♦ Հարգելի ընկերներ և բոլոր նրանք, ովքեր ինձ երջանկություն, հաջողություն ու սեր են մաղթել 2011-ին: Շտապում եմ տեղեկացնել` ձեր ոչ մի մաղթանքը չի իրականացել:

♦ Ցանկանում ես քեզ աստղ զգալ, նստիր եղևնու վրա:

♦ Ես նորից մեկ տարով ավելի ջահել եմ, քան կլինեմ հաջորդ հունվարին:

♦ Պատանեկությունն այն է, որ արդեն չես հավատում, թե Նոր տարուն քեզ այցի կգա Ձմեռ պապը, բայց դեռ հույս ունես, որ կգա Ձյունանուշը:

♦ Ամանորյա տրամադրությունն այն է, երբ ուրախ ես տեսնել նույնիսկ նրանց, ովքեր դուռը շփոթել են:

♦ Ամանորն անհրաժեշտ է երեխաներին հեքիաթի համար, անհաջողակներին` որպես նոր հույսերի սկզբնակետ, իսկ մնացածին` ուրախության համար:

♦ Քո կյանքում ևս մեկ Նոր տարի` դա Աստծո ամենալավ նվերն է:

♦♦♦

Վարդանիկը հարցնում է մորը.

-Ո՞վ է իմ հայրը:

-Ձմեռ պապը:

-Այդ ինչպե՞ս, – զարմանում է Վարդանիկը:

-Ինչպես, ինչպես… գիշերը եկավ, նվեր արեց, և այլևս նրան ոչ ոք չի տեսել:

♦♦♦

Մարդ ու կին ընկերներին ասում են.

-Նոր տարուն եկեք մեզ մոտ:

-Մենք չենք կարող:

-Շնորհակալություն, դուք շատ բարի եք:

♦♦♦

Մի անգամ երեք օտարական գիշերելու տեղ են փնտրում: Թակում են առաջին պատահած տան դուռը: Տանտերը դուռը բացում է ու հարցնում, թե ովքեր են:

-Առողջությունը, Սերը և Հարստությունը: Թույլ տվեք գիշերենք:

-Բայց մենք ընդամենը մեկ ազատ տեղ ունենք, գնամ, տնեցիների հետ խորհրդակցեմ:

Տանտիրոջ հիվանդ մայրը խնդրում է թողնել Առողջությանը, դուստրն առաջարկում է Սիրուն, իսկ կինը` Հարստությանը: Եվ մինչ նրանք վիճում էին, օտարականները հեռանում են:

Թող Նոր տարում բոլորի տանը միշտ տեղ լինի Առողջության, Սիրո և Հարստության համար:

Պատրաստեց ՆԱԻՐԱ ՄԿՐՏՉՅԱՆԸ